येहोसुवा 11

तलवडा बाज्नङ येरियन मेय्वल

1-3 इव जर्ग्तङ गट्नन बारेते बस्केते हसोर नगुडोर राजल याबिन केन्ज्तोरो, अस्के मादोंतोर राजन योबबुन, सिम्रोंतोर राजन, अक्सप्नोर राजन, तलवडा बाज्नङ बोडि गुटना येरियतगा राज ताकुस्वलिर राजलिरकुन, किनेरेतु^* काल्वडा बाज मंवल अराबतोर राजन, सेपेलतगा^* मंवलिर राजलिरकुन, पोरयिङ बाज्नङ गुटनगा मंवल दोर्तुर राजलिरकुन, सिडयिङ अनि पोरयिङ बाज मंवलिर कनांतङ जातिनुरकुन इत्तेके अमोरियुलकुन, हितियुलकुन, पेरिजियुलकुन, डेङलिक गुटनगा मंवलिर येबुसियुलकुन, मिस्पा येरियतगा, हेर्मोन गुटतगा बूड मंवलिर हिविया जातितुरकुन, कबुर रोह्‍तोर. 4 ते वूर राजलिर सम्दिर तम्वङ सिपायिरङ दलमकुन पिय्सि वातेर. वूर सम्दिर सम्दुर्ता डर्डिते मंवल उस्के कडकुन मोडि, कहा परुर अच्विर मत्तेर. वूर्गा बेय वेले कोडङ अनि रत्क गिर मत्तङ. 5 वूर राजलिर सम्दिर येकि आसि, तम्वङ सिपायिरङ दलमकुन मीरि कीसि, इज्रयेल पर्जत सङा लडेय किय्ले मेरोम इंवल येता जागतगा डेरङ वाट्सि मुकम कीतेर.

6 अस्के येहोवा बगवंतल, “वूरकुन सूड्सि वेरिमट. नाडि इद वकत्ने इज्रयेल पर्जता केय्दे वूर सम्दिरकुन हव्लि कींतोन अनि वूरा मरन आंता. अस्के मिरट वूरङ कोडनङ काल्क्नङ सीरङ तिवुसना अनि वूरङ रतकुन तड्मिते डुंडुसना” इन्जेर येहोसुवन सङा वेह्‍तोर.

7 अदेन साटि येहोसुवल अनि वोन सङा मंवलिर सिपायिर सम्दिर सोन्जि, मेरोम इंवल येता जागतगा मंवलिर पोरो अचनक मुच्लि अर्तेर. 8 अस्के येहोवा बगवंतल इज्रयेल पर्जता केय्दे वूरकुन हव्लि कीतोर. ते वूरकुन हारि कीसिकुन, महा सीदोन इंवल नगुर वेरि, मिस्रे-पोत्मयिम इंवल येर वेरि, सिडयिङ बाज मंवल मिस्पे इंवल लोदि वेरि, वूरा पीचा कीसि चिटुम्ने सम्दिरकुन पासि जक्तेर. 9 बगवंतल, येहोसुवन सङा वेह्‍तपिनय, वूरकुन कीतेर. वूरङ कोडनङ काल्क्नङ सीरन नट्क्तेर अनि वूरङ रतकुन तड्मिते डुंडुस्तेर.

10 अद आता पेजे येहोसुवल पेजे मल्सि वासि, हसोर नगुडुन आगुटि कीसि, तानोर राजन तल्वर्ते जक्तोर. तोले अद हसोर नगुर आजु-बाजुतङ सम्दो नगुकुन मुके नगुर आसि मत्ता. 11 वूर इज्रयेल सिपायिर अद हसोर नगुडे मंवलिर हर वोरोन तल्वर्क्ने पासि जक्तेर. वोरोर गिर पिसि मंवक्ने वूर सम्दिरकुन मूरि कीसि वाट्तेर. अनि अद नगुडुन तड्मिते डुंडुस्तेर.

