कीर्तना 61

काबाडा इन्जेर किय्वल पार्तना

पाटा वारुस्वन साटि: दाविद्ना कीर्तन

1 ये बगवंता! नावा विनंतितुन केन्जा.

ना पार्तनतुन केवि सीसि केन्जा.

2 नावा दिलतगा गटि-दीर्या सेल्वक आनेके, नना दर्तुरिता कोनतल नीकुन विनंति कींतोन.

ना परंतुन काबाड्ले डङल बंडत पोरो नाकुन नेहरे वरुसा.

3 निमेय नाकुन बचि किय्वनि आंदि.

पगा-दारकुन मुने, काबाड्वल किलतुन मोडि निमेय मंति.

4 पिडिनङ-पिडिङ वेरि नना नीवा पार्तना-विंति किय्वल डेरतगा मंदंतोन.

नीवङ मारेलकुन बूड नना मकंतोन.

रेला.

5 बगवंता, नना काल कर्सि मत्तङ अव मोकुलकुन वोप्ति.

नीवा पोरोडे बाव-बक्तिता वेरेते पिस्वलिरा जाय्जत्नगा नाकुन ईसा सीसि मंति.

6 राजना पिस्वल वहितुन अदिक बडि कीम.

राजल पिडिनङ-पिडिङ पिसि मंनिर.

7 बगवंतना चर्नते वोर बस्केट राज ताकुसेर मंनिर.

नीवा मारियो अद पेर्मतुन अनि बरोसतुन पिय्सि वोन काबाडा.

8 हर दिवोस नावङ मोकुलकुन कंडि कीसेर,

नीवा पोरोडुन बस्केट कीर्ति सींतोन.