येहोसुवा 12

योर्दन लविडुन सिडयिङ बाज मंवलिर राजलिर हारे माय्वल

1 योर्दन लविडुन सिडयिङ बाज मंवल पूरो बोमितुन इज्रयेल पर्जा आगुटि कीतेर. अर्नोन कोल लोदितल ते हेर्मोन डङल गुटा वेरि, इंके अराबतुन सिडयिङ बाज मंवल बोमि पूरो वूरा केय्देन मत्ता. इज्रयेल पर्जा इद बोमितुन आगुटि किय्ले राजलिरकुन अनि वूरुर मरकुन सङा लडेय किय्वल जर्ग्ता.

2 वूर राजलिर बूर इत्तेके, अमोरियुल्कोर राजल सिहोन, वेर हेस्बोन इंवल नगुडे पिसेर मत्तोर. वेना राज अर्नोन इंवल लविडा डर्डित बग्लता अरोयेर इंवल लोदित नड्डुमनल गिलादु येरियता अर्दो बागम वेरि, अनि अमोनियुल्क्ना दूरा यबोक लव्डि वेरि मत्ता. 3 उंडे गिर वोर राजल, योर्दन लविडुन सिडयिङ बाज मंवल गलिलया सम्दुर्तल ते साता सम्दुर वेरि अनि सिडयिङ बाज मंवल बेत-येसिमोत सोंवल सरि वेरि, काल्वडा बाज्ना पिस्गतुन बूड्ना बाजुन वेरि वोर राजल राज ताकुसींदुर.

4 बासन येरियतोर राजल वोगु, रेपायिम इंवल तग्डियल जातितल मेय्सि मंवल आक्रितोर आंदुर. वेर अस्तरोत अनि येद्रेयि नगुकनल राज ताकुसेर मंदुर. 5 गेसुरियुल्क अनि मायकातियुल्क इंवलिक जातिनुरा सिवा वेरि मंवल पूरो बासन येरियतुन, सलेकान नगुडुन, हेर्मोन गुटना येरियतुन, अनि हेस्बोंतोर राजल सिहोंता सिवा वेरि मंवल येरियतुन अनि गिलादु येरियता अर्दो बागमुन पोरो राज ताकुसेर मंदुर.

6 येहोवनोर सेव्कल मोसे अनि इज्रयेल पर्जा, वूर राजलिरकुन हारि कीसि जक्तेर. वोर मोसे, रूबेंता कांदांतुर, गादुना कांदांतुर अनि मनसेना कांदांतुर्गटल अर्दो पिला कांदानुर लोकुरकुन ईसा आयर इन्जेर अद बोमितुन तूसि सीतोर.

7 येहोसुवल अनि इज्रयेल पर्जा योर्दन लव्डितुन पोरयिङ बाज, लेबनोन लोदितगा मंवल बयल-गाद नगुडल ते सेयिर येरियतगा मंवल हालक इंवलिक डङलिक गुटङ वेरि मंवलिक येरियनुर राजलिर सङा लडेय कीसि जक्तेर. अव बोमिङ इज्रयेल पर्जतङ कांदानकुन, वूरा कांदांतुन पिय्सि ईसा तूसि सीतोर. 8 इद बोमि गुटना येरियतगा, सेपेला येरियतङ गुटनगा, योर्दन लव्डिता लोदितगा, पोरेय्तङ गुटनगा, यूदयतङ बोडि गुटनगा अनि नेगेव येरिया वेरि पग्रे मासि मत्ता. इव येरियनगा हितियुल्क, अमोरियुल्क, कनानियुल्क, पेरिजियुल्क, हिवियुल्क, येबुसियुल्क इंवलिक जातिनुर राजलिर इज्रयेल्तुरा केय्दे हारे मातेर.

9-24 वूरङ पोरोल्क इव आंदुङ: येरिकोतोर राजल, बेतेलतुन करुम्ना हायितोर राजल, येरुसलेम्नोर राजल, हेब्रोंतोर राजल, यर्मुतोर राजल, लकिस्नोर राजल, येग्लोंतोर राजल, गेजेर्तोर राजल, देबिर्तोर राजल, गेदेर्तोर राजल, होर्मतोर राजल, अराद्नोर राजल, लिब्नतोर राजल, अदुलम्नोर राजल, मकेदतोर राजल, बेतेल्तोर राजल, तपुयतोर राजल, हेपेर्तोर राजल, आपेक्नोर राजल, लसरोंतोर राजल, मादोंतोर राजल, हसोर्तोर राजल, सिम्रोन-मेरोंतोर राजल, अक्सप्नोर राजल, तानक्नोर राजल, मेगिदोतोर राजल, केदेस्नोर राजल, कर्मेल गुटता योक्नेयम्नोर राजल, नपोत-दोर इंवलिक मेटनगा मंवल दोर नगुडोर राजल, गिल्गालतगा मंवल गोयिम्नोर राजल अनि तिर्सतोर राजल. वूर सम्दिर राजलिर मीरि कीसि तीसा उंदि (31) जन्क मत्तेर.

उंडे करि कीका इंदकिते, www.koyang.in सूडा.