12 येहोसुवल अव सम्दो नगुकुन आगुटि कीतोर अनि अवेनगा राज ताकुस्वलिर सम्दिर राजलिरकुन पासि जक्तोर. बगवंतनोर सेव्कल मोसे मोदोल तनकुन आगे सीतपिनय वूरकुन वोर मूरि कीतोर. 13 बति येहोसुवल अनि इज्रयेल पर्जा चुडुक गुटन पोरो दोह्‍चि मत्तङ अव नगुकुन डुंडुसिय्मकि. बति सिरिप हसोर नगुडुन डुंडुस्तेर. 14 वूर इज्रयेल्तुर अव नगुक्ने पुट्ता सोंमुन अनि पियङ-कालकुन लूटि कीसि तम्वा सङा तत्तेर. बति माय्नलिर्गटल वोरोन गिर सुटि किय्वक सम्दिरकुन तल्वर्क्ने पासि जक्तेर. 15 येहोवल तंवोर सेव्कल आय्वल मोसेन आगे सीतपिनय, वोर मोसे येहोसुवन आगे सीतोर. आगे सीतङ अवेनगटल, उंदितुन गिर सुटि किय्वक सम्दोतुन येहोसुवल पूरि कीतोर.

इज्रयेल पर्जा इंके वेरि लडेय कीसि मेय्तङ अवेन बारेते

16 येहोसुवल अनि वोनुर सिपायिर अव सम्दो येरियन मेय्तोर. अव बव इत्तेके, अद देस्ना गुटना येरिया, पूरो नेगेव येरिया, पूरो गोसेन येरिया, सेपेला येरिया, अराबा इंवल येरिया, पूरो इज्रयेल देस्नङ बोडि गुटङ, अवेन करुम मंवलिक बूड्नङ बोमिङ^*, 17-18 हालक डेङल गुटतल ते सेयिर येरिया वेरि, अगटल हेर्मोन गुटतुन बूड्ना लेबनोन लोदिता डेङल गुटा बयल-गाद वेरि मंवलिक सम्दो येरियङ^* येहोसुवना केय्दे मत्तङ. अव येरियनुर सम्दिर राजलिर सङा वेले जेल येहोसुवल अनि वोनुर सिपायिर लडेय कीसि वूरकुन जक्तेर. 19 गिबियोंतगा मंवलिर हिविया जातितुर तपुसि, दुस्रुर बूरे इज्रयेल्तुर सङा सांतिते मंदंतोम इन्जेर नियम टरि किय्मकि. अदेन साटि कड्मतङ सम्दो नगुकुन पोरो लडेय कीसि मेय्तेर. 20 वूरकुन मूरि कीम्ट इन्जेर येहोवल, मोसेन आगे सीतपिनय इज्रयेल पर्जा वूर पोरो दया तोह्‍वक्ने मूरि कीतेर. बारितेके येहोवल वूर दुस्रोक जातिनुर इज्रयेल्तुर सङा लडेय किय्ले वासि, सायना इन्जेरेन वूरङ दिलकुन मूजोर-पान वायुस्तोर.

21 अद गट्कते, येहोसुवल अनि वोन सङा मंवलिर इज्रयेल्तुर सिपायिर वासि, गुटनगा मंवलिक हेब्रोन, देबिर अनि अनबा नगुक्नगा मंवलिर अनि यूदयतङ अनि इज्रयेल्तङ गुटनगा मंवलिर अनकियुल्क्ना जातितुर सम्दिरकुन जक्तेर अनि वूरङ नगुकुन गिर मूरि कीतेर. 22 इज्रयेल्तुर मंवलिक येरियनगा अनकियुल्क्नगटल वोरोर गिर पिसि मन्मकि. कड्मतुर अनकियुल्क्ना जातितुर गाजा, गातु अनि अस्दोद नगुक्नगा पिस्तेर. 23 येहोवल मोसेन सङा वेह्‍तपिनय, येहोसुवल अद पूरो बोमितुन आगुटि कीतोर. येहोसुवल इज्रयेल पर्जतङ कांदानकुन पिय्सि, अद पूरो बोमितुन वूरा जाय्जत आनल कीतोर. अस्के वूर लडेय सेल्वक अगा सांतिते मत्तेर.