येहोसुवा 10

पोड्द अनि नेलेन्ज मेलिवक्ने निल्सि मत्ता दिनम

1 येरुसलेम्नोर राजल अदोनि-सेदेक, येहोसुवल येरिको नगुडुन मूरि कीसि अनि तानोर राजन जक्तपे, हायि नगुडुन अनि तानोर राजन कीतोर इंवल गोस्टितुन, इज्रयेल पर्जा गिबियोंतुर सङा सांतिता नियम टरि कीसि वूर करुम पिसेर मंतेर इंवल गोस्टितुन केन्ज्तोर. 2 अस्के वोर राजल अनि वोनुर पर्जा बेय वेरितेर. बारितेके गिबियोन नगुर डगुर पोरोल सोत्ता नगुर आंदु. राजल मंवल हायि नगुडुन दात डगुर मत्ता. तानुर पर्जा हायि नगुडुरकुन तेर ताकद वालिर आसि मत्तेर. 3-4 अदेन साटि येरुसलेम्नोर राजल अदोनि-सेदेक, तंवुर कब्रियलिर सङा, “हेब्रोंतोर राजल होहम्नगा, यर्मुतोर राजल पिराम्नगा, लकिस्नोर राजल यापियनगा, येग्लोंतोर राजल देबिरतगा सोन्जि, ‘गिबियोंतुर लोकुर, येहोसुवन सङा अनि इज्रयेल पर्जत सङा सांतिते मंले नियम टरि कीतेर. ते वूर गिबियोंतुर सङा नना लडेय किय्ले, नाकुन मदत किय्ले वरट’ इन्जि वेहट” इन्जेर रोह्‍तोर.

5 ते अमोरिया जातितुर राजलिर इत्तेके येरुसलेम्नोर, हेब्रोंतोर, यर्मुतोर, लकिस्नोर अनि येग्लोंतोर राजलिर येकि आसि, तम्वुर सिपायिरङ दलमकुन पिय्सि गिबियोंतुन मुने मीरे मातेर. अनि गिबियोंतुर लोकुर सङा लडेय किय्वल सुरु कीतेर.

6 अस्के गिबियोंतुर लोकुर, सप्ने कब्रियलिरकुन सारि कीसेर, “‘मीवुर दासिर आय्वलिर माकुन सुटि किय्मा. अमोरिया जातितुर राजलिर सम्दिर मीरे मासि, मा सङा लडेय कीसेर मंतेर. मिरट सप्ने वासि माकुन मदत कीसि बचि कीम इन्जि कोर्सेर मंतोम’ इन्जेर गिल्गालतगा मंवल येहोसुवनगा सोन्जि वेहट” इन्जेर कबुर रोह्‍तेर.

7 ते येहोसुवल, तन्गा मंवलिर सिपायिरकुन, मुकेते लडेय किय्वलिर ताकद वालिर सम्दिरकुन पिय्सि गिल्गाल्तल पेसितोर. 8 अस्के येहोवा बगवंतल, “वूरकुन वेरिमट! मी केय्दे वूरकुन सीसि मंतोन. वूर रोपोडल वोरोर गिर मीकुन मेया परोर” इन्जेर येहोसुवन वेह्‍तोर.

9 अदेन साटि येहोसुवल अनि वोन सङा मंवलिर गिल्गाल्तल अंटिता रात पूरो ताक्सि, गिबियोंतगा येव्तेर. अनि अमोरिया जातितुर गुल आनल अचनक वूरा दलमुन पोरो मुच्लि अर्तेर.

10 अस्के येहोवल वूरकुन इज्रयेल्तुर मुने कलगुला कीता काड्कि, येहोसुवल अनि वोना दलम्नुर गिबियोंतगा वूर अमोरियुलकुन मेय्सि तल्वर्क्ने पासि वेलेटिरकुन जक्तेर. पोरो बेत-होरोन सोंवल सर्दगा अनि अदेनल बूड रेय्सि वाय्वल सर्दगा मंवल अजेका अनि मकेदा वेरि सिपायिर वूरा पीचा कीसि जक्तेर. 11 अनि इज्रयेल्तुर मुनेतल वूर बेत-होरोंतल सरिय रेय्सि वानेके, अजेका वानल वेरि येहोवल आगसनल पेर्सङ गार-बंडङ वूर पोरो अरुस्तोर. अवेन हिंदल वूर सातेर. इज्रयेल्तुर तल्वर्क्ने जक्तेर वूर्गटल तेर, गार-बंडङ अर्सि सातुर वूर वेलेटिर मत्तेर.

12 येहोवा बगवंतल इज्रयेल्तुरा केय्दे अमोरिया जातितुरकुन हव्लि कीता दिनमुन नेटि, इज्रयेल लोकुर केन्चेर मनेके, येहोसुवल,

“पोड्द्नि! निमे गिबियोंतगा निल्सि मन.

नेलेन्ज्नि! निमे अयलोन लोदितगा निल्सि मन”

इन्जेर येहोवन पार्तना कीतोर.

