कीर्तना 60

मोक्डो सुटि कियुसा इन्जेर किय्वल पार्तना

पाटा वारुस्वन साटि: वोर दाविद अनि वोनुर सिपायिर आरम-नहरयिम अनि आरम योबतुर सङा लडेय किय्वल जर्ग्ता. अस्के योवब पेजे मल्सि बारा हजर्क येदोम जातितुरकुन सोवोडा लोदितगा जक्तोर. अद आता पेजे दाविद इद कीर्तन लिहि किय्वल जर्ग्ता.

1 बगवंता! निमे माकुन उल्टा तेच्चि, पाकि कीसि वाड्ति.

निमे मा पोरो सोङुन वाति.

बति इंके मोदोल मत्तपिनय माकुन सुद्रन कीम.

2 निमे इद बोमितुन हालि कीति.

इद मा बोमि चीरिङ पेय्सि तरतरा असेर मंता.

इद बोमितुन आतङ अव डोड्डोङ-कपिन सपय कीम.

3 नी पर्जतुन निमे वेले दुक्सङ सीति.

जिङ्डे मासि ताकनल माकुन कल उनल कीति.

4 बाव-बक्तिता वेरेते ताक्वलिर तम्वा पोरो मुच्लि अर्वलिर्गटल तपुस्ले

निमे वूरकुन दम्किता निसनि सीति.

रेला.

5 निमे पेर्मा किय्वल पर्जतुन मुक्ति पुटनल,

माकुन जवब सीसि नीवा तिना केय्दे बचि कीम.

6 तंवा पवित्रा जागतल बगवंतल गोस्टि सीतोर.

नना सेकेमुन आनंद्ने तूसि सींतोन.

अनि सुकोत लोदितुन नना पाकि कीसि सींतोन.

7 गिलादु अनि मनसे येरियनुर नावुरे आंदिर.

येप्रायिम येरियतुर नावा तलदगा केर्वल कचि टाटत मोडितुर आंदिर.

यूदना कांदांतुर राजना आय्वल नना पिय्वल डुड्डु आंदिर.^*

8 मोयबियुल्क नना काल्क नोर्वल परतुन मोडि आंतेर.

येदोमियुल्क नावङ चेपुल्क पिय्वलिर दासिर आंतेर.

पिलिस्तियुलकुन नना हारि कीता काड्कि, हंकत कींतोन.

9 सिर्मुट बंदोबस्त गोडा मंवल नगुडगा नाकुन बोर पिय्सि वोंतोर?

येदोमुन सङा लडेय कीसि मेय्ले नाकुन बोर ताकुसनुर?

10 बगवंता! निमे माकुन वोप्वक्ने, पाकि कीसि वाड्ति कि?

बगवंता, लडेय किय्ले मा सिपायिर सङा निमे वासेर सेल्वि कि?

11 माय्नलिरा मदत माकुन बततुने कामि सियो.

पगा-दारकुन मेय्ले माकुन नीवय मदत पह्‍जे.

12 बगवंतना मदतुन हिंदल ममोट मेयंतोम.

पगा-दारकुन मा कालकुन बूड दाबि किय्वल वोरे आंदुर.⁺