मोर्देकयदुन, राजल डगुर-पान सिय्वल
6
1 अद नेटिता रातुन महा राजन जोप वाय्मकि. ते वोरोर सेव्कन सङा राज्ना चरित्रा ग्रंत तरुसीतोर अनि वाचि कीसि केन्जुसना इन्जेर आगे सीतोर. 2 अहन वाचि कीसेर मनेके, अद ग्रंत्नगा राजना कम्रता डेरोटतगा केप्वलिर बिग्तन अनि तेरेस इंवलिर हिज्डलिर अहसुरोस महा राजन जक्ले पिलन वाड्तेर. बति अद गोस्टितुन बारेते मोर्देकय वेह्तोर इन्जेर लिहि कीसि मत्ता. 3 अद गोस्टि केन्चि राजल, “अहन वेह्ता काड्कि, वोर मोर्देकयदुन बद इनम पुट्ता अनि बातल डगुर-पान सीतट?” इन्जेर पूसि कीतोर. ते वोन सूचना किय्वलिर, “वोन बतय पुट्मकि” इन्जेर जवब सीतेर.
4 अद गट्कते राज महल्ता आव्रतल वातङ अव दापिना आवज केन्चि राजल, “आव्रतगा बोर वातोर?” इन्जेर सेव्कलिरकुन पूसि कीतोर. अस्केने हामन तना तयर कियुस्ता मोदुन पोरो मोर्देकयदुन सर्पासता सिक्सा राजना केय्दे वाटुसना इन्जेर पूसि किय्ले अद आव्रतगा वातोर.
5 ते राजनेर सेव्कलिर वोन्गा मल्सि सोन्जि, “आव्रतगा हामन वासि निल्सि मंतोर” इन्जेर वेह्तेर. ते राजल, “वोन रोपो पिय्सि वरट” इन्जेर हुकुम सीतोर. 6 ते हामंतुन रोपो पिय्सि वाता पेजे, “राजल बोने आयि डगुर-पान सियना इत्तेके बतल कियना?” इन्जेर वोन पूसि कीतोर. ते हामन, ‘नाकुन सुटि कीसि उंडे बोन डगुर-पान सींतोर? तप्वक नाकुने डगुर-पान सींतोर!’ इन्जेर मंदगा सोन्च कीतोर. 7-9 अनि, “महा राजल बोंते डगुर-पान सीका इंतोरो, राजल पोंड्वलिक पाङुक वोन पोंडुसना. राजल केर्वल किरिटुन वोना तलदगा केरुसना. राजल उद्वल कोडत पोरो वोन उपुसना. अद कोडता तलत पोरो राजना अदिकार्दा मोर मंदना. अव पाङुकुन अनि कोडतुन राजना कचुरितुर अदिकारिर्गटल पेर्सोर वालेना केय्दे सियना. अस्के राजल डगुर-पान सीका इंवन वोर अदिकारि पाङुक पोंडुसि, वोन कोडत पोरो उपुसना. अनि नगुडङ बाजर्क्नगा वोर पेर्सोर अदिकारि कोडतुन मुने ताक्सेर, राजल डगुर-पान सीका इंवन इहिन किय्वल बरोबरे आंद इन्जेर किलिसेर सोंदना” इन्जि राजन वेह्तोर.
10 अस्के महा राजल, “बेय चोकोट वेह्ति. निमे वेह्तपे सप्ने सोन्जि, अव पाङुकुन अनि कोडतुन पिय्सि, राज महल्ता पाटक्नगा उच्चि मंवल यूदुल्क्ना जातितोर मोर्देकयदुन कीम. निमे वेह्ति अवेनल उंदि गिर सुटि किय्वक सम्दो कीम” इन्जेर हामंतुन हुकुम सीतोर.
11 ते तना वेह्ता तीरे हामन पाङुकुन तचि मोर्देकयदुन पोंडुसीतोर अनि कोडतुन तचि, तान पोरो वोन उपुस्तोर. अनि नगुडङ बाजर्क्नगा कोडतुन मुने ताक्सेर, “राजल डगुर-पान सीका इंवन इहिन किय्वल बरोबरे आंद” इन्जेर किलिसेर सोत्तोर.
12 अद आता पेजे, मोर्देकय राज महल्ता पाटक्नगा मल्सि वातोर. बति हामन वेले दुक्सते तंवा तला मुच्तोर अनि लह्कि वर्सि रोन सोत्तोर. 13 अनि हामन तनकुन बतल-बहन जर्ग्तयो अद सम्दोतुन, तंवा वेय्लो जेरेसुन अनि तंवुर सोप्तलिरकुन वेह्तोर. ते तंवा वेय्लो अनि तन सङा मंवलिर गियन वालिर, “निमे मोर्देकयदुन मुने तला वरुस्वल सुरु कीति. वोर मोका यूदुल्क्ना जातितोर आसि मत्तेके, वोन निमे असले मेया पर्वि. वोन हिंदल निमे तप्वक हारे मांति” इन्जेर वेह्तेर.
14 अहन वूर वड्क्सेर मनेके, राजनुर सेव्कलिर आय्वलिर हिज्डलिर वासि, “एस्तेर तयर कियुस्ता दावत्नगा वरा” इन्जेर हामंतुन लह्कि कीतेर.