पुट्गड्मि 39

ईजिप्ट्नोर पोतिपर योसेपुन येत्वल

1 वूर इस्मयेल जातितुर बेपरि-दार्क, योसेपुन ईजिप्ट्नगा तत्तेर.

⁺ अस्के पोतिपर इंवल ईजिप्ट्नोर मायनल तनकुन दासि आसि मंले, वोन येत्तोर.

वेर मायनल परो राजना महलतुन केप्वलिरोर अदिकारि आंदुर.

2 येहोवा बगवंतल योसेपुन सात मत्तोर.

इदेन हिंदल वोर किय्वल हर काम साक्सेय आसेर, ईजिप्ट्नोर माल्कना रोन बडे मासेर मत्तोर.

3 येहोवा बगवंतल सात मंवडुन हिंदल, वोर कीता सम्दो काम्नगा साक्सेय आय्वल, वोर पोतिपर माल्कल सूड्तोर.

4 ते योसेपुन पोरो वोन दया लाग्ता.

अदेन साटि तनकुन मदत किय्ले अनि तंवा रोता सम्दो जाय्जत सूड्ले, योसेपुन कारोबारिन दात नेमि कीतोर.

5 अस्केडल योसेपुन हिंदल ईजिप्ट्नोर पोतिपर्ता रोतुन, वाव्टुन अनि वोना सम्दोतुन येहोवा बगवंतल आसिर्वाद सीतोर.

6 तन्गा मत्ता सम्दितुन योसेप्ना केय्दे हव्लि कीसि, तंवा तिंवडुन तपा दुस्रो बतय पटि किय्वेके सोंदुर.

पोतिपर्ता बाय्को योसेपुन जुल्मा किय्वल

योसेप मज्बुत अनि रूपुन सूड्ले, चोकोट मत्तोर.

7 वोनोर माल्कना बाय्को वोन पोरो जीवा वाट्सि, “नह्‍गा मींड्ले वरा” इन्जेर इत्ता.

8 बति वोर वोप्मकि.

अनि “ना माल्कल तंवा सम्दोतुन पोरो नाकुन अदिकार सीता काड्कि, रोत रोपोडा बततुने वोर पटि कियोर.

9 इद रोतगा नाकुन तेर डगुर बोरे सेलोर.

निमे नावोर माल्कना वेय्लोनि आता काड्कि, नीकुन तपुसि सम्दोतुन ना केय्दे हव्लि कीतोर.

बति बगवंतन उल्टा आसि, इचोर डगुर पाप बहन कीका?” इन्जेर तान सङा इत्तोर.

10 तेर बति हर रोज तन्गा वासि, मींडना इन्जेर योसेपुन जुल्मा कींदु.

बति तान सङा मींड्ले अनि तान करुम सोंले गिर योसेप वोप्मकि.

11 अहन मनेके मनेके उंदि दिया तंवा कामुन साटि रोत रोपो नेङ्तोर.

अद गट्कते रोतगा बूरे सेले मत्तेर.

12 अस्के अद वेय्लो वोना मेंदोड पोरोडा कप्डि पिय्सि, “ना सङा मींडा वरा” इन्जेर इत्ता.

ते वोर तंवा कप्डितुन ताना केय्दगन सुटि कीसि, तपुसि बह्‍रि विच्चेर सोडितोर.

13-14 वोना कप्डितुन तंवा केय्दगा सुटि कीसि, तपुसि सोंवल सूड्सि, रोतुर सेव्कलिरकुन अद केय्ता.

अनि “सूडट!

हिजत वोय्ले, ना माड्सो हेब्रि जातितोन मह्‍गा तत्तोर.

वोर नह्‍गा मींड्ले आतोर. ते नना जोर्ते किलितोन.

15 अहन किलिवल केन्चि, वोना कपिडुन नह्‍गने सुटि कीसि बह्‍रि वित्तोर” इन्जेर इत्ता.

16 योसेप्नोर माल्कल रोन वानल वेरि, अद कपिडुन तन्गन इर्ता.

17 अनि माड्सो वाता पेजे, वोन सङा, “इचुला! निमे मह्‍गा तत्ति वोर हेब्रि जातितोर, नावा हिजत वोय्ले, आसि मत्तोर.

18 ते नन जोर्ते किलिनेकेन वोना कपिडुन नह्‍गन सुटि कीसि, बह्‍रि परर आतोर” इन्जेर अद वेह्‍ता.

योसेपुन टानेतगा वाट्वल

19 तंवा बाय्को वेह्‍ता गोस्टित केन्चि, योसेप्नोर माल्कन बेय सोङ वाता.

20 ते तप कीतुरकुन राजल सिक्सा वाट्सि, इर्वल टानेतगा वोन पिय्सि वाटुस्तोर.

योसेपुन टानेतगा कोंडि किय्वल

अहन योसेप टानेतगा मनेके,

21 येहोवा बगवंतल वोन सात मन्जि, आसिर्वाद सिय्वडुन हिंदल योसेपुन पोरो टानेतोर अदिकारिन दया लागनल बगवंतल कीतोर.

22 टानेतोर अदिकारि जेल बोगे माय्वलिर सम्दिरकुन अनि अगा किय्वलिक कामकुन योसेप्ना केय्दे हव्लि कीतोर.

23 ते येहोवा बगवंतल वोन सात मत्ता काड्कि, अद टानेतोर अदिकारि योसेपुन हव्लि कीतङ कामकुन पटि किय्वेके सोंदुर.

योसेप किय्वल हर कामदुन बगवंतल साक्सेय कीतोर.