कीर्तना 21

राजा-पांदुन बारेते डगुर-पान सीसेर वार्वल कीर्तन

पाटा वारुस्वन साटि सूचनङ: दाविद्ना कीर्तन.

1 ये येहोवा देवा! नीवा ताकद वेर राजन आनंद सीसेर मंता.

निमे बचि कीततुन पिय्सि वोर बेय कुसिते मंतोर.

2 वोना दिल्ता आसतुन निमे पूरि कीसेर मंति.

वोनङ सिव्लिनल वाता पार्तनतुन सदा वोप्सेर मंति.

रेला.

3 वेले चोकोट्नङ आसिर्वाद्क्ने निमे वोन आद्वा सोन्जेर मंति.

वोना तलद पोरो पिवर सोनेता किरिट केरुसीति.

4 वेले जेल पिस्ले वरम वोर तल्क्तोर ते,

निमे बस्केट जीवते मंवल अद वरम वोन सीति.

5 निमे बचि कीततुन हिंदल वोना कीर्ति बडे माता.

निमे वोन मान-मर्यदा अनि डगुर-पोरोल सीति.

6 बस्केट मंवलिक आसिर्वाद्क निमे वोन सीति.

नीवा चर्नते वोन वेले आनंद सीसेर मंति.

7 बहन इतेके राजल, येहोवा देवन पोरो बरोसा इर्सि मंतोर.

सम्दोत पोरो मंवल देवल तंवा मारियो अद पेर्मते,

हाले माय्वक वोर राजन गट निपुसंतोर.

8 नी केय्दे नीवुर सम्दिर पगा-दारकुन साप्डि कींति.

नीवा तिना केय्दे नीकुन मेचुर वूरकुन पासि अरुसंति.

9 निमे पावे माता पेजे, वूरकुन गुंडम्नगा वाटंति.

येहोवा देवल तंवा सोङ्ने वूरकुन मूरि कींतोर.

अनि तड्मि वूरकुन डुंडुसि वाटंता.

10 दर्तुरित पोरो मंवक्ने वूरा संतांदुन नासेडम कींति.

पर्जत नड्डुमनल वूरा संतान मंवक्ने मूरे मासि दांता.

11 वूर नीकुन नुक्सन कियना इन्जेर कपट्नङ पिलन्क वाड्तेर.

बति अवेनगा वूर साक्सेय आया पर्मकि.

12 निमे वूरकुन पाय्ले बान कोलङ मोप किय्वल सूड्सि,

वूर पेजे मल्सि पिटेडम वितंतेर.

13 ये येहोवा देवा! नीवा ताकदुन पिय्सि,

नीकुन डगुर-पान वानल कीम!

नीवा ताकदुन सूड्सि ममोट पाटा वार्सेर,

नीकुन डगुर-पान सींतोम.