योसेप कन्ज्क्वल
37
1 याकोब तंवोर बाबो पिसि मत्ता कनान देस्ने पिसेर मत्तोर.
2 याकोब्ना कुटुंबतगा जर्ग्तङ गोस्टिङ: योसेपुन सत्रा (17) साल्क्ना वहि मनेके, तंवुर तादलिर (इत्तेके बाबो पाट आतङ वेलक बिल्हल अनि जिल्पनुर मरकुन) सङा हेरेङ-गोरेनङ मंदङ मेह्चेर मंदुर.
अस्के योसेप वूर कीतङ करब काम्क्ना कय्पतुन तंवोर बाबोन वेह्ंदुर.
3-4 याकोब (इज्रयेल) वेडिल-पांदे मनेके, योसेपुन मिय्तोर.
अदेन साटि, सम्दिर मरकुन तेर अदिक वोन लाड कीसि, वोन साटि बेय सोबता आङ्डे कोटुस्तोर.
इदेन हिंदल तम्वोर बाबो तमकुन तेर अदिक वोने चोकोट लाड कींतोर इन्जि, वोन पोरो वूर पगा पिय्सि, वोना चोकोट-वायुट गिर पूसि किय्वेके सोंदिर.
5 योसेपु उंदि नर्का कन्ज्काटेने दिस्ततुन तादलिरकुन वेह्तोर.
ते तान हिंदल वोन पोरो उंडे वेले पगा पिय्तेर.
6 वोर वूरकुन सूड्सि, “नाकुन कन्ज्काटेने दिस्ततुन दया कीसि मिरट केन्जट.
7 अद बतल इत्तेके मरट वाव्टे गोह्क्ना पंटा कोय्सि कट्टङ दोह्चेर मत्तट.
नावा कट्टा तेच्चि निल्ता.
ते मीवङ कट्टङ ना कट्टत सिर्मुट आसि काल कर्तङ” इन्जेर इत्तोर.
8 अस्के वोनुर तादलिर, “निमे करलेने मा पोरो राज ताकुसीकि कि?
मा पोरो अदिकारिनि आसि मंद्किय?” इन्जेर पूसि कीतेर. वोर कन्ज्क्ततुन अनि वेह्तङ गोस्टिन पिय्सि, वोन पोरो उंडे वेले पगा पिय्तेर.
9 वोर उंडे उंदि जोका कन्ज्क्सि, तंवुर तादलिर सङा, “इचुला!
नाक उंडे उंदि कला दिस्ता. तान्गा पोड्द, नेलेन्ज अनि अक्रा (11) सुकुक नावङ काल कर्तङ” इन्जेर वेह्तोर.
10 वोर अदेन तंवोर बाबोन अनि तादलिर सङा वेह्ता पेजे, बाबो वोन सङा “निम कन्ज्क्ता अद बतल आंद? नना अनि नीवा बेये उंडे नीवुर तादलिर तप्वक वासि, नीवङ काल्क करंतोम बतल?” इन्जेर वोन दम्कि सीतोर.
11 वोनुर तादलिर वोन पोरो कुटा कुटा मत्तेर.
बति वोनोर बाबो अद कलतुन बारेते सोन्च कीसेर मंदुर.
योसेप तादलिर्क सूड्ले दोतंतगा सोंवल
12 उंदि दिया वोनुर तादलिर सेकेम्नगा बाबोना मंदा मेह्ले सोत्तेर.
13 अस्के याकोब योसेपुन सूड्सि, “नी तादलिर सेकेम्नगा मंदा मेह्चेर मंतेर.
नीकुन वूर्गा रोहंतोन वरा” इन्जेर इत्तोर.
ते वोर “दांतोन” इन्जेर इत्तोर.
14-15 अस्के बाबो, “निमे सोन्जि नी तादलिरा अनि मंदता चोकोट-वायुट्ना गोस्टि करि कीसि, कबुर पिय्सि वरा” इन्जेर वेह्चि हेब्रोन गोंदितल वोन रोह्तोर.
ते वोर सेकेम्नगा वासि, हिके-हके तिरिसेर मनेके, वोरोर मायनल वोन सूड्सि, “निमे बतङ मह्कंति?” इन्जेर पूसि कीतोर.
16 ते, “नना ना तादलिरकुन मह्कंतोन.
वूर बगा मंदा मेह्चेर मंतेरो दया कीसि नाकुन वेहा” इन्जेर इत्तोर.
17 अद केन्चि वोर मायनल, “इगेटल सोत्तेर.
वूर ‘दोतंतेके दाकट’ इनेके केन्ज्तोन” इन्जेर वेह्तोर.
