एस्तेर 9

यूदुल्क मेय्वल

1 राजल चिटितगा आगे सीता तीर जर्ग्वल वकत, आदर इंवल बारवा (12) महिनता तेरवा (13) दिनम वाता. ते अद नेटि यूदुलकुन हारि कियना इन्जि पगा-दार्क आसा कीतेर बति, अद पूरो उल्टा आता. अंटित यूदुल्के तम्वुर पगा-दारकुन मेय्तेर. 2 अहसुरोस राजल राज ताकुस्वलिक येरियनङ सम्दो नगुक्नगा तमकुन जक्सि मूरि कीकोम इंवलिरकुन मूरि किय्ले यूदुल्क मीरे मातेर. इदेन हिंदल दुस्रो सम्दो पर्जतुन दड्कि पिय्ता काड्कि, बूरे गिर वूर मुने मुकबिलि निला पर्मकि. 3 मोर्देकय्दा वेरेतुन हिंदल, अद राज्नङ कहि येरियन मीरे कीसि वोरोर मंवलिर डगुक अदिकारिर, येरियनुर गवर्नर्क, मंत्रिर अनि राजनुर अदिकारिर सम्दिर गिर यूदुलकुन मदत कीतेर. 4 राजना कचुरितगा मंवलिर सम्दिर्गटल मोर्देकय मुके अदिकारि आतोर. अद पूरो राज्नङ येरियनगा मोर्देकय्दा डगुर-पान अनि पोरोल पग्रे माता.

5 ते यूदुल्क तम्वुर पगा-दार्क्ना परन येतन साटि तल्वर्क वाप्रि कीतेर. तमकुन पसंद किय्मकि वूरकुन तम्वा मंदे वाता तीर कीतेर. 6 वूर यूदुल्क राजा महल मंवल सूसन नगुडगा सियुङ नुह्‍क (500) मांदिता परन येत्तेर. 7-10 वीरे आय्वा तम्वोर पगा-दारल आय्वल हमेदात्नोर मरि हामंतुर दहा (10) मर्क्ना गिर परन येत्तेर. वूरङ पोरोल्क: पर्संदाता, दल्पोन, अस्पता, पोरता, अदलया, अरिदाता, परमस्ता, अरिसय, अरिदय अनि वय्जाता. यूदुल्क वीरा परन येत्तेर बति, वूरा दन-दव्लतुन मात्रम लूटि किय्मकि.

11 अद सूसन नगुडगा सातुरा लेकतुन अंटित्के राजल करि कीतोर. 12 अनि एस्तेर रानिन सङा, “यूदुल्क, सिरिप सूसन नगुडगने सियुङ नुह्‍क (500) मांदितुने आय्वा, हामंतुर दहा जन्क (10) मर्क्ना गिर परन येत्तेर. ते राज्नगा मंवलिक मेय्तङ येरियनगा उंडे बचोर-बहन कीतेरेय टावा सेले? बति उंडे निमे बतल कोर्का इंति? निमे कोर्ता तीर जर्गुसंतोन” इन्जेर वेह्‍तोर.

13 ते एस्तेर, “राजल चिटितगा आगे सीता तीर नेंड कीता अद राजन पसंद वासि मत्तेके, नाडि गिर यूदुल्क्ना केय्दे अह्‍ने किया सीम. अनि सूसन नगुडगा हामंतुर दहा (10) जन्क मर्क्नङ कूरकुन यूदुल्क्ना केय्दे मरता मोद्नगा सर्पासा वाटा सीम” इन्जेर कोर्ता.

14 ते राजल अह्‍ने कीम्ट इन्जेर आगे सीतोर. अद आगे सूसन नगुडे डव्न्डि पायुस्वल जर्ग्ता. अनि हामंतुर दहा जन्क मर्क्नङ कूरकुन डङल मोद्नगा सर्पासा वाट्वल जर्ग्ता. 15 अद आदर महिनता चोव्दा (14) तारिकुन नेटि गिर सूसन नगुडगा यूदुल्क मीरे मासि, उंडे मूंद नुह्‍क (300) मांदिता परन येत्तेर बति, वूरा दन-दव्लतुन लूटि किय्मकि.

16 अद तीर्दे राज्नङ दुस्रोक येरियनगा मत्तुर वूर यूदुल्क गिर तम्वङ जीवङ दकुसन साटि उंदि जागा मीरे मातेर. अनि तम्वुर पगा-दार्क आय्वलिर सत्तर सियुङ हजर्क (75,000) मांदिता परन येत्तेर बति, वूरा दन-दव्लतुन लूटि किय्मकि. 17 इद गट्ना आदर महिनता तेरा (13) तारिकुन नेटि जर्ग्ता. अनि तेलरि चोव्दा (14) तारिकुन नेटि सुटि येच्चि, वेले आनंद्ने दावत्क कीतेर.

