बगवंतल सीतङ आसिर्वादकुन पिय्सि दाविद डगुर-पान सिय्वल
दाविद्ना कीर्तन. इदेन मिक्तम* इन्जेर केयंतेर.
16
1 ये बगवंता! नीवा कोरते वासि मंतोन. नावा जीवतुन राकि कीम.
2 नना येहोवा देवन सङा, “निमेय ना पर्बुनि आंदि.
नी बीगर नाकुन सुक-सांत्ना आदर बतय सेले”
इन्जेर वेहंतोन.
3 इद देस्नगा मंवलिर बक्तलिर वेले मान-पान येत्वलिर आंदिर.
वूर सङा मंवल नाकुन वेले आनंद सींता.
4 येहोवा देवन आय्वा, दुस्रोक पेन्क्ना पूजा किय्वलिरकुन वेले दुक्सङ वांतङ.
वूर सिय्वलिक बलिदान्क अनि अर्पनङ नना सियोन.
वूरङ पेन्क्नङ पोरोल्क गिर ना तोड्दे पल्कोन.
5 येहोवा देवा, निमेय ना ईसति आंदि.
अनि नाकुन पह्जे मत्ता अद सम्दोतुन सींति.
निमेये ना ईसतुन काबाड्वनि आंदि.+
6 बेय सोबतङ जागनगा नाकुन ईसा पुट्ता.
करलेन अद बेय सोबता ईसा आंद.
7 नाकुन सूचना वेह्वल येहोवा देवन डगुर-पान सींतोन.
रात्ना येलते गिर नावा मन-दिल गियंतङ सूचनङ सींता.
8 बगवंतल बस्केट गिर ना सङन
मंतोर इंवल नाकुन टावा.
वोर ना करुम मंवडुन हिंदल,
नाकुन बतय हालि कियो.
9 अदेन साटि नावा दिल आनंद्ने अनि आत्मा बेय कुसि-गमत्ने निन्चि मंता.
नावा मेंदोल सुक-सांत्ने मंता.
10 बारितेके, निमे नावा आत्मतुन साना लोकम्नगा सुटि किय्वि.
नीवोर पवित्रवंतना मेंदोडुन वीच्नगा कडिया सिय्वि.+
11 बति नाकुन जीवता सरि-मारग्ने ताकुसंति.
नीवा चर्नते नाकुन बर्पुर आनंद सींति.
नीवा तिना बग्ला नाकुन बस्केट सुक-सांति पुटंता.+