कीर्तना 18

बगवंतल तनकुन बचि कीता काड्कि, दाविद डगुर-पान सिय्वल

पाटा वारुस्वन साटि सूचनङ: येहोवा देवनोर सेव्कल आय्वल दाविद्ना कीर्तन. येहोवा देवल तंवुर पगा-दार्क्ना केय्दल अनि सव्लुना केय्दल बचि कीतोर अस्के, वोर इद कीर्तंतुन बगवंतन साटि वार्तोर.⁺

1 येहोवा देवा! निमेय नावा ताकद आंदि.

नीकुने नना पेर्मा कीसेर मंतोन.

2 येहोवा देवले डङल बंडतुन मोडि नाकुन काबाड्वल आंदुर.

वोरे नाकुन बचि किय्वल किला आंदुर.

नाकुन काबाड्वल कवच्ना सक्ति वोरे आंदुर.

वोरे नाकुन बचि किय्वल आंदुर.

अनि वोर बगवंतले नाकुन हाले माय्वक इर्वल आदर बंडत मोडि मंतोर.

3 येहोवा देवले डगुर-पान येतनल मंतोर.

नाकुन मदत कीम इन्जेर आड्सेर कोर्नेके,

वोरे दुस्मन-दार्क्ना केय्दल नाकुन बचि कींतोर.

4 जीवा येत्वलिक पासङ ना सिर्मुट मंतङ.

बय्मन-दार्क नासेडम किय्वल ऊसतङ हेल्वन मोडि^* ना पोरो मुच्लि अर्तेर.

5 अव पासङ नह्‍गा गूंडे मातङ

अनि मरन नाकुन मिङ्ले सूड्सेर मंता.

6 ईतङ तक्लिब्नगा मनेके येहोवा देवन हेतु कीतोन.

ना बगवंतन पार्तना कीतोन.

वोर तंवा पवित्रा जागतल^* ना पार्तनतुन केन्चि वोप्तोर.

इद नावा विनंति वोना चर्नते येव्ता.

7 अस्के बूकंप वासि बोमि तरतरा मेलिता.

डङलिक गुटनङ बुनदिङ हाले मातङ.

वोना सोङुन हिंदल अव हाले मातङ.

8 वोनङ मोसोर बोङ्डनल पोया पेसिता.

वोना तोड्दल तड्मि गोकङ अनि जार वासि डुंडुस्ता.

9 हाबडङ टेपन पाकि कीसि वोर वातोर.

वोनङ कालकुन बूड कह्‍चर सिकटि मत्ता.

10 वोर मारेल्क मंवल दूतन^* पोरो उच्चि,

वडिदे परिसेर गंदडुन मोडि सप्ने रेय्तोर.

11 पाङुडुन मोडि पोंड्ले वोर सिकटितुन वाप्रि कीतोर.

येते निन्चि मंवलिक आगस्नङ कारि टेपङ डेरत मोडि वोन गेर-पातङ.

12 वोना चर्नता वेड्चितल कारि टेपङ वातङ.

अवेनल गार-बंडङ अनि तड्मि गोकङ अर्तङ.

13 अहन अव अर्नेके येहोवा बगवंतल हाबडगा किलंडि वाड्तोर.

वोर सर्वा सक्ति वालेना लेङ गर्ज्वडुन मोडि^* मत्ता.

14 वोर तंवङ बान कोलङ पासि दुस्मन-दारकुन रीक्सि वाड्तोर.

मिड्च्वल पिड्ग अरुसि वूरकुन हारि कीतोर.

15 येहोवा देवा, निमे जोर्ते दम्कि सीनेके,

मोसोर बोङ्डनल बह्‍रि वाता अद हूकुडे सम्दुर्ता अड्ग दिस्ता.

अनि बोमितङ बुनदिङ बह्‍रि अर्तङ.

16 बगवंतल पोरोडल तंवा केय चह्‍चि, नाकुन आन्ज्तोर.

अनि अद कोल येतल नाकुन बह्‍रि तेंड्तोर.

17 ताकद वालिर ना दुस्मन-दार्कनल नाकुन बचि कीतोर.

वूरा केय्दल नाकुन तपुस्तोर.

18 नना आपतितगा मनेके वूर माय्नलिर ना पोरो मुच्लि अर्तेर.

बति येहोवा देवल नाकुन काबाड्तोर.

19 नना इत्तेके वोन पसंद मत्ता काड्कि,

नाकुन काबाड्ले पय्स जागतगा वोतोर.

20 नना नियत्ने ताक्ता काड्कि, येहोवा देवल नाकुन पंडि सीतोर.

इत्तेके नना बे-कसुर ताक्ता काड्कि, वोर नाकुन जवब सीतोर.

21 बारितेके येहोवा देवनङ सरिनगा नना ताक्सेर मंतोन.

ना बगवंतन नना उल्टा तिरिवना आयोन.

22 वोनङ नियमकुन वोड्के मासि ताक्सेर मंतोन.

वोनङ हुकुमकुन नना उल्टा ताक्वना आयोन.

23 वोना नदुडे बे-कसुर वालेना आसि ताक्सेर मंतोन.

पाप्नङ काम्क किय्वना आयोन.

24 येहोवा देवल नना नियत्ने ताक्वडुन सूड्सि,

नाकुन चोकोट्ना पंडि सीतोर.

25 दया तोह्‍वलिर पोरो निमे दया तोहंति.

