मदतुन साटि पोद्रेक किय्वल पार्तना
पाटा वारुस्वन साटि सूचनङ: वारिते मंवल कर्नट्ने वार्वल दाविद्ना कीर्तन.
4
1 ना नियतुन आदर आय्वल बगवंता! नना पार्तना कीनेके, नाकुन जवब सीम.
नना संकट्ने मनेके, नाकुन मदत किय्वनि.
ना पोरो दया तोह्चि, ना पार्तनतुन केन्जा.
2 नरिमन्कलिर्निट! बचेजेल नावा मांदा हिजत वोंतिट?
बचेजेल आगय वालेकुन पेर्मा कींतिट?
बचेजेल लबड वालेकुन मह्कंतिट?
रेला.
3 येहोवा देवल, बरोसते मंवलिरकुन तंवा साटि अलग कीतोर इन्जेर करि कीम्ट.
नना येहोवा देवन पार्तना कीनेके, वोर केन्जंतोर.
4 मोका मीकुन सोङ वातेके,
अद सोङ मीकुन पाप्नेके ऊम्वक्ने सूडट.*
अनि मीवङ बीडरकुन पोरो मनेके,
मीवा दिलतगा द्यान कीसेर सांतिते मंट.
रेला. +
5 बरोबर दिल्ते सिय्वलिक अर्पनङ सीसेर,
येहोवा देवन पोरो बरोसा इरट.
6 “मा पोरो बोर दया तोहनुर?” इन्जेर वेलेटिर इंतेर.
येहोवा देवा! नीवा मोकोम्ना वेड्चि मा पोरो पारनल कीम.
7 बर्पुर पंड्ता पंटतल अनि आङुर्क्ना रसतल पुट्वल आनंदुन तेर,
निमे ना दिलतगा बेय वेले आनंद सीति.
8 नना मींड्सि, आरम्ने नर्मंतोन.
येहोवा देवा! नी हिंदले नना सुक-सांत्ने पिसेर मंतोन.