कीर्तना 34

बगवंतना चोकोट्ना गुंतुन डगुर-पान सिय्वल

दाविद्ना कीर्तन (अबिमेलेक राजन मुने दाविदु पिसन मोडि कीता पेजे वोर राजल दाविदुन तंवा मुनेतल वोन पूडि सीता पेजे लिहि कीता कीर्तन आंदु)

1 येहोवा देवन हर वकत्ने दनेवाद वेह्‍चेर मंदंतोन.

नना बस्केट वोन डगुर-पान सीसेर मंदंतोन.

2 येहोवा देवल कीततुन पिय्सि ना आत्मा आनंद येच्चेर मंता.

इदेन केन्चि कमि-पान कीसि मंवलिर कुसि आंतेर.

3 ना बरोबर येहोवा देवना मय्मतुन पचर कीम्ट.

मरट सम्दिर उंदि आसि, वोना पोरोडुन कीर्ति सीकट.

4 नना येहोवा देवन जुल्मा कीतोन.

ते वोर नाकुन जवब सीतोर.

नना वेरिवलिक सम्दोनल वोर नाकुन तपुसीतोर.

5 बगवंतनेके सूड्वलिरकुन मदत पुट्सि आनंद वांता.

वूरङ मोकोम्क बस्केन लजे मायोङ.

6 चुडुर-पांदे मंवना नना येहोवा देवन कोर्नेके वोर केन्ज्तोर.

नाकुन वातङ अव सम्दो तक्लिब्कनल बचि कीतोर.

7 येहोवा देवल तंवा बाव-बक्तिता वेरेते पिस्वलिर सम्दिरकुन,

बचि किय्ले तंवोर दूतन वूर सिर्मुट इरंतोर.

8 येहोवा देवल बच्चोर चोकोट्नोर इंवडुन सवद सूड्सि करि कीम्ट.

येहोवा देवनगा बरोसा इर्सि वोना कोरते सोंवलिर आसिर्वाद येत्वलिर आंतेर.⁺

9 येहोवा देवनुर बक्तलिर्निट! वोना बाव-बक्तिता वेरेते ताकट.

वोन पोरो बाव-बक्तिते ताक्वलिरकुन बततय कमि मनो.

10 ताकद मंवलिक चिहोङ कहि जोकङ करुसानुङ.

बति येहोवा देवनगा बरोसा इर्वलिरकुन बततय कमि मनो.

11 मरि-मियड्निट! मिरट वासि ना गोस्टि केन्जट.

येहोवना बाव-बक्तिता वेरेतुन बारेते करुसंतोन.

12 तंवा जिन्गनितगा सुक-सांत्ने पिस्का इंवल बोरे मंतोर कि?

अनि चोकोट्नङ दिवोस्क सूड्का इंवल बोरे मंतोर कि?

13 अहन बोरे मत्तेके, वोर तंवा वेन्जेर करब वड्क्वक्ने

अनि तंवङ सिव्लिङ कपट वड्क्वक्ने काबाडना.

14 वोर आतोर करबुन सुटि कीसि, चोकोटुन कियना.

अनि सांतितुन मह्‍क्सि, तान पिय्सि ताकना.

15 येहोवा देवना नदुर नियत्नुर पोरो मंता.

वोर वूरङ पार्तनङ केवि सीसि केन्जंतोर.

16 बति करेबलिरकुन वोर पेरे-गेहंतोर.

वूरा हेतु मंवक्ने येहोवा देवल बोमित पोरोडल उसुम्सि वाटंतोर.⁺

17 नियत्नुर पार्तना कीनेके येहोवा देवल केन्जंतोर.

वूरङ सम्दो कस्टल्कनल वूरकुन बचि कींतोर.

18 टूटे माता दिल वालिरकुन येहोवा देवल करुम मंदंतोर.

बेय नारज वाले आत्मा वालिरकुन वोर बचि कींतोर.

19 नियत्नोन वाय्वलिक तक्लिब्क वेलेने मंदंतङ.

अव सम्दोनल येहोवा देवल वोन बचि कींतोर.

20 वोर वोनङ सम्दो बोकन काबाडंतोर.

अवेनल उंदि गिर उरुङो.⁺

21 करेबलिर तम्वङ काम्क्ने नासेडम आंतेर.

नियत्नुर इत्तेके, अर्सि वायुर वूरकुन सिक्सा अरंता.

22 येहोवा देवल, तंवुर सेव्कलिरा परंतुन बचि कींतोर.

तम्वकुन काबाडंतोर इन्जेर तन्गा बरोसा इर्वलिरकुन नुक्सन आया सियोर.