इसकुन पसि कीसि याकोब आसिर्वाद येत्वल
27
1 इसक मात्रल आता पेजे, वोना नदुर कमि आता.
उंदि दिया इसक तंवोर मडनोर मरि येसवुन केयुसि, “ना मरि!”
इन्जेर इत्तोर. ते वोर, “वेहा बाबा” इन्जेर जवब सीतोर.
2 अस्के इसक, “सूडा, नना मात्रना आतोन.
नावा परन बस्के दांतयो, नाकुन टावा सेले.
3 अदेन साटि नी बान अनि बान-कोलङ पिय्सि सोन्जि, ना साटि सिकरि कीसि, सविङ तरा.
4 नावा परन सुटि कियन मोदोल नीकुन आसिर्वाद सींतोन.
नाकुन पसंद वाततुन अट्सि, नना तिंदन साटि नह्गा पिय्सि, वरा” इन्जेर वेह्तोर.
5 ते येसवु सविङ तरन साटि सिकरि किय्ले, सोत्तोर.
रिब्कल पिलन तीर याकोबुन तयर किय्वल
इसक येसवुन सङा अहन वेह्नेके, रिब्कल मक्सि केन्ज्ता.
6-7 ते रिब्कल तंवोर मरिन सङा, “याकोब केन्जा! नी बाबो, नी दादल येसवुन सङा, ‘नावा परन सुटि कियन मुने, येहोवा बगवंतना चर्नते नीकुन आसिर्वाद सीनल ना साटि सिकरि कीसि, सविङ तचि जेवुन तयर कीम’ इन्जेर वेह्नेके नना केन्ज्तोन.
8 अदेन साटि ना मरि, ना गोस्टि केन्चि, नना वेह्तप कीम.
9 निमे मंदतगा सोन्जि, ताज्यलिक रंड चुडुक बक्रन पिय्सि वरा.
नी बाबोन पसंद वाता तीर अवेन अट्सि, वोन साटि जेवुन तयर कींतोन.
10 अदेन निमे बाबोनगा वोया लागर.
अस्के वोर परन सुटि कियन मोदोल अदेन तिन्जि, नीकुन आसिर्वाद सीनुर” इन्जेर वेह्ता.
11 ते याकोब तंवा अवल रिब्कन सङा, “ना तादल येसवुन, मेंदोल-मेन बूरङ मंतङ.
बति नावा मेंदोल वोन दात सेले.
12 उंदि मोका ना बाबल नाकुन इट्सि सूडनुर, अस्के नना तनकुन पसि कीसेर मंतोन इंवल करि कींतोर.
अद गट्कते आसिर्वादुन बद्लि, सापेनय ना तलत पोरो वांता” इन्जेर इत्तोर.
13 तेर बति, वोना अवल, “ना मरि, अद सापेना ना पोरो वायि.
निमे ना गोस्टि केन्जा अनि सोन्जि बक्रन नह्गा पिय्सि वरा” इन्जेर वेह्ता.
14 ते याकोब सोन्जि, अवेन तचि सीतोर.
रिब्कल तंवोर माड्सोन पसंद वाता तीर अट्ता.
15 अचोरे आय्वा येसवु पोंड्वलिक चोकोट्नङ कप्डिन रोतल तचि, चुडुर मरि याकोबुन पोंडुसीता.
16 अनि अव बक्रनङ तोल्क्ने, वोनङ केयकुन अनि गोटितुन मुच्ता.
17 अद आता पेजे, अट्ता कुस्रि अनि सारिन तंवोर मरि याकोब्ना केय्दे सीता.
इसक याकोबुन आसिर्वाद सिय्वल
18 ते वोर बाबोनगा वासि, “बाबगो” इन्जेर केय्तोर.
अस्के इसक, “बतल कोको, निमे बोनि आंदि?” इन्जेर पूसि कीतोर.
19 ते याकोब, “नना नीवोर मडनोर मरि येसवुना आंदुन.
निमे वेह्तपे नना कीतोन.