नियत्नुरकुन बे-कसुर वालेना इन्जेर तोहंति.

26 सुदुड-पांदे ताक्वलिरकुन नीवा सुदुड-पांदुन तोहंति.

बति करब-पांदे ताक्वलिरकुन पेरे-गेहंति.

27 दुक्सा बोगे मासि, चुडुर-पान किय्वलिरकुन निमे बचि कींति.

बति गर्वते ताक्वलिरकुन निमे दाबि कीसि वाटंति.

28 येहोवा देवा, ना बगवंता! करलेन ना डिवेतुन निरुस्वनि आंदि.

अनि करलेन ना सिर्मुट्ना सिकटितुन पूड्वनि आंदि.

29 बगवंता! नीवा मदतुन हिंदल दुस्मन-दार्क्ना दलमुन मेया परंतोन.

नीवा मदतुन हिंदल डङलिक गोडन डेय्सि वीडा परंतोन.

30 बगवंतनङ सरिङ नियत्नङ आंदुङ.

येहोवा देवनङ गोस्टिङ सतेम्नङ आंदुङ.

वोन्गा बरोसा इर्सि ताक्तुरकुन डालदुन मोडि काबाडंतोर.

31 येहोवा देवल तपुसि दुस्रोर बोर बगवंतल मंतोर?

पेर्सा बंडतुन मोडि माकुन काबाड्वन तपुसि दुस्रोर बोर मंतोर?

32 नाकुन ताकद सिय्वल वोर बगवंतले आंदुर.

नाकुन बे-कसुर वाले सर्दे ताकुस्वल वोरे आंदुर.

33 डङलिक जागनगा सोत्तेके गिर नावङ काल्क गसुर्वक्ने,

कुर्सुन मोडि वित्ले मदत किय्वल वोरे आंदुर.⁺

34 नना लडेय किय्ले नाकुन सिक्सन करुस्वल वोरे आंदुर.

पितुडा बांदुन गिर वाप्रि कीनल वोरे नाकुन ताकद सीतोर.

35 येहोवा देवा! निमे नाकुन काबाड्सि, बचि कींति.

नीवा तिना केय्दा ताकद नाकुन सात सींता.

नीवा चुडुर-पांदुन हिंदल नाकुन डगुर-पान सींति.

36 नावङ दापिङ वाटनल नावा सरदुन पय्स कींति.

इदेन हिंदल नावङ काल्क गसुर्कोङ.

37 ना दुस्मन-दारकुन नना पीचा पिय्तोन.

वूरकुन नासेडम कीनल वेरि नना पेजे मल्सि वाय्मकि.

38 वूरकुन नना पासि हारि कीतोन.

अस्के वूर तेदा वाय्वक ना कालकुन बूड अर्तेर.

39 लडेय कियन साटि निम नाकुन ताकद सीति.

ना पोरो उल्टा तेद्वलिरकुन नावङ काल्क्नगा मुर-टोङ्रङ कोटनल कीति.

40 ना दुस्मन-दार्क पेजे मल्सि परर आनल कीति.

नाकुन बिकट्ने सूड्वलिरकुन मूरि कीतोन.

41 मदतुन साटि जोर्ते किलितेर बति,

वूरकुन मदत किय्ले बोरे मुने वाय्मकि.

येहोवा देवन गिर वूर पार्तना कीतेर बति,

वोर गिर वूरकुन जवब सिय्मकि.

42 अस्के वूरकुन नुजा नुजा कीसि,

वडिदे तेद्वल डुर्डत मोडि वाडि सीतोन.

अनि बाजर्क्नगा मंवल चिक्लतुन मोडि वूरकुन जार्सि हारि कीतोन.

43 उल्टा तेद्वल पर्जता केय्दल नाकुन बचि कीति.

अनि दुस्रोक जातिन पोरो अदिकारिन मोडि निपुसीति.

टावा सेलुर वूर गिर, इंके नावा सेवा कीसेर मंतेर.

44 ना गोस्टि वूरकुन केन्जा वानेकेने, अदेन पिय्सि ताकंतेर.

दुस्रोक देस्क्नुर नाकुन वेरिसि दंडोस दोसंतेर.

45 बहन इत्तेके वूरा तडकि पूरो येर आंता.

इदेन हिंदल वूर तम्वङ किलनल तरतरा आसेर बह्‍रि वांतेर.

46 येहोवा देवल जीवतेन मंतोर!

नाकुन आदर बंडत मोडि मंवन डगुर-पान वायि.

नाकुन बचि किय्वल वेर बगवंतना पोरोले बडे मायि.

47 ना बद्लि पगा येत्वल वेर बगवंतले आंदुर.

ना अदिकारदुन बूड पर्जा मनल कींतोर.

48 अनि वोरे दुस्मन-दार्क्ना केय्दल नाकुन सुटि कियुस्तोर.

येहोवा देवा! उल्टा तेद्वलिरा केय अंदो अचोर पोरो नाकुन इरंति.

आड्मुट वालिरा केय्दल नाकुन काबाडंति.

49 अदेन साटि येहोवा देवा दुस्रोक जातिन मुने,

नना नीकुन डगुर-पान सींतोन.

अनि नी पोरोडे कीर्तन वारंतोन.⁺

50 निमे नेमि कीति वोर राजन मेयुस्वनि आंदि.

दाविद राजन अनि वोना संतांदुन,

मारियो अद पेर्मते सूड्वनि आंदि.