पुट्गड्मि 38

यूदनुर इविर मर्क्ना मरन

1 अद गट्कते यूदल तंवुर तादल-तमुकुन सुटि कीसि, अदुल्लामु नगुडे मंवल हीरा इंवल माय्ननगा मंले, सोत्तोर.

2 अगा वोर कनान जातितोर सूया इंवना पेडिन तोडो मर्मिङ आतोर.

3 अद पीटे मन्जि, मोड्डन जल्मा सीता.

ते वोर मोड्डना पोरोल येरु इन्जेर दोस्तोर.

4 अद उंडे उंदि जोका पीटे मन्जि, मोड्डन जल्मा सीता.

ते वोर मोड्डना पोरोल वोनन इन्जेर दोस्ता.

5 यूदल कजिब इंवल नगुडे मनेके, अद उंडे वोरोर मोड्डन जल्मा सीसि, वोना पोरोल सेलल इन्जेर दोस्ता.

6-7 यूदल तंवोर मडनोर मरि येरुन, तामरु इंवल पेडिन तोडो मर्मिङ कीतोर.

वेर मरि येहोवा बगवंतना नदुडे पापेस्तल आता काड्कि, बगवंतल वोना जीवा येत्तोर.

8 अस्के यूदल नट्पे मरि वोनंतुन सङा, “सेर्न्डुना दर्मा जर्गुसिय्ले, तङेन तुङा अनि नी तादना संतांदुन निपुसा” इन्जेर इत्तोर.

9 बति पुट्वल संतान तंवा आयो इन्जेर वोनंतुन टावा.

अदेन साटि तङेन सङा मींड्वल हर गट्का, तादना संतांदुन निपुस्वा इन्जि, वोर तंवा विजतुन बोमितगा तुह्ंदुर.

10 इदेन हिंदल बगवंतल वोनंता गिर जीवा येत्तोर.

11 अस्के यूदल तंवुर मोदोडुर मरकुन दाते सेलल गिर सानुर इन्जि, तंवा कोरियड तामरुन सङा, “नावोर सेव्टतोर मरि डियोर आनल वेरि, नी सेड्मिते सोन्जि पाट आय्वक मन” इन्जेर वेह्‍तोर.

ते अद सोत्ता.

कोर्यड मामहरिन पसि किय्वल

12 वेले रोज्क आता पेजे, यूदना बाय्को सूयना मियड मार्ता.

अव दुक्सतङ दिवोस्क मार्ता पेजे, अदुल्लामियतोर हीरा इंवल सोप्तन सङा, यूदल तिम्नातु इंवल नाटे तंवङ गोरेना बूरा कत्रि किय्वलिर्गा सोत्तोर.

13 मामहरि तंवङ गोरेना बूरा कत्रि कियुस्ले, तिम्नातु सोन्जेर मंतोर इन्जेर तामरुन करे माता.

14 अस्के अद, “सेलल डियोर आतोर.

तेर बति तंवा सङा मर्मिङ किय्मकि” इन्जि, तंवा रांडे कप्डि कुडुस्ता.

अनि दुस्रो कप्डि पोंड्सि, मोकोम दिस्वक्ने मुच्चि, तिम्नातु सोंवल सर्दगा मंवल येनयिम नाट्ना गेट्नगा सोन्जि उत्ता.

15-16 यूदल तान सूड्सि, अद मोकम मुच्चि मत्ता काड्कि, तंवा कोरियड इन्जेर करि किय्मकि.

ते बदेय लन्जे इन्जि, “निह्‍गा मींड्का वरा” इन्जेर तान सङा इत्तोर.

ते अद, “ना सङा मिंड्तेतेके नाक बतल सींति?” इन्जेर पूसि कीता.

17 अस्के वोर, “नना मंदतल उंदि हेरे पिला सारि कींतोन” इन्जेर इत्तोर.

ते तामरु, “अद सीनल वेरि बतल तेर आंवल इरा” इन्जेर इत्ता.

18-19 ते यूदल, “नना निह्‍गा बतल आंवल इर्का?”

इन्जेर पूसि कीतोर.

ते अद, “नीवा पोरोल मंवल मुद्दा अनि केय्दा बेड्डे सीम” इन्जेर इत्ता.

अस्के वोर अवेन सीसि, तान सङा मींड्तोर.

अद आता पेजे, अद तेच्चि रोन सोत्ता अनि तना पोंड्ता कप्डि कुडुसि, रांडे कप्डि पोंड्ता. अद तीर्दे वोन हिंदल तामरु पीटे रेहे माता.

20 ते यूदल अद वेय्लोनगा इर्तङ आंवलिकुन तर्ले तंवोर सोप्तल हीरन तोडो हेरे पिला सीसि रोह्‍तोर.

बति अद वेय्लो वोन दिस्मकि.

21 ते वोर, “येनयिम नाट्ना सरदुन बग्ला उच्चि मत्ता, अद बोगम-सानि बगा मंता?”

इन्जेर अगटुरकुन पूसि कीतोर. ते वूर “इगे बदे लन्जे सेले” इन्जेर इत्तेर.

22 ते वोर यूदनगा मल्सि सोन्जि, “अद नाकुन दिस्मकि अनि अद नाट्नुर गिर इगे बदे लन्जे सेले इत्तेर” इन्जेर वेह्‍तोर.

23 अस्के यूदल, “इचुला!

ननते हेरे पिला रोह्‍तोन.

बति अद नीकुन दिस्मकि.

उंडे उंदि जोका सोत्तेके वूर माकुन सूड्सि कवंतेर. अदेन साटि, अव आंवलिकुन तान्गने इरा सीम” इन्जेर इत्तोर.

तामरु पीटेते मंवल गोस्टि करे माय्वल

24 मूंद महिनङ आता पेजे, “नी कोरियड तामरु लन्जेतनम कीसि, पीटेते मंता” इन्जेर यूदन करे माता.

अस्के वोर, “तान बह्‍रि वोसि डुंडुसना” इन्जेर इत्तोर.

25 ते तान बह्‍रि तर्नेके, अद तंवोर मामनगा अव आंवलकुन रोह्‍चि, “इव बोनङ आंदुङो, वोन हिंदले पीटेते मंतोन.

पोरोल मंवल मुद्दा अनि केय्दा बेड्डे बोना आंदुयो दया कीसि, वोड्कि कीम इन्जेर वेहट” इत्ता.

26 यूदल अवेन वोड्के मासि, “नना ना मरि सेलन तान सिय्मकि.

अदेन साटि, अद नाक्तेर बे-कसुर वाले आंद” इन्जेर वेह्‍चि, उंडे बस्केन तान सङा मींड्मकि.

27 तामरु जल्मा सिय्वल गट्कते येमलिर पीटेते मत्तेर.

28 अद जल्मा सीनेके वोरोर तंवा केय बह्‍रि चह्‍तोर.

ते सोने-वोतड वोना केय्दगा रगल नूल दोह्‍चि, “वेर मोदोल बह्‍रि वातोर” इन्जेर इत्ता.

29 बति वोर तंवा केयदुन रोपो ऊम्तोर.

ते वोनोर तमुर मोदोल जल्मा आतोर.

अस्के सोने-वोतड, “निमे बहन डग्लि कीसि वाति?”

इन्जेर इत्ता. अदेन साटि वोना पोरोल पेरेसु^* इन्जेर उत्ता.

30 अद आता पेजे, केय्दगा रगल नूल दोह्‍चि मंवल मोड्डल जल्मा आतोर.

ते वोना पोरोल जेरहु^* इन्जेर उत्ता.