कीर्तना 22

मदतुन साटि पार्तना किय्वल

पाटा वारुस्वन साटि सूचनङ: दाविद्ना कीर्तन.

1 ना बगवंता! ना बगवंता!

निमे नाकुन बारि सुटि कीति? ⁺

नना दुक्सते जोर्ते किलिवडुन केन्ज्वक्ने,

नाकुन बचि किय्वक्ने बारि लङ मंति?

2 ना बगवंता! पियल नना जोर्ते विनंति कीसेर मंतोन.

अनि रात्ना येलते गिर दब मन्जेर सेलोन.

तेर बति निमे नाकुन जवब सीसेर सेल्वि.

3 बति निमे पवित्रा वालेनि अनि कचुरितगा उच्चि मंवनि आंदि.

इज्रयेल लोकुर नीकुने डगुर-पान सींतेर.

4 मा तोत्तुर निह्‍गा बरोसा इर्सि मत्तेर.

अदेन साटि वूरकुन निमे काबाड्ति.

5 वूर नीकुन पार्तना कीता काड्कि, नी केय्दे बचे मातेर.

नी पोरो बरोसा इर्ता काड्कि, वूर लजे माय्मकि.

6 बति नना लोकुरा नदुडे पुडितुन दात्नोना आसि मंतोन.

वूर नाकुन दाबि कीसि इर्सेर कमि-पांदे सूड्सेर मंतेर.

वूर नावा हिजत वोसेर माय्नना लेकते गिर नाकुन येत्मकि.

7 नाकुन सूड्वलिर सम्दिर गिर सिव्लिङ कोय्स-किय्स कीसेर,

तम्वङ तलङ हालि कीसेर नावा हिजत वोंतेर.⁺

8 बहन इत्तेके, “एहे! येहोवा देवन पोरो नीवा वजन तोचुसा.

वोरे नीकुन बचि किया सीम.⁺

वोर नीकुन वेले पसंद कीतेके,

वोरे नीकुन काबाडंतोर” इन्जेर इंतेर.

9 बति नी हिंदले नना अवना पीटेतल जल्मा आतोन.

अवना पाल उंवल गट्कतेने, नी पोरो नाकुन बरोसा पुटुस्ति.

10 नना अवना पीटेते मनेकेडले, निमेय नाकुन आदर आसि मंति.

नावा जल्मा आता अगटल निमेय ना बगवंतनि आसि मंति.

11 अदेन साटि नह्‍गटल लङ मन्मा.

ना पोरो आपति वासि मंता.

नाकुन मदत किय्वल बोरे सेलोर.

12 ना पगा-दार्क कोंदना मंदत मोडि नाकुन गेर-पासि मंतेर.

वूर बासन येरियतङ बोडुमकुन दात डुक्रि कीसेर मंतेर.

13 वूर चीरिवल चिहोत मोडि हंकत कीसेर मंतेर.

नाकुन नोमुर किय्ले वूर तम्वङ तोड्डिङ डक्ने सरिसेर मंतेर.

14 नावा परन वाडि सीता येतुन मोडि आता.

नावङ बोकनङ किल्चङ बह्‍के मातङ.

नावा तडकि येर आसि सोडिता.^*

15 नावा ताकद वोर्ता बुड्डिता बिचत दात कामि सिय्वक आता.

नावा वेन्जेर पोरोडा दव्डतगा चिप्तुंड्ता.

सातोन मोडि निमे नाकुन बूड मींडुसीति.

16 नेय्क्ना मंदतुन मोडि पगा-दार्क ना सिर्मुट मीरे मातेर.

चिहोत दात वूर नावङ केय-कालकुन गायल कीतेर.

17 नावा मेंदोडङ बोकङ नना गिंति कीनल दिसेर मंतङ.

नावा मरन आयना इन्जेर वूर कुसिते सूड्सेर मंतेर.

18 वूर नावङ कप्डिन ईसङ कीसि तूसि,

नावा कमिसुन येत्ले, चिटिङ वाट्सेर मंतेर.⁺

19 बति ना येहोवा देवा! नाकुन मरुङ्सि लङ मन्मा.

निमेय नाकुन ताकद सिय्वनि आता काड्कि,

नाकुन वेय्ने मदत कीम.

20 तल्वर्ते ना परन सोंवक काबाडा.

नेयकुन मोडितुर्गटल नावा जीवतुन तावा.

21 चिहोत मोडितुर्गटल नाकुन बचि कीम.

केडा कोंदनङ सींकुन मोडितुर्गटल नाकुन काबाड्सि जवब सीति.

22 नी पोरोलदुन बारेते,

नावुर तादल-तमुकुन पचर कीसि वेहंतोन.

मीरे मासि मंवलिर सम्दिर मुने नीकुन डगुर-पान सीसेर,

कीर्तन्क वारंतोन.⁺

23 येहोवा देवना बाव-बक्तिता वेरेते पिस्वलिर्निट!

वोन डगुर-पान सीम्ट!

याकोब्ना संतांदुर्निट! मिरट सम्दिर वोन मान सीम्ट.

इज्रयेल्ता संतांदुर्निट! मिरट सम्दिर वोन वेरियट.

24 बारितेके वोर, दुक्सते मंवलिरकुन कमि-पांदे सूड्मकि.

गरिबकुन सूड्सि वोर लजे माय्मकि.

अनि वूर्गटल वोर तंवा मोकोम पेरे-गेह्‍मकि.

बति वूर मदतुन साटि आड्सेर कीता अद विनंतितुन वोर केन्ज्तोर.

25 नी पर्जता पेर्सा गुब्डत मुने, नी बारेते कीर्तन वारंतोन.

नीवा बाव-बक्तिता वेरेते मंवलिर मुने नावङ मोक कंडि कींतोन.

26 गरिब-पांदे मंवलिर पेटिमेन जेवुन कींतेर.

येहोवा देवन मह्‍क्वलिर वोन डगुर-पान सींतेर.

वूरङ दिल्क्नगा बस्केट कुसि-आनंद्ने पिसंतेर.

27 दर्तुरित पोरोडुर सम्दिर, येहोवा देवन हेतु कीसि,

वोना बाज तिरियंतेर.

हर जातितुर वोने पार्तना-विंति कींतेर.

28 बारितेके, राज ताकुस्वल येहोवा देवले आंदुर.

हर जातितुर पोरो राज ताकुस्वल वोरे आंदुर.

29 दर्तुरित पोरोडुर दनेवंतलिर तिन्जेर-उन्जेर वोने काल-करंतेर.

तम्वङ परन्क काबाडा परुर वूर,

इतेके सासि तोडितगा तोडि आय्वलिर सम्दिर,

वोना चर्नते मुर-टोङ्रङ कोटंतेर.

30 मावुर मरि-मियड वोना सेवा कींतेर.

वाय्वलिक पिडिनुरकुन पर्बुन बारेते वेह्‍वल जर्गंता.

31 वूर वासि, वोना नियतुन बारेते, बविसत्ने जल्मा आय्वलिरकुन

“वोर तंवा पर्जतुन बचि कीतोर” इन्जेर वेहंतेर.