एस्तेर रानि आय्वल
2
1 अद आता पेजे, अहसुरोस महा राजना सोङ रेय्ता. अहन कहि साल्क आता पेजे वोर राजल वस्ति रानिन, अद कीतङ कामकुन अनि तान साटि नेमि कीतङ अवेन सोन्च कीतोर. 2 अस्के राजन सूचना सिय्वलिर, “महा राजन साटि सोबतङ कोरो पेकिन मह्का लागर. 3 अनि राजल तंवा राज्नङ कोरो पेकिन सूसन नगुडा, तंवा महलतगा पिय्सि वायन साटि, हर येरियतगा माय्नलिरकुन नेमि कियना. अनि अव कोरो पेकिन बारेते सूड्वल अदिकारि हेगे इंवल हिज्डना केय्दा अवेन इरना. अव सोबते दिस्ले, पह्जे मत्तङ अव सम्दोना इंतजम कियना. 4 अहन कीता पेजे, कोरो पेकिकनल बद पेडि राजन वेले पसंद वांतयो, अदे पेडि वस्ति रानिन बद्लि रानि आंता” इन्जेर इत्तेर. इद गोस्टि राजन पसंद वाता काड्कि, वोर अह्ने कीतोर. 5 राजना कचुरि मंवल सूसन नगुडे मोर्देकय इंवल यूदुल्क्ना जातितोर मायनल मत्तोर. वेर बेंयमींता कांदांतोर आंदुर. वेनोर बाबो यायिर, यायिर्तोर बाबो सिमि अनि सिमिनोर बाबो कीसु आंदुर. 6 मोदोल बबुलोंतोर राजल नेबुकद्नेजर, यूदयतोर राजल येकोनियन* अनि पर्जतुन येरुसलेमनल तंवा देस्नगा पिय्सि वोतोर. वूर्गटल वेर मोर्देकय गिर वोरोर आंदुर. 7 वेनोर काकना मियड हदसा इंवल पेडि मत्ता. तानुर अवल-बाबो मार्ता काड्कि, तान वोटिते येत्तोर. हदसन एस्तेर इन्जेर गिर केय्ंदिर. इद पेडि दिस्ले बेय सोबते मत्ता.
8 महा राजल आगे सीता तीर, बेय वेले कोरो पेकिन बरोबर अद एस्तेरतुन गिर राज महल मंवल सूसन नगुडगा पिय्सि वासि, महल्तङ वेय्लोक्ना चोकोट-वायुट सूड्वल हेगेना केय्दा इर्वल जर्ग्ता. 9 ते एस्तेर वोर हेगेन पसंद वाता काड्कि, तान पोरो दया तोह्तोर. अनि तान पह्जे मत्तङ बारि-बारितङ सोक्वलिक अनि तिंवलिक चीज्क सीतोर. अनि राज महल्तल एस्तेर्ता सेवा किय्ले येडुङ डिया पेकिन नेमि कीसि, वेय्लोक मंवल सम्दिन चोकोट्ना जागतगा तान अनि अवेन इर्तोर. 10 नीवा कांदांतुन बारेते अनि नीवा जातितुन बारेते बोने वेह्मा इन्जेर मोर्देकय एस्तेरतुन आगे सीसि मत्ता काड्कि, अद बोने वेह्मकि. 11 एस्तेर बहन मंतयो, तान बतल आतयो इन्जेर करि किय्ले मोर्देकय रोजि वेय्लोक मंवल सम्दिन चोकोट्ना जागता आव्रत करुम हिके-हके तिरिसेर मंदुर.