13 ते इज्रयेल पर्जा तम्वुर दुस्मन-दारकुन पोरो पगा येतनल वेरि पोड्द नड्डुम हाबडगा मेलिवक्ने निल्ता अनि नेलेन्ज गिर आग्ता. उंदि दिवोस पूरो गिर पोड्द सोन्मकि. इद गोस्टि यासर^* इंवल ग्रंत्नगा लिहि कीसि मंता. 14 येहोवा बगवंतल वोरोर माय्नना गोस्टि केन्चि पोडदुन अनि नेलेन्जुन निपुस्ता दिवोस, तान मुनेन आयि, तान पेजेय आयि बस्केन गडे माय्मकि. अंटित वोर बगवंतले इज्रयेल पर्जत हिंदल आसि लडेय कीतोर. 15 अद आता पेजे, येहोसुवल अनि इज्रयेल पर्जा सम्दिर गिल्गालतगा मंवलिक डेरनगा मल्सि वातेर.

16 अद लडेय ताक्सेर मनेके, वूर सिय्विर राजलिर तपुसि, मकेदा जागतगा मंवल बुयरितगा मक्सि मत्तेर. 17 वूर राजलिर पुट्तेर इंवल येहोसुवल केन्ज्ता पेजे, 18 “अद बुयरितगा नेङ्वल सर्दगा पेर्सङ बंडङ कूडुसि मुहट. अनि वूरकुन केप्ले कहितुरकुन नेमि कीसि अगा इरट. 19 अनि मिरट अगा रोम्वक्ने मी बगवंतल आय्वल येहोवल मी दुस्मन-दारकुन मी केय्दे हव्लि कीता काड्कि, वूर उंडे तम्वङ नगुक्नगा सोंवक्ने पीचा कीसि जकट” इन्जेर आगे सीतोर.

20 ते येहोसुवल अनि इज्रयेल पर्जतुर सिपायिर बेय वेलेटिरकुन जक्तेर. बति मेय्सि मत्तुर वूर सिर्मुट गोडङ मंवलिक नगुक्नगा नेङ्सि मक्तेर. सिरिप वीरे जीवते मेय्सि मत्तेर. 21 अद आता पेजे सम्दिर सिपायिर तमा मुकम कीता मकेदा इंवल जागते येहोसुवनगा मल्सि वातेर. अस्के इज्रयेल पर्जतुन उल्टा आसि वड्क्ले बोरे दर्यम किय्मकि.

22 अस्के येहोसुवल, “अद बुयरितुन अड्डम इर्तङ बंडङ कूडुसि, वूर सिय्विर राजलिरकुन नह्‍गा पिय्सि वरट” इन्जेर वूरकुन वेह्‍तोर. 23 ते वूर सोन्जि, अगा मक्सि मंवलिर सिय्विर राजलिरकुन इत्तेके येरुसलेम्नोर राजन, हेब्रोंतोर राजन, यर्मुतोर राजन, लकिस्नोर राजन अनि येग्लोंतोर राजन अद बुयरितल बह्‍रि पिय्सि वातेर. 24 वूर राजलिरकुन येहोसुवनगा पिय्सि वाता पेजे, वोर इज्रयेल्तुर सम्दिर पर्जतुन केयुस्तोर. अनि तंवा सङा लडेय किय्ले वातुर वूर सिपायिरुर कमंडरकुन सूड्सि, “मिरट करुम वासि, वीर राजलिरङ गोटिन पोरो, मीवङ दापिङ इरट” इन्जेर येहोसुवल वेह्‍तोर. ते वूर वासि, राजलिरङ गोटिन पोरो तम्वङ दापिङ इर्तेर.

25 अस्के येहोसुवल, “मिरट बोन सङते लडेय किय्वलिर मंतिटो, वूर सम्दिरकुन येहोवा बगवंतल वीरकुन कीतपिनय कींतोर. अदेन साटि मिरट वेरिमट अनि दड्कि तिन्मट बति, गटि-दीर्यते मंट” इन्जेर वेह्‍तोर.

26 अद आता पेजे, वूर राजलिरकुन येहोसुवल पासि जक्तोर अनि सियुङ मरक्नगा वूरकुन सर्पासा वाटुस्तोर. अव कूर्क पोड्द सोनल वेरि अह्‍ने लिम-लोम मत्तङ. 27 पोड्द सोंवल वकत्ने, येहोसुवल आगे सीता तीर वूर सिपायिर, वूरङ कूरकुन मरकनल रेह्‍चि, वूर मक्सि मत्ता अद बुयरितगा वोसि, वाडिसीतेर. अनि अद बुयरिता सरदुन पेर्सङ बंडने मुह्‍तेर. अव बंडङ नेट्क वेरि गिर अह्‍ने मंतङ.

28 अंटित येहोसुवल अनि वोनुर सिपायिर मकेदा इंवल नगुडुन आगुटि कीसि, तानोर राजन अनि अगटुर पर्जतुन चिटुम्ने पासि जक्तेर. येरिको नगुडोर राजन कीतपिनय, मकेदा नगुडोर राजन गिर कीतेर.

