कीर्तना 37

चोकोट्नुरा अनि वायुट्नुरा सोंवल जागा

दाविद्ना कीर्तन

1 करेबलिरकुन सूड्सि निमे परेसन आय्मा.

करब काम्क किय्वलिरकुन सूड्सि कुटा कुटा आय्मा.

2 वूर जाडित मोडि वेय्नेने वतंतेर.

चिल्लल बाजित मोडि वार्जुरंतेर.

3 येहोवा देवनगा बरोसा इर्सि चोकोट्नङ काम्क कीसेर मन.

अस्के इद देस्नगा सांतिते पिसेर चोकोट मंदंति.

4 येहोवा देवन हिंदल आनंद येच्चेर मन.

अस्के वोर नीवा दिल्तङ आसन पूरि कींतोर.

5 येहोवा देवनगा बरोसा इर्सि, नीवा जिन्गनिता सरदुन वोन हव्लि कीम.

अस्के वोर बतल कियनयो अद कींतोर.

6 वोना वेड्चितुन मोडि नीवा नियतुन,

दुपरिता पोडदुन मोडि नीवा नायमुन दिसनल कींतोर.

7 येहोवा देवना चर्नते सांत्ने मन्जेर,

वोर वेह्‍वडुन साटि नेह्‍ना सूड्सेर मन.

तंवा जिन्गनितगा चोकोट बडे माय्वन सूड्सि

अनि करब सोन्चकुन पिय्सि ताक्वन सूड्सि, सोङ्ने हाले माय्मा.

8 सोङुन वाय्मा अनि सिर्डल गुंतुन सुटि कीम.

सोङ्ने हाले माय्मा. अद करब्नेके ताकुसंता.

9 बारितेके करेबलिर मूरे मासि दांतेर.

बति येहोवा देवनगा बरोसा इर्वलिर,

इद देसुन ईसदार्क आंतेर.

10 उंडे जरसि आता पेजे करेबलिर दिस्वक आंतेर.

वूर साटि वूरा जागतगा मह्‍क्तेके गिर वूर मनुर.

11 बति सादु-पांदे मंवलिर

इद देसुन ईसदार्क आंतेर.

अनि वूर बर्पुर सुक-सांतिते मंदंतेर.⁺

12 करेबलिर, नियत्नुर पोरो कुट्रा पियंतेर.

वूरकुन सूड्सि, पल्क कोर्कंतेर.

13 बति पर्बु बगवंतल वूरकुन सूड्सि कवंतोर.

वूरा तस्वा जर्ग्वल मंता इंवल वोन टावये.

14 गरिबकुन, जुरत्ने मंवलिरकुन

अनि नियत्ने ताक्वलिरकुन जक्ले

करेबलिर तल्वर्क तेंड्तेर अनि बान्क मोप कीतेर.

15 वूरङ तल्वर्क वूरा दिलतुन रोपोन गाडे मांतङ.

अनि वूरङ बान्क उरुङ्सि दानुङ.

16 नियत्नुर्गा मंवल इचुसि मत्तेके गिर,

अद बेय वेलेटिर करेबलिर्गा मंवल दन-दव्लतनल तेर विलुवता आंदु.

17 बारितेके, करेबलिरङ बुजन उरुस्वल जर्गंता.

बति नियत्नुरकुन येहोवा देवले राकि किय्वल आंदुर.

18 नियत्नुरङ दिवोस्क पूरो येहोवा देवन टावय.

वूरा जाय्जत^* बस्केट निल्सि मंदंता.

19 आपतितङ दिवोस्क्ने वूरा हिजत सोनो.

करुदङ दिवोस्क्ने वूर्गा बर्पुर मंदंता.

20 बति करेबलिर नासेडम आसि दांतेर.

येहोवा देवनेर पगा-दारलिर, वच्चि सोंवल चिल्लल जाडितुन मोडि मंदंतेर.

अचनक पोया दिस्वक आतपिनय, वूर दिस्वक आंतेर.