अस्के योसेप तंवुर तादलिरकुन मह्क्सेर सोन्जि, दोतंतगा वूरकुन पुटुस्तोर.
योसेपुन पोरो पगा येत्वल
18 योसेप करुम वाय्वक मनेके, तादलिर लङ्नले सूड्सि, वोन जक्ले, इहिन पिलन वाड्तेर.
19 “इचुलट! कन्ज्क्वल वासेर मंतोर.
20 वोन जक्सि, इगे मंवल उंदि कोल डोडोतगा वाट्सि, केडता जिव्रस वोन तिता इन्जेर वेहा वचो.
अस्के वोर कन्ज्क्तङ कलङ करल आंतङ बतलो सूड्कट” इन्जेर वोरोन वोरोर वेह्तेर.
21 रूबेन अद गोस्टि केन्चि, “मरट वोन जक्वा” इन्जेर वेह्चि, वूरा केय्दगा अर्वक्ने तपुस्ले सूड्तोर.
22 बहन इत्तेके वूरा केय्दल तपुसीसि, बाबनगा वोन हव्लि कियना इन्जेर रूबेन सोन्च कीतोर.
अदेन साटि, “वोना नेतुर तुह्मट.
वोन बतय किय्वक, केडते मंवल इद डोडोतगा वाटट” इन्जेर वूरकुन वेह्तोर.
23 योसेप तंवुर तादलिर्गा वाता पेजे, वोन गचेङ-गुचेङ कीसेरे, वोर केर्सि मत्ता अद कमल्ता आङ्डेतुन तेंड्तेर.
24 अनि वोन पिय्सि, येर सेले अद कोल डोडोतगा वाड्तेर.
तादलिर योसेपुन वोम्वल
25 अनि वूर जेवुन किय्ले उत्तेर.
अस्के कड्क तह्चि सूड्नेके, इस्मयेलिर गिलादु नगुडल हूटक्ने वासेर दिस्तेर.
अवेन पोरो बारितङ अनि तीर-तीर्दङ मरक्नङ चीज्क वाट्सि, वूर ईजिप्ट देस्ने वोम्ले सोन्जेर मत्तेर.
26 अस्के यूदल, “मरट मा तमुन जक्सि मकुस्तेके, माकुन बतल पाय्दा?
27 वीर इस्मयेलिरकुन वोम्कट वरट.
वोर मा तोडो पुड्तोर तमुर आंदुर.
वोन बतय किय्वा” इन्जेर तमुर-तादलिर सङा इत्तोर.
ते वूर वोप्तेर.
बेपरि-दार्क्ना केय्दे योसेपुन वोम्वल
28 वूर* बेपरि दारलिर करुमनल वीड्नेके, वूर्गटल वीसा* (20) कूरतङ बिलङ तादलिर येत्तेर अनि अद डोडोतल योसेपुन तेंड्सि, वूरकुन वोम्तेर.
ते वूर इस्मयेलिर योसेपुन ईजिप्ट देस्ने वोतेर.
29 जुलुक आता पेजे, रूबेन अद डोडोतगा वासि, सूड्तोर.
अस्के वोन योसेप अगा दिस्मकि.
ते दुक्सते तंवङ कप्डिङ सरुस्तोर.*
30 तंवुर तमुक्नगा मल्सि सोन्जि, “अगा चुड्डोर सेलोर! अय्यो, इङे नना बतल कीका?” इन्जेर इत्तोर.
31 ते वूर उंदि हेरे पिलत जक्सि, ताना नेतुडगा योसेप्ना आङ्डेतुन मुडुस्तेर.
32 अनि अदेन बाबोनगा तचि, “इद माकुन पुड्ता.
इद नीवोर मरिना आंदुयो, आयोयो वोड्कि कीम” इन्जेर इत्तेर.
33 बाबो आङ्डेतुन वोड्कि कीसि, “इद ना मरिनये आंद.
बद्दो केडता जंवर वोन जक्सि, करलेन टुक्डेङ कीता” इन्जेर आड्तोर.
34 याकोब दुक्सते तंवङ कप्डिङ सरुसि, तंवा नडिदुन गोना पोते गूंडि कीसि, वेले रोज्क मरिन साटि आड्सेर मत्तोर.
35 वोनुर मरि-मियड सम्दिर सुम्जि किय्ले कोसिद कीतेर, बति वोर सुम्जे माय्मकि.
“नना सानल वेरि, ना मरिन साटि दुक्सते आड्सेरेन मंदंतोन” इन्जेर इत्तोर.
36 अद गट्कते इस्मयेलिर, योसेपुन ईजिप्ट्नगा वोसि, पोतिपरदुन वोम्तेर.
वेर पोतिपर परो राजना महलतुन केप्वलिरोर अदिकारि आंदुर.