दुस्रुरङ कलना अर्तम योसेप वेह्वल
40
1 इव सम्दो जर्ग्ता पेजे ईजिप्ट्नोर परो राजनुर इविर अदिकारिर तप कीतेर.
वूर्गटल वोरोर सारिङ बोड्स्वलिरोर अदिकारि अनि उंडे वोरोर आङुर्क्ना रसा अंदुस्वलिरोर अदिकारि आंदुर.
2-3 राजल वीर इविर पोरो सोङुन वासि, योसेप मंवल टानेतगा* वूरकुन वाटुस्तोर.
4 वोर टानेतोर अदिकारि वूरकुन योसेप्ना केय्दे हव्लि कीतोर.
ते योसेप वूरा सेवा कीसेर मत्तोर.
वूर वेले रोज्क अद टानेतगन मत्तेर.
5 उंदि दिया नर्का ईजिप्ट राजनुर अदिकारिरकुन कन्ज्काटेङ दिस्तङ.
उंदिय नर्का वूर इविर्ते दुस्रो दुस्रो अर्तम्नङ कलङ कन्ज्क्तेर.
6 दुस्रो नेटि सक्रेन योसेप वूर्गा सोन्जि सूड्नेके, वूर दुक्सते मत्तेर.
7 ते, “नेंडु मीवङ मोकोम्क बारि दुक्सते दिसेर मंतङ?” इन्जेर वूरकुन पूसि कीतोर.
8 अस्के वूर, “माकुन कलङ दिस्तङ.
अवेना अर्तम वेह्ले बोरे सेलुर” इन्जेर इत्तेर.
ते योसेपु, “अवेना अर्तम वेह्वल बगवंतना केय्देन मंता.
बति मिरट दया कीसि मीवङ कलङ नाकुन वेहट” इन्जेर इत्तोर.
आङुर्क्ना रसा अंदुस्वलिरोर अदिकारिना कला
9 अस्के आङुर्क्ना रसा अंदुस्वल अदिकारि योसेपुन सङा, “ना कलतगा उंदि आङुर्क्ना वेलि ना मुने मत्ता.
10 अद आङुर्क्ना वेलित मूंद कांदङ मत्तङ.
अव कोड्सि, पुङक पोय्सिकुन गुज्जिङ साद्तङ.
11 परो राजना कोजा ना केय्दे मत्ता.
नना अव आङुर्क्नङ पंडिङ कोय्सि, कोजतगा पीर्सि, अद कोजा परो राजना केय्दगा सीतोन” इन्जेर वेह्तोर.
12 ते योसेप वोन सङा, “अद कलता अर्तम इद आंद: इगे मूंद कांदङ मूंद रोज्क आंदुङ.
13 अनि उंडे मूंद रोजकुन रोपो परो राजल नीकुन इगेटल सुटि कियुसि, नी नव्करि नीकुन सियुसंतोर.
इदेन मुने परोनगा निमे कीता कामे उंडे गिर कींति.
14 नीकुन सम्दो चोकोट जर्ग्नेके दया कीसि नाकुन हेतु इरा.
अनि ना बारेते परोन वेह्चि, नाकुन इद टानेतल सुटि कियुसा.
15 बारितेके नाकुन बल्मित ना रोतल अनि ना पर्जा आय्वल हेब्रियुल्क्नगटल पिय्सि वातेर.
नाकुन टानेतगा इरनल, नना बतय कसुर किय्मकि” इन्जेर वेह्तोर.
सारिङ बोड्स्वलिरोर अदिकारिना कला
16 वोर सेव्कना कलता अर्तम चोकोट मंता इन्जेर सारिङ बोड्स्वल अदिकारि करि कीसि, “नना गिर उंदि कला कन्ज्क्तोन.
अद कला बतल इत्तेके, ना तलत पोरो तीर-तीर्दङ सारिनङ दाव्डिङ मूंद दिस्तङ.
17 अव दाव्डिनगा पिंडिते सुर्तङ राजल तिंवलिक तीर-तीर्दङ सारिङ मत्तङ.
बति पिटेङ ना तलत पोरोडा दाव्डितल तिन्जेर मत्तङ” इन्जेर वेह्तोर.
18 अद केन्चि योसेप, “अद कलता अर्तम इद आंद: इगे मूंद दव्डिङ इत्तेके मूंद रोज्क आंदुङ.
19 अनि उंडे मूंद रोजकुन रोपो परो राजल नीकुन इद टानेतल सुटि कियुसि, नीवा तलतुन नट्कुसि, मेंदोडुन मरतगा दिङ-दोङ कियुसंतोर.
नीवा मेंदोडुन पिटेङ तिंतङ” इन्जेर वेह्तोर.
योसेपुन बारेते वोर अदिकारि मरुङ्वल
20 मूडवा दिवोसुन नेटि परो राजल तंवा जल्मता दिवोस जर्पुसीतोर.
वोर तंवुर अदिकारिर साटि उंदि जेवुन सीतोर.
अस्के तंवोर सारिङ बोड्स्वन अनि आङुर्क्ना रसता कोजा अंदुस्वन टानेतल तम्वा नड्डुम केयुस्तोर.
21 आङुर्क्ना रसता कोजा अंदुस्वल अदिकारिन सुटि कियुसि, वोना नव्करि वोन मल्सि सीतोर.
ते वोर अद रसता कोजा परो राजना केय्दे अंदुस्तोर.