पूरिम इंवल सड

18 अद सूसन इंवल नगुडेर यूदुल्क, आदर इंवल महिनता तेरा अनि चोव्दा (13–14) तारिक्नगा मीरे मासि राजना आगे तीर जर्गुस्तेर. अनि पंद्रा (15) तारिकुन नेटि आरम येच्चि, वेले आनंद्ने दावत्क कीतेर. 19 अह्‍ने चुडुक चहर्क्नगा मंवलिर यूदुल्क गिर आदर इंवल महिनता चोव्दा (14) तारिकुन नेटि आनंद्ने दावत्क कीसि तिंवल सुरु कीतेर. इद वेले चोकोट्ना दिवोस इन्जेर वोरोन वोरोर इनम्क सिय्वल सुरु कीतेर.

20 अस्के मोर्देकय, जर्ग्तङ अव गट्नन बारेते लिहि कियुस्तोर. अनि अहसुरोस राजल राज ताकुस्वलिक सम्दो येरियनगा इत्तेके करुम मंवलिके आयि, लक मंवलिके आयि सम्दो येरियनुर यूदुलकुन चिटिङ रोह्‍तोर. 21-22 अव चिटिनगा बतल मत्ता इत्तेके, यूदुल्क तम्वुर पगा-दार्क सिय्वल दुक्सतल बचे मासि, सांति वातङ दिवोस्क इन्जेर, दुक्सा कमि आसि आनंद वाता महिना इन्जेर, वूरा आड्सेर मंवल रोके माता अद चोकोट्ना दिवोस इन्जेर, हर साल आदर इंवल महिनता चोव्दा अनि पंद्रा (14–15) तारिकुन नेटि इद सड जर्गुसना. अह्‍ने सड तुङ्सेर आनंद्ने वोरोन वोरोर काने सियना अनि जुरत मंवलिरकुन इनम्क सियना इन्जेर अव दिवोसकुन टरि कीतोर.

23 ते मोर्देकय चिटितगा लिहि कियुसीतङ अवेन यूदुल्क कीसेर मंले वोप्तेर.

24 अगागि कांदांतोर हमेदात्नोर मरि हामन, यूदुल्क्नोर पगा-दारल आंदुर. वोर मोदोल यूदुल्क सम्दिरकुन जक्सि मूरि कियना इन्जेर पिलन टरि कीसि चिटिङ वाटुसि मत्तोर. अहन चिटिङ वाट्वडुन ‘पूर्’ इंदिर. 25 बति बस्केते एस्तेर, राजना महलतगा सोत्तयो, अस्के यूदुलकुन पोरो हामन अव चिटिनगा वाट्ता करब्ना पिलन, वोनय तलत पोरो वानल कीता. वोन अनि वोनुर मरकुन मरता मोदुन पोरो सर्पासता सिक्सा वाट्ले राजल आगे सिय्वल जर्ग्ता.

26-27 अहन लिहि कीतङ सम्दो आगेन पिय्सि, यूदुल्क इद सडदुन जर्पुसियना इन्जेर मोर्देकय वेह्‍तोर. ते यूदुल्क अव दिवोसकुन, “पूर” इंवलिक चिटिना पोरोडुन पिय्सि, “पूरिम” इन्जेर अद सडदुन जर्पुसींतेर. बारितेके अगा लिहि किय्वलिकुन पिय्सि, तम्वकुन जर्ग्ता अदेन पिय्सि, यूदुल्क, “हर साल अद महिनतङ अव रंड दिवोसकुन नेटि अद सडदुन जर्पुसींतोम” इन्जेर निर्नय कीतेर. 28 अनि, “इद पूरिम सड जर्पुस्वलिक दिवोस्क्नगा मा यूदुल्क्ना हर कुटुंबतुर, हर येरियतगा अनि हर चहरतगा जर्पुस्वेकेन आयि, तम्वा संतांदुर अवेन बारेते मरुङ्तेकेन आयि, इदेना जिमा मा पोरो अनि मावा संतांदुन पोरो मंदंता” इन्जेर गिर निर्नय कीतेर.

29 अस्के अबिहायिल्ता मियड एस्तेर रानि इद पूरिम सड इङेडल जर्पुसेर मंदना इंवडुन तोह्‍ले, यूदा जातितोर मोर्देकय मीरे मासि उंडे उंदि चिटि लिहि कीतेर. 30-31 इद तीर्दे वोर मोर्देकय, इव चिटिन अहसुरोस महा राजना राज्नगा मंवलिक नूटा वीसा येडुङ (127) येरियनगा मंवलिर, सम्दिर यूदुल्क्नगा रोह्‍तोर. वोर मोर्देकय इदेनगा पर्जा सम्दिर सुक अनि सांतिते मंदना इन्जेर कोर्तोर. यूदुल्क सम्दिर इद सडदुन बस्के तुङना, बस्के उपस पियना, बस्के दुक्सते मंदना इंवलिक गोस्टिङ हेतु इर्सि तुङना इन्जेर एस्तेर रानि अनि मोर्देकय लिहि कियुस्तेर. 32 इद तीर्दे एस्तेर रानि सीता आगे तीर इद पूरिमुन बारेते राज्नगा जर्ग्वलिक गट्नन लिहि कीसि इर्वल ग्रंत्नगा लिहि किय्वल जर्ग्ता.