एस्तेर
राजल दावत सिय्वल
1
1 इद पुस्तक्नगा मंवलिक सम्दो गट्नङ अहसुरोस महा राजल, राज ताकुस्वल गट्कते करल करल जर्ग्तङ आंदुङ. वेर महा राजल बारत देस्नल्ते, कूसु* देस वेरि, नूटा वीसा येडुङ (127) येरियनगा राज ताकुस्तोर. 2 अद गट्कते वेर महा राजल तंवा राज्ना मुके नगुकनल उंदि आय्वल सूसन* नगुडल कचुरि परुसेर मत्तोर. 3 अहन अहसुरोस महा राजल राज ताकुस्वल मूंद साल्क निंता पेजे, वोर तंवुर मंत्रिर अनि अदिकारिर साटि दावत सीतोर. अद दावत्नगा तंवा राज्नगा मंवलिक पर्सिया देसनल, मादिया देसनल, पूरो नूटा वीसा येडुङ (127) येरियनल गवर्नर्क अनि सिपायिरुर अदिकारिर गिर वातेर. 4 अद दावत नूटा अस्सि (180) रोज्क जर्ग्ता. अद दावत जर्ग्ता अचोङ रोज्क, वोर महा राजल तंवा राज्वडता सोबतुन, कीर्तितुन, जाय्जतुन अनि डगुर-पोरोलदुन तोह्तोर. 5 दावत सीतङ अव दिवोस्क वीड्ता पेजे, वोर महा राजल सूसन नगुडे मंवलिर गरिब-हरिब्ना तेडा सूड्वक सम्दिर साटि, येडुङ रोज्क तंवा वाडिता आव्रतगा दावत सीतोर. 6 अद वाडित रोपो बारितङ सलब बंडने मोग्रल्क मत्तङ. अव मोग्रलकुन पोरो कूरतङ कोंडिङ मत्तङ. अव कोंडिनगा दव्रलिक अनि नीलि रङ्नङ नोडेने, साय कलर्दा अनि दव्रलिक रङ्नङ कादितङ पड्दङ दोह्चि बेय सोबते सजि कीसि मत्ता. अगा बोमितगा रगलिक, दव्रलिक, बोडलिक, कार्यलिक इहिन तीर-तीर्दङ बारितङ सलब बंडङ तार्सि मत्तङ. अदेन पोरो उदन साटि कूरा अनि सोनेते चुडुक पलंक दोह्चि मत्तङ. अवेन पोरो लेप्क वाड्सि मत्तङ. 7-8 अगा वातुरकुन, सोनेतङ गिलस्क्ने राजलिर उंवल आङुर्क्ना बारिता कल सीतेर. अव गिलस्क उंदित मोडि उंदि सेले मत्तङ. वोर राजना कीर्तितुन तोहन दगट वोना आगेतुन पिय्सि, वातुर वेर्तलिरकुन मंदे वाता अचोर अद कल कुसिते वेडितेर.
9 अदे गट्कते, अहसुरोस महा राजना वेलड आय्वल बेय सोबता वस्ति रानि गिर राज महलतगा मंवलिक वेय्लोकुन दावत सीता.
वस्ति रानि तंवा रानिपांदुन सोडुस्वल
10-11 अद दावत्ना येडवा दिवोसुन नेटि, अहसुरोस महा राजल आङुर्क्ना कल उन्जि निसा वर्सि कुसिते मत्तोर. अस्के मीरे मासि वातुर पर्जतुन अनि अदिकारिरकुन, तंवा वेलड आय्वल वस्ति रानिना सोबतुन तोहना इन्जि मत्तोर. अहन तोह्ले रानिन किरिट केरुसि, तन्गा पिय्सि वायना इन्जेर, तंवा सेवा किय्वलिर मेहुमन, बिज्ता, हर्बोना, बिग्ता, अबग्ता, जेतर अनि कर्कस इंवलिर येड्विर हिज्डलिर्कुन* आगे सीतोर.
