कीर्तना 5

सक्रेन तेच्चि अद दिवोसुन साटि बगवंतन पार्तना किय्वल

पाटा वारुस्वन साटि सूचनङ: दाविद्ना कीर्तन.

1 येहोवा देवा, नावङ गोस्टिङ केन्जा.

नना नीकुन वेह्‍वडुन दिहन कीम.

2 ना राजा, ना बगवंता! नना दुक्सते किय्वल विनंति केन्जा.

नीकुने पार्तना कीसेर मंतोन.

3 येहोवा देवा, सक्रेन नावा लेङ नीकुन केन्जा वांता.

पोड्द पेसिनेके नी चर्नते विनंतितुन इर्सि,

जवबुन साटि सूड्सेर मंदंतोन.

4 बारितेके निमे करबुन सूड्सि, कुसि आय्वल बगवंतनि आय्वि.

करेबलिर मंले निह्‍गा जागय सेले.

5 पोक्डा किय्वलिर नी चर्नते निला परुर.

पाप्नङ काम्क किय्वलिर करेबलिरकुन निमे मेच्वि.

6 लबड वड्क्वलिरकुन निमे मूरि कींति.

कपट्ने, जीवङ येत्वलिरकुन येहोवा देवल मेचोर.

7 बति ननते, नीवा मारियो अद पेर्मतुन हिंदल नी रोतगा नेङा परंतोन.

नी पोरो बाव-बक्ति इर्सि, नी पवित्रा जागेतेके सूड्सि, काल्क करंतोन.

8 येहोवा देवा, नाकुन वेले दुस्मन-दार्क मंतेर.

अदेन साटि नना नी नाय्दा सर्दे ताकनल कीम.

ना मुने नी सरदुन तात्कर तोहा.

9 वूरा तोड्दल उंदि गिर नियत्ना गोस्टि वायो.

वूर सिरिप दुस्रुरकुन नासेडम किय्ले सूडंतेर.⁺

वूरङ गोस्टिङ, तेरितङ वीच्क्ना गाडित मोडि मंदंतङ.

अनि वूर कपट्ने तम्वा वेन्जेडे गोड गोड वड्कंतेर.

10 बगवंता, वूर नीकुन मर्ला बड्सेर मंतेर.

वूरकुन तस्वा कीसि सिक्सा कीम.

वूर तम्वङ सोन्च्क्नगा गूते मासि अरिर.

वूर कीतङ पापकुन हिंदल वूरकुन पेसुसि पूडा.

11 बति नी चर्ना पिय्वलिर कुसिते मंदंतेर.

वूरकुन निमेय काबाड्ता काड्कि,

नीकुन पेर्मा किय्वलिर वूर बस्केट आनंद्ने मंदंतेर.

12 येहोवा देवा, नियत्नुरकुन आसिर्वाद सिय्वनि आंदि.

कवच्ने मुचुस्तप, निमे वूरकुन दयते मुचंति.