काल्वडा बाज्नङ येरियन मेय्वल

29 येहोसुवल अनि वोन सङा मंवलिर इज्रयेल्तुर सम्दिर मकेदा नगुडल, लिब्ना इंवल नगुडे वासि, अद नगुडुर सङा लडेय कीतेर. 30 येहोवा बगवंतल अद नगुडुन अनि तानोर राजन इज्रयेल्तुरा केय्दे हव्लि कीतोर. ते वूर अद नगुडुन नासेडम कीसि, अगा मंवलिर पर्जतुन तल्वर्क्ने चिटुम्ने पासि जक्तेर. वोर येरिको नगुडोर राजन कीतपिनय, लिब्ना नगुडोर राजन गिर कीतेर.

31 अद आता पेजे येहोसुवल अनि वोन सङा मंवलिर इज्रयेल सिपायिर सम्दिर लिब्ना नगुडल, लकिस नगुडे वासि, अद नगुडुर सङा लडेय कीतेर. 32 येहोवा बगवंतल लकिस नगुडुरकुन इज्रयेल्तुरा केय्दे हव्लि कीतोर. ते रेंडवा दिया लिब्ना नगुडुरकुन कीतपिनय, अद नगुडुरकुन तल्वर्क्ने पासि जक्तेर. 33 अदे गट्कते लकिस्नुरकुन मदत किय्ले गेजेर्तोर राजल होरम वातोर. बति येहोसुवल अनि वोन सङा मंवलिर सिपायिर वोर राजन अनि वोनुर सिपायिरकुन चिटुम्ने जक्तेर.

34 अद आता पेजे येहोसुवल अनि वोन सङा मंवलिर इज्रयेल सिपायिर सम्दिर लकिस नगुडल, येग्लोन नगुडे वासि, तान सिर्मुट गेर-पासि, अद नगुडुर सङा लडेय कीतेर. 35 अद नेटि, वूर इद येग्लोन नगुडुरकुन तल्वर्क्ने चिटुम्ने पासि जक्तेर. अद लकिस नगुडुरकुन कीतपिनय, वीरकुन गिर मूरि कीतेर.

36 अद आता पेजे येहोसुवल अनि वोन सङा मंवलिर इज्रयेल सिपायिर सम्दिर येग्लोन नगुडल, हेब्रोन नगुडे वासि, अद नगुडुर सङा लडेय कीतेर. 37 वूर अद नगुडुन आगुटि कीसि, तानोर राजन अनि तान सिर्मुट मंवलिक नह्‍क्नुर सङा लडेय कीसि, तल्वर्क्ने चिटुम्ने पासि जक्तेर. अद येग्लोन नगुडुरकुन कीतपिनय, इद नगुडुन अनि तेनुर पर्जा सम्दिरकुन मूरि कीतेर.

38 अद आता पेजे येहोसुवल अनि वोन सङा मंवलिर इज्रयेल सिपायिर सम्दिर हेब्रोन नगुडल, देबिर नगुडेके पेजे वासि, अद नगुडुर सङा लडेय कीतेर. 39 वूर अद नगुडुन आगुटि कीसि, तानोर राजन अनि तान सिर्मुट मंवलिक नह्‍क्नुर सङा लडेय कीसि, तल्वर्क्ने चिटुम्ने पासि जक्तेर. अद हेब्रोंतुरकुन, लिब्ना नगुडुरकुन अनि अवेक्नुर राजलिरकुन वूर कीतपिनय, अद देबिर नगुडुन अनि तानोर राजन कीतेर.

40 अद तीर्दे येहोसुवल अनि वोनुर सिपायिर डङलिक गुटना येरियतुन, काल्वडा बाज्ना नेगेव इंवल बोडि गुटना येरियतुन, सेपेला^* इंवल येरियतुन अनि लोदिना येरियतुन अनि अवेनुर राजलिरकुन लडेय कीसि मेय्तेर. इज्रयेल पर्जतोर येहोवा बगवंतल आगे सीता तीर जीवता हूकुर मंवल हर उंदितुन मूरि कीसि वाट्तेर.

41 येहोसुवल, कादेस-बर्नियतल, गाजा वेरि अनि गोसेंता येरियतल गिबियोंता सरि वेरि पूरो देसेमुन मेय्तोर. 42 इज्रयेल पर्जतोर बगवंतल आय्वल येहोवले, वीर इज्रयेल पर्जतुन हिंदल आसि लडेय कीता काड्कि, येहोसुवल उंदिय जोकते वूर सम्दिर राजलिरकुन अनि वूरङ येरियन मेय्सि आगुटि किया पर्तोर.

43 अद आता पेजे, येहोसुवल, वोन सङा मंवलिर इज्रयेल्तुर सिपायिर तम्वङ डेरङ मंवल गिल्गालतगा मल्सि वातेर.