हामंतुन सर्पासता सिक्सा वाट्वल
7
1 ते महा राजल अनि हामन, एस्तेर रानि सिय्वल दावत्नगा वातेर. 2 अद दावत्ना रेंडवा दिवोस्नगा राजल आङुर्क्ना कल उन्जेर, “एस्तेर रानि, नीकुन बतल पह्जे? निमे नाकुन बतल कोर्का इंतियो कोरा. अर्दो राजेम पह्जे इंद्कितेर नीकुन सींतोन” इन्जेर तान सङा इत्तोर. 3 अस्के एस्तेर रानि, “महा राजा, ना पोरो नीकुन दया लागर्ते, नीकुन पसंद वातेके, ना जीवतुन अनि ना पर्जता जीवतुन दकुसा! नना कोर्वल इचोरे. 4 बारितेके नना अनि ना पर्जा गिर दुस्रोना केय्दे जकुस्ले अनि मूरि किय्ले वोम्वल जर्ग्ता. मोका ममोट दुस्रुरा केय्दे येत्तुर वूर दासिर आय्मड इत्तेके, नना दबे मंदुन. मोका इद चुडुर गोस्टि आय्मड इत्तेके, महा राजल आय्वल नीकुन तक्लिब सीसि मंनोन” इन्जेर वेह्ता.
5 ते अहसुरोस राजल, “मीकुन अहन कियना इन्जेर बोर गटि-दीर्या कीतोर? वोर बगा मंतोर?” इन्जेर एस्तेर रानिन पूसि कीतोर.
6 अस्के रानि, “मा पगा-दारल वेर करेबल हामने आंदुर” इन्जेर राजन वेह्ता. ते अद केन्चि महा राजन अनि रानिन मुने मत्तोर वोर हामंतुन बेय वेरे पिय्ता. 7 अस्के राजल बेय सोङुन वासि, अद दावत्ना उंवडल तेच्चि, महलतुन बह्रि मंवल वाडितगा सोत्तोर. राजल तनकुन तप्वक सिक्सा सींतोर इन्जेर करि कीसि, हामन रानिन मापि तल्क्ले अगन आग्तोर. 8 ते राजल मल्सि दावत्नगा वासेर मनेके, एस्तेर रानि उच्चि मंवल पलङुन पोरो हामन अर्सेर दिस्तोर. अस्के राजल सोङ्ने, “ना मुनेने महलतगा मंवल रानिन पोरो वेर मुच्लि अरंतोरिय?” इन्जेर जोर्ते इत्तोर. राजना तोड्दल वाय्वलिक अव गोस्टिङ केन्ज्ता बरोबर सेव्कलिर, मरंता सिक्सा वाटनल कसुर कीसि मंवल हामंता मोकोमुन मुच्चि गटा-गिटा पिय्तेर.
9 राजनेर सेव्कलिर्गटल हर्बोना इंवल हिज्डल, “राजा! इद गोस्टि केन्जा! राजना परंतुन बचि कीतोर वोर मोर्देकयदुन सर्पासा वाट्सि जक्ले, वेर हामन तंवा रोन पनस (50) कूटङ डङल वाले मोदुन निपुस्तोर” इन्जेर वेह्तोर. ते राजल, “तान पोरोन वेन सर्पासा वाटट” इन्जेर हुकुम सीतोर.
10 ते वूर हामंतुन वोसि, मोर्देकयदुन सर्पासता सिक्सा वाट्ले तंवा रोन निपुस्ता अद मोदुन पोरोने वेन सिक्सा वाट्तेर. अस्के राजना सोङ रेय्ता.