12 बदे आयि उंदि कोरो पेडिन अहसुरोस महा राजनगा वोयन मुने, अद सारुङ महिनङ वेरि गोपरसा इंवल गमा गमा गाडि सिय्वल निय सोक्सि सिङ्रे माया लागर. अनि उंडे सारुङ महिनङ बारि-बारितङ चीज्क अनि निय्क्ने मालिस कियुसेर सजे माया लागर. अहन बारा महिनङ सिङ्रे माता पेजेने अद पेडिन राजन मुने वोय्वल जर्गंता. 13 तम्वा मंवल महल्तल राजन मुने सोनेके बातङ पाङुक अनि हार्क-वेर्क बतङ तल्क्तेके गिर अद पेडिन सींदिर. 14 अद कोरो पेडि नुल्पेडा येलते राजना महलतगा सोन्जि, दुस्रो नेटि सक्रेन राजनङ वेलक मंवल महलतगा वांदु. अगा ताना चोकोट-वायुट सूड्ले, राजनोर सेव्कल सयस्गज इंवल हिज्डल मंदुर. राजन अद पसंद वासि, ताना पोरोल पिय्सि केयुस्तेके तपुसि, बस्केन राजन मुने सोंवक अद अगने मंदा लागर.
15 उंदि दिया राजना महलतगा सोंवल वंत एस्तेर्ता वाता. (इद मोर्देकय वोटिते येत्ता तंवोर काकल अबिहायिल्ता मियड आंदु.) अस्के अद, वेय्लोक्ना चोकोट-वायुट सूड्वल राजल नेमि कीतोर वोर हेगे इंवल हिज्डल तनकुन वेह्तोर अव हार्क-वेर्क तपुसि दुस्रो बतय केर्मकि. एस्तेरतुन सूड्तुर वूर सम्दिर मेच्तेर.
16 अहसुरोस राजल राज ताकुस्वल येडवा साल्दा टेबेत इंवल पदवा (10) महिनतगा एस्तेरतुन राजना महलतगा वोय्वल जर्ग्ता. 17 ते राजल सम्दो वेय्लोक्नगटल, एस्तेरतुन वेले पेर्मा कीतोर. तान सम्दो कोरो पेकिकनल अदिक पसंद कीसि तंवा दिल पूरो सीसि वाड्तोर. अनि ताना तलत पोरो किरिटुन केरुसि, रानि वस्तिन बद्लि नेमि कीतोर. 18 अद आता पेजे एस्तेर्ता मांदुन साटि राजल तंवा बूड्नुर अदिकारिरकुन अनि सेव्कलिरकुन डगुर दावत सीतोर. अनि राज्नङ सम्दो येरियनगा अंटित सुटि इन्जेर डव्न्डि पायुसि, तंवा राजा-पांदुन दगट पर्जतुन इनम्क तूसि सियुस्तोर.
19 राजना महलतगा नव्करि किय्ले मोर्देकय नेमे मासि मत्तोर. रेंडवा जोका सम्दो कोरो पेकिन मीरि कीनेके, वोर अव पाटकुन करुम तंवा काम कीसेर मत्तोर. 20 एस्तेर मोदोल वोर मोर्देकय्दा जरब्ने बहंते ताक्तयो, अह्ने रानि आता पेजे गिर ताक्ता. अदेन साटिने मोर्देकय तनकुन आगे सीतपिनय, इंके गिर अद तंवा जातितुन अनि कांदांतुन बारेते बोने वेह्मकि.
21 उंदि दिया मोर्देकय राजना महल्ता पाटकुन करुम तंवा काम कीसेर मत्तोर. अहसुरोस राजल तंवा कम्रता डेरोटतगा केप्ले बिग्तन अनि तेरेस इंवलिरकुन नेमि कीसि मत्तोर. वूर सेव्कलिर राजन पोरो सोङुन वासि, वोन जक्ले पिलन वाट्तेर. 22 बति इद गोस्टि मोर्देकयदुन करे माता. ते वोर एस्तेर रानिन वेह्तोर. अस्के अद रानि इद गोस्टितुन मोर्देकय वेह्तोर इन्जेर वोर मोर्देकय्दा पोरोल येच्चि राजन वेह्ता. 23 ते इद गोस्टित बारेते राजल करल-लबड इंवल पूरो करि कीता पेजे, अद वूरा पिलन करलेन इंवल वोन करे माता. वूर इविर केप्वलिरकुन मरता मोद्नगा सर्पासा वाट्तेर. इदेन बारेते महा राजन मुनेने चरित्रता ग्रंत्नगा लिहि किय्वल जर्ग्ता.