नरिमन्कना करब-पान
पाटा वारुस्वन साटि: येहोवा देवनोर सेव्कल दाविद लिहि कीता कीर्तन.
36
1 “बगवंतल इत्तेके असले वेरे सेले अनि मान गिर सियोन” इन्जेर मर्ला बड्वल करेबल, बेय करब काम कीसेर मंतोर.+
2 वोर मायनल बेय गर्वते मत्ता काड्कि,
वोन तना कीतङ पाप्क दिसोङ.
3 वोनङ गोस्टिङ करब्ने अनि कपट्ने निन्चि मंदंतङ.
वोर बुदि-गियंते ताक्वल अनि चोकोट किय्वल मर्न्गंतोर.
4 वोर कटुड पोरो मनेकेन पाप्ना पिलन सोन्च कींतोर.
वोर ताक्वा अद सरदुन ताकंतोर अनि करब काम किय्ले गिर सुस्ति सूडोर.
बगवंतना चोकोट्ना गुन
5 येहोवा देवा नीवा मारियो अद पेर्मा आगसुन लागंता.
नीवा बरोसता गुन स्वर्ग्नगा लागंता.
6 नीवा नियत बेय डङल गुटत मोडि मेलिवक मंवल आंदु.
नीवा नायम बेय कोल मंवल सम्दुरतुन मोडि मंता.
येहोवा देवा, निमे नरिमन्कन अनि जिव्रसुन बचि कींति.
7 बगवंता, नीवा मारियो अद पेर्मा बचोरोय विलुवता आंदु.
नरिमन्कलिर तम्वकुन काबाड्ले नीवा कोरता दड्मिते वांतेर.
8 नीवा रोतगा बर्पुर मंवल कानेतुन पेटिमेन तिंतेर.
नीवङ चोकोट्नङ चीज्क लव्डित मोडि पारंतङ अनि पर्जा अद लविडल उंटेर.
9 निह्गा जीवता जला मंता.
नीवा वेड्चितेन ममोट सूडा पर्सेर मंतोम.
10 नीकुन करि कीतुर पोरो नीवा मारियो अद पेर्मा
अनि करल दिल्ते ताक्वलिर पोरो नीवा नियत निल्सि मनि.
11 गर्वते मंवलिर ना पोरो तेद्वक कीम.
करेबलिरा केय नाकुन पूडा सिय्वक सूडा.
12 सूडा! करब्नङ काम्क किय्वलिर अगा अर्सि मंतेर.
वूर दन्कङ तिन्जि बस्केट तेदा वाय्वक अर्सि मंतेर.