निमे नाकुन आसिर्वाद सिय्ले, दया कीसि तेच्चि उदा अनि नना सिकरि कीसि, अट्सि तत्तङ सविङ तिन” इन्जेर वेह्तोर.
20 अस्के इसक, “ना मरि, नीकुन इचोर वेय्ने बहन सिकरि आता?”
इन्जेर पूसि कीतोर. ते वोर, “नीवोर येहोवा बगवंतले इहिन जर्गुसीतोर” इन्जेर जवब सीतोर.
21 अस्के इसक, “करुम वरा कोको.
असल निमे ना मरि येसवुनि आंदि कि आय्वि इंवल नीकुन इट्सि करि कीका” इन्जेर इत्तोर.
22 अस्के याकोब तंवोर बाबो इसकुन करुम सोत्तोर.
इसक वोन मेस्क्सि सूड्सि, “लेङ्ते याकोब्ना आंद.
बति केय्क मात्रम येसवुनङे आंदुङ” इन्जेर इत्तोर.
23 याकोब्नङ केय्क येसवुनङ केयकुन दात बूरने मत्ता काड्कि, इसक वोड्के माय्वक वोन आसिर्वाद सिय्ले तयर आतोर.
24 बति उंडे उंदि जोका, “निमे करल ना मरि येसवुनिय आंदि कि?”
इन्जेर पूसि कीतोर. ते याकोब, “हो, ननय आंदुन” इन्जेर जवब सीतोर.
25 अस्के इसक, “ना मरि, अद जेवुन नह्गा पिय्सि वरा.
निमे सिकरि कीसि अट्सि तत्ता तिन्जि, नीकुन आसिर्वाद सींतोन” इन्जेर वेह्तोर.
ते याकोब अद जेवुन तचि, बाबोन सीतोर.
अस्के इसक तिन्जि, आङुर्क्ना रसा गिर उटोर.
26 अनि बाबो, “ना मरि, करुम वासि नाकुन कलिया” इन्जेर इत्तोर.
27 ते याकोब तंवोर बाबोनगा सोन्जि कलितोर.
अस्के इसक वोनङ कप्डिना गाडि येच्चि, वोन आसिर्वाद सीसेर;
“इचुला! ना मरिना गमा गमा गाडि येहोवा बगवंतल आसिर्वाद सीता बोमिता वासुन दात मंता.
28 बगवंतल दर्तुरित पोरो बेय वेले दानङ,
अनि आङुर्क पंडुस्ले, बर्पुर पिर्क अरुसंतोर.
29 वेलेटिर लोकुर नीकुन अनि नी संतांदुन सेव्कलिर आनिर अनि नीकुन मानि कीनिर.
नीवा चुटम-बंदुन पोरो राज ताकुसीकि.
नीवुर तादल-तमुर नीवङ काल्क करनिर.
नीकुन सापेना सिय्वलिर्क सापेना वांता.
नीकुन आसिर्वाद सिय्वलिर्क आसिर्वाद वांता”
इन्जेर इत्तोर.
येसवु बाबोन आसिर्वाद तल्क्वल
30 इसक याकोबुन आसिर्वाद सिय्वल आता पेजे, तंवोर बाबोनगटल सोत्तोर.
अदे गट्कते येसवु सिकरितल वातोर.
31 ते वोर गिर बाबोन पसंद वाता तीर जेवुन अट्सि, तत्तोर.
अनि, “बाबगो, तेदा! नी मरि सिकरि कीसि तत्तङ सविङ तिन्जि, नाकुन आसिर्वाद सीम” इन्जेर इत्तोर.
32 इसक तंवोर मरिन तोडो, “निमे बोनि आंदि?”
इन्जेर पूसि कीतोर. ते वोर, “नना नीवोर मडनोर मरि येसवुना आंदुन” इन्जेर वेह्तोर.
33 अस्के इसक तरतरा आसेर गाब्रे मासि, “तेन मोदोले सिकरि कीसि, सविङ नह्गा पिय्सि वाय्वल बोर आंदुर?
