#काबाडा इन्जेर पार्तना किय्वल
पाटा वारुस्वन साटि: दाविद्ना कीर्तन
59
1 ना बगवंता, ना पगा-दार्क्ना केय्दल नाकुन तपुसीम. ना पोरो मुच्लि अर्वलिर्गटल नाकुन काबाडा.
2 करेबलिरा केय्दल नाकुन तपुसीम.
जीवङ येत्वलिरा केय्दल नाकुन बचि कीम.
3 इचुला! ना परन तेंड्ले डाव पोसेर मंतेर.
येहोवा देवा! नावा गल्तितुन अनि ना पापुन हिंदल आयो बति,
वटि आगयेन ताकद वालिर ना पोरो मीरे मासि तेत्तेर.
4 नह्गा बदे कसुर सेल्वेके गिर,
वूर नाकुन पूड्लेन तयर असेर मंतेर.
देवा, नाकुन मदत किय्ले वेय्ने वरा.
5 स्वर्ग्नङ दलम्क्नोर अदिकारि आय्वल येहोवा देवा!
इज्रयेल पर्जतोर बगवंता, जग्दुनियतुरकुन सिक्सा किय्ले तेदा.
करेबलिर्गटल बोन पोरोन नीवा दया तोह्मा.
रेला.
6 पोद्रेक वूर उंडे वांतेर.
नेयकुन मोडि मुह्च्चेर, नगुडुन सिर्मुट तिरियंतेर.
7 केन्ज्वलिर बोरे सेलुर इन्जेर वूर तम्वा तोड्दल गोस्टिङ सुटि कींतेर.
वूरङ गोस्टिङ रूसिन मोडि दार मंतङ.
8 बति येहोवा देवा, निमे वूरकुन सूड्सि कवंति.
दुस्रोक सम्दो जातिनुरकुन सूड्सि, निमे चेह्टेङ कींति.
9 निमेय नावा ताकद्नि आंदि.
नी साटिने नना सरि सूड्सेर मंतोन.
ये बगवंता! निमेय डङल किलत मोडि नाकुन काबाड्वनि आंदि.
10 ना बगवंता, नीवा मारियो अद पेर्मते नाकुन मदत कींति.
ना पगा-दारकुन हारि कीनेके निमे नाकुन सूड्ले मोका सींति.
11 वूरकुन अचनक जक्मा!
बारितेके ना पर्जा तान मरुङ्सि दांतेर बतलो.
माकुन काबाड्वल डालदुन मोडि मंवल बगवंता!
नीवा बलम्ने वूरकुन पग्रि कीसि, हारि कीम.
12 वूर रोपो मंवलिक पाप्क वूरङ सिव्लिनल गोस्टिना रूप्ने बह्रि अरंतङ.
वूर सिय्वलिक सापेनङ, वड्क्वलिक लबड गोस्टिन हिंदल,
वूरा गमंडि-पान वूर्कुने कोंडि कियि.
13 सोङ्ने वूरकुन मूरि कीसि वाटा.
वूर सेल्वक्ने मूरि कीसि वाटा.
याकोब्ना कांदांतुन पोरो बगवंतल राज ताकुसेर मंतोर इन्जेर,
दर्तुरितङ नालुङ मूलनुर करि कीनल कीम.
रेला.
14 पोद्रेक वूर उंडे वांतेर.
नेयकुन मोडि मुह्च्चेर, नगुडुन सिर्मुट तिरियंतेर.
15 कानेतुन साटि हिके-हके मह्क्सेर तिरियंतेर.
अनि पेटि निंद्वेके सोत्तेके, वूर रात पूरो आगंतेर.
16 बति निमे नाकुन डङल किलतुन मोडि मंति.
आपतिता दिवोस्ने नाकुन काबाड्वनि आसि मंति.
नीवा ताकदुन बारेते नना डगुर-पान सींतोन.
सक्रेन तेच्चि नीवा मारियो अद पेर्मतुन बारेते, कुसिते कीर्तन वारंतोन.
17 बगवंतल नाकुन डेङल किलत मोडि
अनि मारियो अद पेर्मा वाले आसि मंतोर.
ना ताकद आय्वल बगवंता!
नना नीकुने डगुर-पान सीसेर वारंतोन.