21 करेबलिर बाकि येच्चि कंडि किय्वक मंदंतेर.

बति नियत्नुर दयते दुस्रुरकुन दान-दर्मा कींतेर.

22 येहोवा देवना आसिर्वाद येच्चि मंवलिर बोमितुर ईसदार्क आंतेर.

बति बूर्कुंते बगवंतल सापेना सींतोरो, वूर नासेडम आंतेर.

23 येहोवा देवल मदत कीतपिनय बोरेय्ते ताकंतोरो,

वोना ताक्वल सूड्सि वोर बगवंतल आनंद येतंतोर.

24 येहोवा देवल वोना केय पिय्सि मंतोर.

अदेन साटि वोर बूड अर्तेके गिर तेद्वक्ने मंनोर.

25 नना डियोना मत्तोन. इंके नना मात्रना आतोन.

तेर बति बगवंतल नियत्नुरकुन अनेलम सुटि किय्वले आयि,

वूरा संतान बिचेम तल्क्वले आयि नना बस्केन सूड्मकि.

26 वूर बस्केट दयते दुस्रुरकुन बाकि सीसेर मंदंतेर.

वूरा संतांदुर आसिर्वाद येतंतेर.

27 करब किय्वडुन सुटि कीसि चोकोट कीम.

अस्के निमे सेलेके नीवा कांदांतुर बस्केट इद देस्नगा पिसंतेर.

28 बहन इत्तेके, येहोवा देवल नायमुन पसंद किय्वल आंदुर.

वोर तंवुर बक्तलिरकुन सुटि किय्वल आयोर.

वूरकुन बस्केट काबाड्वल जर्गंता.

बति करेबलिरा संतान मूरे मासि दांता.

29 नियत्नुर बोमितुन ईसदार्क आंतेर.

वूरा संतान तान्गा बस्केट पिसि मंदंतेर.

30 नियत्नुरा तोड्डि बुदि-गियंतुन बारेते वड्कंता.

वूरा वेन्जेर नायमुन पचर कींता.

31 वूरोर बगवंतना दर्मा-ग्रंत्ना कानुन वूरा दिलतगा मंता.

वूर तम्वा सर्दल काल्क गसुर्क्वक्ने ताकंतेर.

32 करेबलिर नियत्नुरा सरि केप्सेर मन्जि,

वूरकुन जक्ले सूड्सेर मंदंतेर.

33 वूरा केय्दे तस्वा जर्ग्ले, नियत्नुरकुन येहोवा देवल हव्लि कियोर.

नियत्नुरा तस्वा जर्ग्नेके वूरकुन कसुर कीतुरा लेकते येतोर.

34 येहोवा देवन साटि सरि सूड्सेर,

मिरट वोना सरि-मारग पिय्सि ताकना.

बोमितुन आगुटि कियन साटि

वोर मीकुन ताकद सींतोर.

करेबलिर नासेडम आय्वल कुद मिरट सूडंतिट.

35 करेबल वेले बडे माय्वल नना सूड्तोन.

मरा पिर्ता जागतगने बडे मातपिनय, वोर बडे मातोर.

36 अद आता पेजे वोर जीवा सुटि कीसि सोडितोर.

अस्के नना वोन साटि मह्‍क्तोन बति, वोर पुट्मकि.

37 इदेन बद्लि बे-कसुर वालिरकुन अनि नियत्ने ताक्वलिरकुन सूडा.

ईतुर सांतितुन साटि मह्‍क्वलिरकुन चोकोट्ना बविसत पुटंता.

38 करेबलिरा संतान मूरे मांता.

वूरकुन बविसत इंवल असले मंनो.

39 नियत्नुर आपतितगा मनेके वोरे वूरकुन काबाडंतोर.

येहोवा देवल वूरकुन सात सीसि बचि कींतोर.

40 वूर येहोवा देवना कोरते सोत्ता काड्कि,

वूरकुन करेबलिरा केय्दल वोर बचि कींतोर.