कीर्तना 33

बगवंतना मारियो अद पेर्मा

1 नियत्ने ताक्वलिर्निट! येहोवा देवन कुसिते वारट.

बगवंतन डगुर-पान सिय्वल, नियत्ने ताक्वलिरकुन चोकोट मंदंता.

2 चोंड्कतुन नेकुसेर, येहोवा देवन डगुर-पान सीम्ट.

कर्नाट नेकुसेर वोन दनेवाद वेहट.

3 वोन साटि पूना कीर्तन वारट.

बेय कुसिते जोर्ते नेकुसेर वारट.

4 बारितेके येहोवा देवना वचन नियत्ना आंदु.

वोर किय्वल सम्दो गिर बरोसा इरनल मंता.

5 बगवंतल नियतुन अनि नायमुन पेर्मा कीसेर मंतोर.

येहोवा देवना मारियो अद पेर्मा दर्तुरि पूरो निन्चि मंता.

6 येहोवा देवना वचंतुन हिंदल आगस्क गडे मातङ.

वोना तोड्दा हूकुडुन हिंदल पोड्द, नेलेन्ज अनि सुकुक सम्दो गडे मातङ.

7 सम्दुर्ता पूरो येतुन रासित मोडि कुप्पा वेडिवल वोरे आंदुर.

अनि बेय कोल मंवलिक सम्दुर्क्ना येतुन गोदम्नगा इर्वल वोरे आंदुर.

8 दुनियतुर सम्दिर येहोवा देवना बाव-बक्ति कियना.

जग्दुनियतुर सम्दिर वोन वेरेते मान सियना.

9 बारितेके वोना वचंदे दर्तुरि गडे माता.

वोर आगेते अद गट निल्ता.

10 दुस्रो जातितुरङ सोन्चकुन येहोवा देवल येर्तम कींतोर.

पर्जतङ पिलनकुन वोर कामि सिय्वक कींतोर.

11 बति येहोवा देवनङ पिलन्क बस्केट निल्सि मंदंतङ.

वोनङ उदेस्क पिडिनङ पिडिङ उंदि तीर मंदंतङ.

12 येहोवा देवल तम्वोर पेन आसि मंवल पर्जा

इतेके वोर तंवा जाय्जतुन मोडि नेमि कीतुर वूर पर्जा आसिर्वाद येत्वलिर आंतेर.

13 येहोवा देवल स्वर्गनल बूड सूड्सेर मंतोर.

वोर सम्दिर नरिमन्कलिरकुन सूड्सेर मंतोर.

14 तना मंवल जागतल दर्तुरितुर सम्दिरकुन सूड्सेर मंतोर.

15 वूर सम्दिरङ दिलकुन निव्डि कीतोर आंदुर.

वूरङ सम्दो कामकुन अर्तम किय्वल आंदुर.

16 तनकुन मंवल पेर्सा दलमुन हिंदल बोरे राजल बचे माया परोर.

बोरे सिपायि वेले ताकद मंवडुन हिंदल तपुसा परोर.

17 लडेय कीनेके ताकद मंवल कोडा गिर

नीकुन बचि किया परो.

18 बति येहोवा देवल तन्गा बाव-बक्तिता वेरेते मंवलिरकुन

अनि तंवा मारियो अद पेर्मतुन साटि सूड्वलिरकुन काबाडंतोर.

19 वूरा परंतुन मरंतल बचि कींतोर.

अनि करुता वकत्ने वूरा जीवतुन तावंतोर.

20 अदेन साटि मरट येहोवा देवनेके सूड्सेर मंतट.

वोरे माकुन मदत किय्वल अनि डालदुन मोडि काबाड्वल आंदुर.

21 वोना पवित्रा पोरोडगा मरट बरोसा इर्ततुन हिंदल

माकुन कुसि-आनंद सींतोर.

22 येहोवा देवा! निमे तप्वक डगुक कार्यङ कींति इंवल आसते मंतोम.

नीवा मारियो अद पेर्मा मा पोरो मनि.