एस्तेर 8

यूदुलकुन राजल मदत किय्वल

1 अद नेटिने अहसुरोस राजल, यूदुल्क्नोर पगा-दारल आय्वल हामंता जाय्जतुन एस्तेर रानिन सीतोर. ते एस्तेर मोर्देकय तनकुन लाग्तोर चुटम आंदुर इन्जेर राजन वेह्‍ता. अस्के वोर मोर्देकय राजन मुने वातोर. 2 ते महा राजल तना सीसि मत्ता अद तंवा मुदतुन हामंतल मल्सि येच्चि मत्तोर. अनि सम्दिर्गटल डगुर अदिकारि आंदुर इन्जेर तोह्‍ले अद मुदतुन मोर्देकयदुन सीतोर. एस्तेर, हामंता रोतुन पोरो मोर्देकयदुन अदिकारि इन्जेर नेमि कीता.

3 अद आता पेजे उंडे उंदि जोका, एस्तेर महा राजन मुने सोत्ता. अनि वोनङ काल्क्नगा अर्सि, “अगागि कांदांतोर हामन यूदुलकुन मूरि कियना इन्जि वाड्ता करब्ना पिलंतुन दया कीसि रोकि कियना” इन्जेर आड्सेर जुल्मा कीता.

4 अस्के राजल तंवा अदिकार्दा सोनेता बेड्डेतुन एस्तेर्ता बाजुन चह्‍तोर. ते एस्तेर तेच्चि राजन मुने निल्ता. 5-6 अनि, “महा राजा! इद चोकोट्ना विचार आंद इन्जि, नीकुन पसंद वासि, ना पोरो नीकुन दया लागर्ते इद काम कीम. अगागि कांदांतोर हमेदात्नोर मरि हामन यूदुलकुन जक्सि मूरि कियना इन्जेर कानुन लिहि कीसि चिटिङ सारि कीतोर. इदेन हिंदल ना पर्जत पोरो वाय्वल गंडमुन हिंदल, नावा कांदांतुर सासि मूरे माय्वडुन नना बहन सूड्सि सोसि किया पर्का? नावा चोकोटुन सूड्का इंद्किते इद कानुंतुन तोड-मोड किय्ले, राज्नगा मंवलिक सम्दो येरियनगा आगे लिहि कियुसि अदेन रोकि कीम्ट” इन्जेर जुल्मा कीता.

7 अस्के अहसुरोस राजल एस्तेर रानिन सङा अनि यूदुल्क्ना जातितोर मोर्देकयदुन सङा, “हामन यूदुलकुन पगा-दारल आता काड्कि, वोना रोतुन एस्तेरतुन सीतोन. अनि वोन डङल मोदुन पोरो सर्पासा वाटुसीतोन. 8 राजना पोरोडे लिहि कीता अनि राजना मुदते मोर वाड्ता कानुंता चिटितुन बोरे मायनल बद्लि किया परोर. अदेन साटि मीकुन पसंद वाता तीर यूदुल्क्ना बाजुन आसि, ना पोरोडे कानुंता चिटि लिहि कीम्ट. अनि तान पोरो नावा मुदते मोर वाटट” इन्जेर वेह्‍तोर.

9 अस्केने महा राजल तना आगे सीसि लिहि किय्वलिरकुन केयुस्तोर. अद गट्ना सिवन इंवल मूडवा महिनता वीसा मूंद (23) तारिकुन नेटि जर्ग्ता. यूदुलकुन बारेते मोर्देकय आगे सीता तीर कानुंतङ चिटिङ लिहि कीतेर. इवेन बारत देसनल मोदोल कीसि, कूसु देस वेरि, नूटा वीसा येडुङ (127) येरियनगा राज ताकुस्वलिर डगुक अदिकारिर्गा अनि गवर्नर्क्नगा अनि हर उंदि जातितुरकुन, वूरा बासते अनि वूरा लिपिते लिहि कीतेर. यूदुलकुन गिर वूरा बासते अनि लिपिते चिटिङ लिहि कीतेर. 10 मोर्देकय, अहसुरोस महा राजना पोरोडे अवेन लिहि कियुसि, अवेनगा राजना मुदते मोर वाटुस्तोर. अद आता पेजे राजना कोट्कतल बेय तेज वित्वलिक कोडङ तरुसि, अवेन तूपन पूड्वलिर कब्रियलिरकुन उपुसि, वूरा केय्दे अव चिटिङ रोह्‍तोर.

11-12 इव चिटिनगा हर उंदि नगुडुर यूदुल्क तम्वा परंतुन काबाड्ले, सम्दिर उंदि जागा मीरे माय्वल हक मंता इन्जेर महा राजल लिहि कियुस्तोर. अनि तम्वा परन तेंड्ले सूड्वलिर पगा-दारकुन, सिपायिरकुन, वूरुर मरि-मियडुन अनि वूरङ वेय्लोकुन अद आदर इंवल बारवा (12) महिनता तेरवा (13) दिनमुन नेटि^* जक्ले हक मंता. अनि वूरङ दन-दव्लतुन आगुटि किय्वल हक गिर वूर यूदुलकुन मंता इन्जेर लिहि कीसि मत्ता. 13 अव चिटिन उंडे वेले बासने लिहि कीसि रोह्‍वल जर्ग्ता. राजना आगे तीर सम्दो येरियनगा मंवलिर पर्जतुन अव सियना. अनि यूदुल्क तम्वुर पगा-दारकुन पोरो पगा येत्ले, पलना दिवोसुन नेटि तयर मंदना इन्जेर अवेनगा आगे सिय्वल जर्ग्ता. 14 ते कब्रियलिर राजना आगेतुन पिय्सि कोट्कनल तेज वित्वलिक कोडङ तचि, अवेन पोरो उच्चि तुपन पेसितेर. अद कानुंता चिटि राजना कचुरि मंवल सूसन नगुडे गिर सिय्वल जर्ग्ता.

15 अस्के मोर्देकय, महा राजल सीतङ अव नीलि अनि दव्रलिक बारितङ पाङुक पोंड्तोर अनि सोनेता डगुर किरिट केर्तोर. पोरो सेटनगा वाट्सि मंवल कादिता पाङुड रगल रङ्ना मत्ता. इद तीर्दे मोर्देकय सजे मासि राजना कचुरितल बह्‍रि पेसितोर. ते सूसन नगुडे मंवल पर्जा बेय कुसि-आनंद्ने किलितेर. 16 अद दिवोस यूदुलकुन साटि वेले डगुर-पान, आनंद अनि कुसिता आसि निल्ता.

17 महा राजल आगे सीतङ अव चिटिङ येव्ता हर देसेम्नगा, हर नगुडगा मंवलिर यूदुल्क वेले कुसि-आनंद येत्तेर. अद चोकोट्ना दिवोस इन्जेर जेवुन्क कीसेर सड जर्पुस्तेर. अनि देस्क्नगा मंवलिर दुस्रोक जातिनुरकुन वेरे पिय्ता काड्कि, वेलेटिर यूदुल्क्ना दर्मतुन पिय्सि ताक्वल सुरु कीतेर.