चुक-चुके माय्वल अनि मापि तल्क्वल
दाविद्ना कीर्तन.
32
1 बगवंतल बोनङ्ते करेबलिक कामकुन मापि कीसि, अव पापकुन मर्न्गंतोरो, वोर आसिर्वाद येत्वल आंतोर.
2 बगवंतल बोनङ्ते पापकुन वोना लेकते वाटोरो,
वोर आसिर्वाद येत्वल आंतोर.+
3 नना तोड्डि मुह्चि दब मन्जेर,
दिवोस पूरो बेय दुक्सते तल्मेले माततुन हिंदल, ना बोकङ जिगि सेल्वक आतङ.
4 नर्का-पियल, नी केय ना पोरो वजन आसि मत्ता.
इदेन हिंदल येदिगालुम बोमि वत्तपिनय ना मेंदोडुन जिगि सेल्वक आता.
रेला.
5 अस्के, ना पापकुन मकुस्वक्ने, नी मुने वोप्तोन.
अनि नना, “येहोवा देवना चर्नते, ना तपकुन चुक-चुके माका” इन्जेर इत्तोन.
अद गट्कते निमे ना पापकुन मापि कीति.
रेला.
6 अदेन साटि, नीवा दर्सन आय्वल गट्कते,
बक्तलिर सम्दिर नीकुने पार्तना कियना.
बेय निन्चि पोङ्वलिक ऊसङ वातेके गिर बति,
असले वूर्गा येवा परोङ.
7 नना मक्वल जागा निमेये आंदि.
नावा दुक्सतल निमेय काबाडंति.
निमे नाकुन तपुस्ततुन हिंदल नना नीकुन पाटङ वारंतोन.
रेला.
8 येहोवा बगवंतल, “नीकुन सूचना कीसि, निमे बहन ताकनयो बोदा वेहंतोन.
नी पोरो नदुर इर्सि, नीकुन सोन्च वेहंतोन.
9 बुदि-गियन सेले अद कोडतुन सेलेके गादितुन मोडि मिरट मन्मट.
अवेकुन नी करुम तर्ले, लगम सेलेके वारितेन आयि दोहा लागर” इन्जेर इंतोर.
10 करेबलिरकुन वेले दुक्सङ वांतङ.
बति येहोवा देवनगा बरोसा इर्वन पोरो मारियो अद पेर्मा गेर-पासि मंदंता.
11 नियत्नुर्निट! येहोवा देवन हिंदल कुसि-आनंद्ने मंट!
सुद-पांदा दिल वालिर्निट! मिरट सम्दिर कुसिते वारट.