नियत्नोर माय्नना पार्तना
दाविद्ना पार्तना.
17
1 ये येहोवा देवा! नना नायम्ने कोर्वडुन केन्जा. मदतुन साटि नना जोर्ते किलिवडुन दिहंते केन्जा.
ना पार्तना कपट्नङ सिव्लिनल वाता आयो.
अदेन साटि तान केवि सीसि केन्जा.
2 निमे नाय्दे सूड्वनि आता काड्कि,
नाकुन नियत्नोर आंदुर इन्जेर निमेय निर्नय कीकि.
3 निमे रात्ना येलते नावा दिलतुन दिहंते सूड्सि परिक्सा कीति.
ना रोपो नीकुन बदे करब्ना सोन्च दिस्मकि.
नावा तोड्दे गिर बदे गल्ति किय्वा इन्जेर निर्नय कीतोन.
4 नना नीवङ गोस्टिन पिय्सि ताक्तोन.
अव नाकुन आड्मुट वालिरङ काम्कनल तपुसा पर्तङ.
5 नीवा सरि-मारग्नगा नावङ दापिङ हाले माय्वक वाड्तोन.
अदेनल नना बस्केन बह्के माय्मकि.
6 ये बगवंता, नना नीकुन बेय जोर्ते पार्तना कीतोन.
बारितेके निमे नाकुन जवब सींति.
नह्के केवि सीसि, नावङ गोस्टिङ केन्जा.
7 नीवा मारियो अद पेर्मतुन नाकुन तोहा.
नीवा चर्ना पिय्तुरकुन वूरुर पगा-दार्कनल काबाडंति.
8 वोरोर तंवङ कडकुन काबाड्तपिनय नाकुन काबाडा.
नीवङ मारेलकुन बूड नाकुन मकुसा.+
9 ना पोरो मुच्लि अर्वलिर करेबलिर्गटल नाकुन काबाडा.
ना सिर्मुट मंवलिर पगा-दार्क्ना केय्दल नावा जीवतुन तावा.
10 वूरङ दिल्क दया सेल्वक आसि मंतङ.
वूरङ तोड्डिङ गर्वते वड्कंतङ.
11 नावङ* कोजिन वोड्के मासि,
वूर नाकुन गेर-पासि मंतेर.
वूर नाकुन बूड अरुसना इन्जेर डाव पोसेर मंतेर.
12 वूर नाकुन चीरि किय्ले लह्कि वर्वल चिहोत मोडि मंतेर.
अनि मुच्लि अर्ले मक्सि मंवल जवन चिहोत मोडि मंतेर.
13 ये येहोवा देवा तेदा! वूरकुन अड्डम आसि बूड अरुसा.
नीवा तल्वर्ते करेबलिरा केय्दल नाकुन बचि कीम.
14 ये येहोवा देवा! वूर आतुरा केय्दल
नीवा ताकद्ने नाकुन बचि कीम.
बति निमे चोकोट्ना कानेते वूरङ पेटिङ निहंति.
वेलेटिर मरि-मियडुन मिय्सि वूर आनंद्ने मंदंतेर.
वूर तम्वा जाय्जतुन तम्वा मरि-मियडुन साटि सुटि कींतेर.
15 बति ननते नियत्नोना आसि, नीवा मोकोम सूडंतोन.
नाकुन चेव वाता पेजे, नीकुन मुकबिलि सूड्सि,
नावा मंदा आसतुन पूरि कींतोन.