निमे वाय्वक मुनेने अवेन तिन्जि, वोन आसिर्वाद सीतोन. वोन बगवंतल करेलेन आसिर्वाद सींतोर” इन्जेर इत्तोर.
34 ते येसवु तंवोर बाबोनङ गोस्टिङ केन्चि, दुक्सते जोर्ते किलिसि, “बाबगो! नाकुन गिर आसिर्वाद सीम” इन्जेर आड्तोर.
35 बति इसक, “नी तमुर पसि कीसि, नीकुन वाय्वल आसिर्वादुन येत्तोर” इन्जेर वेह्तोर.
36 अस्के येसवु, “वोना पोरोल याकोब* इंवल बरोबर कड्ता.
बारितेके नाकुन रंड जोकङ पसि कीतोर.
मोदोल नावा जल्मता हकुन ऊम्तोर.
अनि इंके नाक वाय्वल आसिर्वादुन गिर येत्तोर” इन्जेर इन्जि, “ना साटि उंडे बदे आसिर्वाद मेय्सि सेले कि?” इन्जेर पूसि कीतोर.
37 ते इसक, “ना मरि, नीकुन आसिर्वाद सिय्ले बदे मेय्सि सेले.
दानङ, अनि आङुर्क पंडुस्वल आसिर्वाद गिर वोने सीतोन.
वोर नीकुन माल्कल आंतोर.
अनि सम्दिर चुटल-बंद गिर वोनुर सेव्कलिर आंतेर” इन्जेर येसवुन तोडो इत्तोर.
38 ते येसवु, “बाबगो! निह्गा मात्रम उंदिय आसिर्वाद मंता कि? नाकुन गिर आसिर्वाद सीम” इन्जेर, बाबोन सङा वेह्चि, येसवु जोर्ते आड्वल सुरु कीतोर.
39 ते इसक,
“निम मंवल बोमि चोकोट मनो.
पोरोडल पिर गिर अरो.
40 निमे बस्केट्क लडेय कीसेर पिसंति.
नी तमुन सेव्कनि आंति.
बति बस्केते निमे वोन उल्टा तिरियंतियो,
वोना अदिकार्दल सुटे मांति*”
इन्जेर येसवुन वेह्तोर.
41 ते अस्केडल येसवु बाबो तमुन सीता आसिर्वादुन हिंदल, याकोबुन पोरो पगा पिय्तोर.
अनि येसवु, “ना बाबोना मरंता दिवोस करुम वासेर मंता.
अद आता पेजे, नावोर तमुर याकोबुन जकंतोन” इन्जेर इत्तोर.
42 मडनोर मरि येसवु इंवलिक गोस्टिङ वोरोर मायनल केन्चि, रिब्कन वेह्तोर.
ते तंवोर चुडुर मरि याकोबुन केयुसि, वोन सङा, “इचुला! नी तादल येसवु नी पोरो पगा पिय्सि, नीकुन जकंतोन इन्जेर मंतोर.
43-45 अदेन साटि ना मरि नावा गोस्टि केन्चि, निमे तेच्चि, हारन इंवल नगुडे मंवल नावोर दादल लाबंतगा परर आसि, वेय्ने सोन.
नीवोर दादना सोङ रेयनल वेरि, निम कीतङ अव सम्दो वोर मरुङनल वेरि अगन कहि साल्क मन.
अस्के नीकुन अगटल केयुसंतोन.
उंदि दियत रोपो मी इविरकुन टूटे माय्वल नाकुन इस्टम सेले” इन्जेर इत्ता.
46 अद आता पेजे, रिब्कल इसकुन सङा, “हेतु जातितङ इव कोर्यकुन हिंदल नावा परन वीटुन वाता.
याकोब गिर इद देस्नङ हेतु जातितङ बवे पेकिन तुङनुर्ते, नना पिसि मंवडुन तेर साय्वल नयम” इन्जेर वेह्ता.