मदत कीम इन्जेर एस्तेरतुन मोर्देकय कोर्वल
4
1 इहिन जर्ग्ता अद सम्दो, मोर्देकय करि कीता पेजे, तंवङ पाङुक सरुसि, बुय्लि पोते गूंडि कीसि, तंवा तलद पोरो नीर तडितोर.* अनि नगुडगा तिरिसेर बेय दुक्सते आड्सेर सोत्तोर. 2 बति मोर्देकय राज्वडता पाटक वेरिन सोंदा पर्तोर. बारितेके पोते गूंडि कीतोर वोर पाटक्नगा रोपो नेङ्वा इंवल नियम मत्ता. 3 राजल आगे सीसि लिहि कियुस्ता चिटि येव्ता हर येरियतगा मंवलिर यूदुलकुन वेले दुक्सा लाग्ता. ते वूर उपस मन्जि, आड्सेर, तल्मेले मासेर मत्तेर. वेलेटिर बुय्लि पोतेङ गूंडि कीसि नीर्दगा मींड्सि मत्तेर. 4 बस्केते एस्तेर रानिना सेवा किय्वलिक दासि-वोतक अनि हिज्डलिर वासि, मोर्देकयदुन बारेते वेह्तेरो, अस्के रानिना दिल वेले दुक्सते तल्मेले माता. अनि अव पोतेन बद्लि, वोर पोंडन साटि पाङुक अद रोह्ता. बति वोर अवेन पोंड्ले वोप्मकि. 5 ते एस्तेर तंवा सेवा किय्ले राजल नेमि कीतुर हिज्डलिर्गटल वोरोर आय्वल, हताकुन केयुसीता. अनि अद, “निमे मोर्देकय्दगा सोन्जि, बतल जर्ग्सेर मंता अनि बारि जर्ग्सेर मंता इंवल गोस्टितुन करि कीसि वरा” इन्जेर वोन आगे सीता. 6 ते वोर हताक राजना पाटकुन मुनेता नगुडा गलितगा मंवल मोर्देकय्दगा सोन्जि बेटे मातोर. 7 अस्के वोर मोर्देकय, बतल जर्ग्सेर मंता अनि बारि जर्ग्सेर मंता इंवडुन बारेते पोडि कीसि हताकुन वेह्तोर. अचोरे आय्वा, यूदुलकुन मूरि किय्ले हामन राजना कजनतगा बचोर कूरा सीका इन्जेर वाग्दन सीतोर अदेन बारेते गिर वेह्तोर. 8 यूदुलकुन मूरि कियना इन्जेर आगे मंवल चिटि सूसन नगुडे सिय्वल जर्ग्ता. ते अद आगे मंवल चिटितुन सूड्सि, तंवा केय्दे मत्ता तीर लिहि कीतोर. अनि अदेन एस्तेरतुन तोह्चि, पोडि कीसि वेहा इन्जेर हताकुन सीतोर. अनि रानि, राजना चर्नते सोन्जि, तंवा पर्जतुन साटि राजन जुल्मा कीसि, मापि तल्क्सि, वूर पोरो दया तोहनल सूडि इन्जेर वोन वेह्तोर. 9 ते हताकु एस्तेर रानिनगा मल्सि सोन्जि, मोर्देकय वेहा इत्ता अद सम्दोतुन वेह्तोर.
10-11 अस्के एस्तेर हताकुन सङा, “‘मायनल आयि, वेय्लो आयि, राजल आगे सिया बीगर राजना कम्रतगा सोंवा. अहन बोरे सोत्तोर इत्तेके वोन मरंता सिक्सा वाट्वल जर्गंता. इद राजना कानुन आंद. राजनेर सेव्कलिर सम्दिरकुन अनि राज्नङ येरियनगा मंवलिर सम्दिर पर्जतुन, इद गोस्टि टावये. बति उंदि मोका राजल तंवा अदिकार्दा सोनेता बेड्डेतुन अगा सोत्तोर वोन बाज चह्तेके, वोर पिसंतोर. राजल नाकुन तंवा महलतगा केय्वक नेट्क तीसा (30) दियङ आता. ते नना बहन दाका?’ इन्जि मोर्देकयदुन पूसि कीम” इन्जेर जवब सीता.
12-13 ते मोर्देकय एस्तेर पूसि कीता अदेन, “एस्तेर! निमे राज महलतगा मंवडुन हिंदल, यूदुल्क सम्दिर्गटल निमे वोरोनि बचे मांति इन्जेर सोन्च किय्मा. 14 उंदि मोका निम ईतल वकत्ने, दब मंद्किते, यूदुलकुन बचि किय्ले मदत बत्तेर दुस्रो जागतल वांता. बति निमे अनि नी बाबोना कांदांतुर मूरे मांतेर. उंदि मोका निमे ईतल वकतुन साटिने इद राज्ना रानि आतिय बतलो सोन्च कीम” इन्जेर हताकुन सङा जवब सारि कीतोर.
15-16 अस्के एस्तेर, हताकुन सङा, “‘मोर्देकय दादा! निमे सोन्जि सूसन नगुडे मंवलिर सम्दिर यूदुलकुन मीरि कीसि, ना साटि मूंद दिहङ मूंद रात्क येर उंवक अनि काने तिंवक उपस पिय्सि, पार्तना कीम्ट. नना अनि नावङ दासिक गिर अह्ने कींतोम. अद आता पेजे, नना राजना महलतगा दांतोन. अहन सोंवल राजना कानुंतुन उल्टा ताक्तप आंता. नावा जीवा सोत्तेके गिर पर्वा सेले, नना दांतोन’ इन्जि वेहा” इन्जेर मोर्देकयदुन कबुर रोह्ता.
17 ते मोर्देकय अगटल सोन्जि, एस्तेर तनकुन आगे सीता तीर सम्दो जर्गुसीतोर.