एस्तेर 3

यूदुलकुन मूरि कियन साटि हामन पिलन वाट्वल

1 इव गट्नङ जर्ग्ता पेजे, अगागि कांदांतोर^* हमेदात्नोर मरि हामंतुन, अहसुरोस महा राजल तंवा कचुरितगा मंवलिर सम्दिर अदिकारिर्गटल डगुर नव्करि सीसि उपुस्तोर. 2 अनि राजल आगे सीता तीर, राज्वडता पाटक्नगा मंवलिर राजनेर सेव्कलिर सम्दिर, हामंतुन वरिसिकुन दंडोस दोस्तेर. बति मोर्देकय वरिमकि अनि दंडोस गिर दोस्मकि. 3 अस्के राज्वडता पाटक्नगा मंवलिर राजनुर सेव्कलिर, “राजना आगेतुन निम बारि पिय्सि ताक्सेर सेल्वि?” इन्जेर मोर्देकयदुन पूसि कीतेर.

4 हर रोज वूर अहन मोर्देकयदुन सङा वेह्‍चेर वातेर बति, वोर वूरा गोस्टितुन वोप्मकि. अनि वोर, “नना यूदुल्क्ना जातितोना आता काड्कि, हामंतङ काल्क केरा परोन”^* इन्जेर वूर सङा वेह्‍तोर. ते वूर मोर्देकयदुन बतल-बहन कींतोरो सूड्कट इन्जेर, अव गोस्टिङ हामंतुन वेह्‍तेर. 5 अस्के तनकुन मोर्देकय वरिसि दंडोस दोसोर अद कारन करि कीसि, वोर हामन वेले सोङ्ने तमा तमा आतोर. 6 अनि हामन, मोर्देकय यूदुल्क्ना जातितोर आंदुर इंवल करि कीसि, सिरिप मोर्देकयदुन जक्तेके बतय पाय्दा सेले. बति अहसुरोस राजना पूरो राज्नगा पग्रे मासि मंवलिर अद यूदुल्क्ना जातितुर सम्दिर्कुने मूरि कियना इन्जेर डाव सूड्सेर मत्तोर.

7 अहसुरोस राजल कचुरि परुस्वल बारवा (12) साल्दा, नीसन इंवल मोदोडा महिनतगा, तंवा कार्यतुन सुरु किय्ले, बद महिना बद दिवोस चोकोट इंवल करि किय्ले, हामन चिटिङ^* वाटुस्तोर. ते अव चिटिनल आदर इंवल बारवा (12) महिना तेरा (13) तारिक निर्नय किय्वल जर्ग्ता.

8 अस्के हामन, अहसुरोस महा राजन सङा, “मीवा राज्नङ सम्दो येरियनगा मंवलिर पर्जत नड्डुम उंदि जातितुर पग्रे मासि मंतेर. अद जातितुरा रीति-रिवज अनि नेकि-बदिङ दुस्रोक जातिनुर्गटल अलग मंतङ. वूर पर्जा राजनङ आगेन पिय्सि ताक्वलिर आयुर. अदेन साटि राजा! वूर राज्नगा मंवडुन हिंदल नीकुन बतय पाय्दा सेले. 9 ते राजा! उंदि मोका नीकुन पसंद वातेके, वूरकुन जक्सि मूरि किय्ले आगे सीम. अद काम किय्वलिर साटि नना मूंद हजर्क (3,000) कुंटल्क कूरा^* नीवा कजनतगा इरंतोन” इन्जेर वेह्‍तोर.

10-11 राजल तंवा अदिकार्दा मोरदुन तोह्‍वल मुदतुन केय्दल तेंड्सि, यूदुलकुन दुस्मन-दारल आय्वल, अगागि कांदांतोर हमेदात्नोर मरि हामंतुन सीसि, “अद कूरा नी केय्दे मंता. अद जातितुर गिर नी केय्देन मंतेर. नीकुन इस्टम वाता तीर वूरकुन कीम” इन्जेर वेह्‍तोर.

12 ते हामन मोदोडा महिना तेरा (13) तारिकुन नेटि, राजनेर चिटिङ लिहि किय्वलिरकुन केयुस्तोर. अस्के वोर हामन आगे सीता तीर, वूर लिहि किय्वलिर राजल तंवा पूरो राज्नगा नेमि कीतोर वूर, कहि येरियन मीरि कीसि वोरोर मंवलिर डगुक अदिकारिरकुन, येरियनुर गवर्नरकुन अनि मंत्रिरकुन वीरा बासते अनि लिपिते चिटिङ लिहि कीतेर. अव चिटिन पोरो अहसुरोस राजना अदिकारदुन तोह्‍वल मुदते मोर वाटुस्तोर.

13 अव चिटिनगा आदर इंवल बारवा (12) महिनता तेरा (13) तारिकुन नेटि, सम्दिर यूदुलकुन इत्तेके, डियङ-डियुरकुन आयि, बुडि-बुडियलिरकुन आयि, वेय्लोकुन आयि, चुडुर मरि-मियडुन आयि इहिन सम्दिरकुन दया अनि किवुल तोह्‍वक जकना. अनि वूरा जाय्जतुन लूटि कियना इन्जेर अव चिटिनगा लिहि कीसि मत्ता. ते अवेन राज्नङ सम्दो येरियनगा कोडने सप्ने सोंवलिर कब्रियलिरा केय्दे रोह्‍वल जर्ग्ता.

14 अद नेटि राज्नङ सम्दो येरियनगा मंवलिर यूदुल्क्ना जातितुर अनि दुस्रोक जातिनुर पर्जा तयर आसि मंदना इन्जेर अवेन रोह्‍वल जर्ग्ता. 15 राजल आगे सीता तीर वूर कब्रियलिर अद कानुंता चिटितुन पिय्सि अगटल पेसितेर. अदेन बारेते राजना महल मंवल सूसन नगुडे गिर पचर किय्वल जर्ग्ता. ते अदेन करि कीसि सूसन नगुडुर दड्कि तिन्जि तका-पिका आसेर मत्तेर बति, राजल अनि हामन दावत्नगा उंले उच्चि मत्तेर.