कीर्तना 35

मदतुन साटि किय्वल पार्तना

दाविद्ना कीर्तन.

1 येहोवा देवा, नाकुन उल्टा आय्वलिरकुन उल्टा आम.

अनि नाकुन उल्टा आसि लडेय किय्वलिर सङा लडेय कीम.

2 तल्वरतुन अनि डालतुन पिय्सिकुन, नाकुन मदत किय्ले निल्सि मन.

3 गोर्कङ अनि मर्स्क्ने, नाकुन पूड्वलिरकुन अड्डम आम.

“ननय नीकुन बचि किय्वना” इन्जेर नावा परंतुन सङा वेहा.

4 ना परन तेंडना इन्जेर सूड्सेर मंवलिरकुन,

लजन वाटेङ आनल अनि मानम सोनल कीम.

नाकुन नुक्सन कियना इन्जेर सोन्च किय्वलिर पेजे मल्सि तकपिका आयिर.

5 वूर वडिदे पासि सोंवल पोटुन मोडि आयिर.

येहोवा देवनोर दूतल वूरकुन पूडिर.

6 वूरा सरि सिकटि आसि, गसुर्क्सि अरिर.

येहोवा देवनोर दूतल वूरकुन पूडिर.

7 नना वूरकुन बतय किय्वेके गिर

नाकुन पियना इन्जेर मक्सिकुन वूर तम्वङ चंदोडङ मांडि कीतेर.

नना वूरकुन बतय किय्वेके गिर

ना परन तेंडना इन्जेर वूर डोडो ताड्तेर.

8 वोन करे माय्वक्नेन गंडम वोन पोरो वायि.

तना मांडि कीता चंदोडतगा तनय अर्सि नासेडम आयिर.

9 अस्के येहोवा देवन हिंदल नना कुसि आंतोन.

वोर बचि कीततुन हिंदल नना आनंद्ने मंदंतोन.

10 अस्के नावा मन-दिल, “येहोवा देवा! नी दात्नोर बोर मंतोर?

ताकद वालिरा केय्दल ताकद कमि वालिरकुन सुटि कियुस्ति.

अनि लूटि किय्वलिरा केय्दल गरिबकुन सुटि कियुस्ति” इन्जेर वेहंता.

11 कपेटल बुदितुर गवदार्क

नना किय्मकि अव कसुकुन ना पोरो वाड्सेर मंतेर.

12 नना वूरकुन चोकोट कीतेके वूर नाकुन वायुट कीसि बर्पेय कीसेर मंतेर.

नना दिक सेलोर वोना आतोन.

13 वूर बेमरिते मत्तेर अस्के, नना नारज आसि^* मत्तोन.

अनि वूर साटि उपस मन्जि ना करुतुन जक्तोन.

तेर बति, ना पार्तना जवब तर्वक्ने नह्‍गन मल्सि वाता.^*

14 वूर नाकुन सोप्तलिर मोडि, तादल-तमुन मोडि मत्तपिनय ताक्तोन.

नावा अवल मार्तेके, आड्वन मोडि दुक्सते मत्तोन.

15 बति नना कूट्सेर ताक्वल सूड्सि, वूर कुसि आसि मीरे मातेर.

नाकुन करे माय्वक्ने, कपेटलिर दुस्मंते मीरे मासि, अदे काम इत्तपिनय नाकुन राङ्तेर.

16 नना कोदा पासि अर्सि मनेके नाकुन चेडि कीसेर मत्तेर.

अनि वूर ना पोरो पल्क कोर्क्सेर मत्तेर.

17 पर्बु! निम बचजेल सूड्सेर दब मंद्कि?

वूर ना परन तेंड्वक मुनेने नाकुन बचि कीम.

ना परंतुन चिहोना तोड्दल तपुसीम.

18 अस्के, सम्दिर पर्जत नड्डुम नना नीकुन डगुर-पान सींतोन.

वेल्ले मांदितुन रोपो नीकुन डगुर-पान सींतोन.

19 लबड वेह्‍वलिर, ना पगा-दार्क ना बारेते कुसि आया सिय्मा.

बतय तप सेल्वेके गिर नाकुन देप्वलिरा कड्दे अर्वक्ने कीम.⁺

20 वूर कुसि-रजुतङ गोस्टिङ वड्कुर.

बति देसुन रोपो सांतिते मंवलिरकुन उल्टा कपट्नङ पिलन्क वाटंतेर.

21 नाकुन राङन साटि, वूर तोड्डि सरिसेर मंतेर.

“आहा आहा वोर कीता मा कड्क्ने सूड्तोम अले” इन्जेर वूर इंतेर.

22 येहोवा देवा, अद नीक्ते दिसेरेन मंता.

तान सूड्सि दब मन्मा.

ना पर्बु, नह्‍गटल लङ मन्मा.

23 नाकुन नायम कियन साटि तेदा.

ना बगवंता, ना पर्बु, ना हिंदल नायम कियन साटि तेदा.

24 येहोवा देवा, ना बगवंता, नीवा नियतुन पिय्सि, नाकुन तस्वा कीम.

ना हिंदल वूर कुसि आय्वक्ने कीम.

25 ‘आहा ... मा आसा पूरे मात’ इन्जेर मंदे वूर इंवक मंदना.

‘वोन मिङ्सि येत्कट्’ इन्जेर वूर इंवक मंदना.

26 नावा आपतितुन सूड्सि, कुसि आय्वलिर सम्दिरकुन लजन वाटेङ आयि.

नाकुन उल्टा आय्वलिरकुन लजन वाटेङ आसि, मानम सोनि.

27 नावा बे-कसुडुन पिय्सि आनंद येत्वलिर वेले कुसि आसि,

“तंवोर सेव्कना सुक-सांतितुन सूड्सि,

कुसि आय्वल येहोवा देवन डगुर-पान वायि” इन्जेर वूर बस्केट इंनिर.

28 ना वेन्जेडे नीवा नियतुन बारेते,

नीवा कीर्तितुन बारेते दिवोस पूरो डगुर-पान सींतोन.