12 ते वूर सेव्कलिर महा राजल आगे सीततुन रानि वस्तिन वेह्तेर बति, अद वाय्ले वोप्मकि. अदेन साटि राजल बेय सोङुन वातोर. 13-15 अनि वोर कानुंतुन बारेते अनि राज्नङ नियमकुन बारेते करे मातुर गियन वालिर सङा, हर उंदि गोस्टिता चर्चा कीसि निर्नय येत्ंदुर. वूर बूर इत्तेके, कर्सेना, सेतार, अद्माता, तार्सिस, मेरस, मर्सेना अनि मेमुकान. वीर येड्विर जन्क पर्सिया, मादिया देस्क्नुर अदिकारिर राज्वडत रोपो सम्दिर्गटल गिर मुके वालिर अनि महा राजना कचुरितगा नेङ्वलिर अदिकार वालिर आंदिर. ते वूरकुन सूड्सि, “अहसुरोस महा राजना आय्वना नना, वस्ति रानिन पिय्सि वायना इन्जेर आगे सीसि सेव्कलिरकुन रोह्तोन. बति अद रानि वाय्ले वोप्मकि. ते इद गोस्टितुन बारेते मावा कानुंतगा बतल-बहन कियना इन्जेर मंता?” इन्जेर पूसि कीतोर.
16 ते मेमुकान मेय्तुर सम्दिर अदिकारिर मुने महा राजन सङा, “वस्ति रानि कीता अद गल्ति आंदु. अद गल्ति सिरिप अहसुरोस राजन पोरोने आय्वा, राजनुर सम्दि देस्क्नेर अदिकारिर पोरो अनि पर्जत पोरो गिर गल्ति कीतप आंता. 17 बहन इत्तेके, ‘अहसुरोस राजल तंवा वस्ति रानिन कचुरितगा वायना इन्जेर आगे सीनेके गिर अद वाय्मकि’ इंवल गोस्टि सम्दो वेय्लोक केन्जंतङ. अद रानिन मोडि अव सम्दो गिर तम्वुर माड्सुर वेह्ता अदेन उल्टा ताकनुङ.
18 “अनि पर्सिया, मादिया येरियनुर अदिकारिरङ वेय्लोक गिर रानि कीततुन केन्चि, रानि वड्क्तपे नेटल अव गिर वड्क्वल सुरु कीनुङ. इदेन हिंदल सोङ्ने उल्टा आय्वल अनि जग्डङ-लोलिङ वेले आंतङ.
19 “अदेन साटि इङेडल अहसुरोस राजन मुने अद वस्ति रानि बस्केन वाय्वा इंवल गोस्टि पसंद वायर्ते, अद आगे राजनल वाया लागर. अनि अद आगेतुन टरि कीसि, पर्सिया अनि मादिया देस्ना कानुंतगा लिहि कियना. अस्के अद नियम बस्केन मारिवक मंदंता. अनि आतल वस्ति रानिन बद्लि, उंदि सोबते मंवल मान-गुन वाले पेडिन रानि इन्जेर आच्चि नेमि कियना. 20 ईतल निर्नयतुन महा राजल तंवा राज्नङ पूरो येरियनगा डव्न्डि पायुसा लागर. अस्के डगुके आयि, चुडुके आयि, सम्दो वेय्लोक तम्वुर माड्सुरकुन मान सींतङ” इन्जेर वेह्तोर.
21 इद सूचना राजन अनि अदिकारिरकुन पसंद वाता काड्कि, वोर मेमुकान वेह्तपे महा राजल कीतोर. 22 हर मायनल तंवा रोतुन माल्कल आसि मंदा लागर अनि हर वोरोर तंवा रोतुर सङा तम्वा बासते वड्कना इन्जेर महा राजल आगे सीतोर. हर येरियतुरा लिहि किय्वल लिपितुन पिय्सि अनि हर जातितुरा बासतुन पिय्सि तंवा राज्नगा मंवलिक सम्दो येरियनगा राय लिहि कीसि चिटिङ सारि कियुस्तोर.