अबिमेलेकुन इसक लबड वेह्वल
26
1 अब्राहम पिसि मनेके, अर्सि मत्ता आतले करु उंडे उंदि जोका अद देसेम्नगा अर्ता.
अस्के इसक, गेरार नगुडगा मंवल पिलिस्तियुल्क्ना जातितोर राजल अबिमेलेक्नगा सोत्तोर.
2 बारितेके, येहोवा बगवंतल अदेन मुनेने इसकुन पावे मासि,
“निमे ईजिप्ट देस्नगा सोंवक्ने, नना वेह्वल गेरारतगा पिस्ले सोन.
3-4 अद येरियतगन पिसा.
नना नीकुन सात मन्जि, आसिर्वाद सींतोन.
बहन इत्तेके, नीवोर बाबो अब्राहमुन सीता वाग्दंतुन पूरि कींतोन.
नीकुन, नीवा संतांदुन इव सम्दो येरियन सीसि, नना नीवा संतांदा जनोबा हाबडङ सुकुकुन दात बडि कींतोन.
अनि वूरकुन इव येरियन सींतोन.
नीवा संतांदुन हिंदल बोमित पोरोडङ सम्दो जातिङ आसिर्वाद येतनुङ.
5 बारितेके, अब्राहम नना हुकुम सीता तीर सम्दो कीतोर” इन्जेर वेह्तोर.
6 ते इसक गेरार इंवल नगुडेन रोके मातोर.
7 अगटुर माय्नलिर वोना बाय्कोन सूड्सि, “अद बद आंद?”
इन्जेर वोन पूसि कीतेर.
ते वोर, “अद नावा सेलड आंद”+ इन्जेर वेह्तोर. बारितेके, रिब्कल बेय सोबते मत्ता काड्कि, तान हिंदल नाकुन जकनिर इन्जि, अद नावा बाय्को आंद इन्जेर वेह्ले वेरितोर.
8 अगा वोर वेले रोज्क मत्ता पेजे, उंदि दिया पिलिस्तियुल्क्नोर राजल अबिमेलेक, उंदि किड्कितल सूड्नेके, इसक तंवा बाय्को रिब्कन सङा लाड-गोडिते गोरिङ आसेर दिस्तोर.
9 अस्के अबिमेलेक इसकुन केयुसि, “इद ते, नीवा बाय्को आंद.
इदेन नीवा सेलड इन्जेर बारि वेह्ति?”
इन्जेर पूसि कीतोर. ते इसक वोन सङा, “तान हिंदल नना साय्वल गट्का वांता बतलो इन्जि वेरितोन” इन्जेर वेह्तोर.
10 अस्के अबिमेलेक, “निमे माकुन इहिन बारि कीति? उंदि मोका मा जातितल बोरे वोरोर तान सङा मींड्मड इत्तेके, निमे मा तलत पोरो पापुन तचि इर्ंदि” इन्जेर इसकुन दम्कि सीतोर.
11 अनि अबिमेलेक, “वेर माय्नन सेलेके वेना बाय्कोन बोरे बतय कीकिट्ते, मरंता सिक्सा तप्वक बोगे माया लागर” इन्जेर तंवा पर्जतुन हुकुम सीतोर.
इसक दनेवंतल आय्वल
12 इसक वाव्टे विजा वीत्तोर.
ते येहोवा बगवंतल आसिर्वाद सीता काड्कि, अद सालदुन नूर पाल्क पंटा अदिक पंडुस्तोर.
13 इद तीर्दे उंडे गिर वोना दन-दव्लत वेले बडे मासेरेन सोत्ता.
ते वोर बेय डगुर दनेवंतल आतोर.
14 वोन हेरेङ-गोरेनङ मंदङ, मूरनङ मंदङ अनि वेलेटिर दासिर गिर मत्तेर.
अदेन साटि पिलिस्तियुल्क सम्दिर वोन पोरो बेय कुटा कुटा मत्तेर.
15 इसक्नोर बाबो अब्राहम मोदोल तंवुर सेव्कलिर सङा काचुस्तङ कुहिन पिलिस्तियुल्क तोडिते मुह्चि वाट्तेर.
16 अस्के अबिमेलेक इसकुन तोडो, “निमे माक्तेर अदिक सक्ति वालेनि आंदि.
अदेन साटि निमे इद देसनल पेसिसि, सोन” इन्जेर इत्तोर.
इसक कुहिङ ताडुस्वल
17 ते इसक अद नगुडल पेसिसि, गेरार लोदितगा डेरा वाट्सि, अगा मत्तोर.
18 अस्के तंवोर बाबो अब्राहम्ना गट्कते काचुस्तङ येतङ कुहिन ताडुस्तोर.
बारितेके, अब्राहम मार्ता पेजे, पिलिस्तियुल्क अवेन मुह्चि मत्तेर.
अवेकुन तंवोर बाबो इर्तङ पोरोल्कुने इर्तोर.
19 अनि इसक्नुर सेव्कलिर अद लोदितगा काच्चेर मनेके, चोकोट्ना जला वाले कुहि पुट्ता.
20 बति गेरार नगुडेर गाय्किर इसक्नुर गाय्किर तोडो जग्डा कीसि, “इद येर मावा आंद” इन्जेर इत्ता काड्कि, अद कुहितुन ‘येसेक’* इंवल पोरोल इर्तोर.
21 इसक्नुर सेव्कलिर उंडे उंदि कुहि काच्तेर.
तान साटि गिर वूर जग्डा कीतेर.
अदेन साटि वोर तान “सित्ना”* इन्जेर पोरोल इर्तोर.
22 इसक अगटल दुस्रो जागते सोन्जि, उंडे उंदि कुहि काचुस्तोर.
तान साटि जग्डा किय्ले बोरे वाय्मकि.
ते इसक अद कुहितुन ‘रेहबोत’* इन्जेर पोरोल इर्तोर.
अनि वोर, “इंके इद जागतुन येहोवा बगवंतल माकुन सीतोर.
इगे मरट सुद्रे मासि बडे माकट” इन्जेर इत्तोर.
23 अगटल इसक बेर्सेबा इंवल नाटे सोत्तोर.
24 अदे नेटि नर्का इसकुन येहोवा बगवंतल पावे मासि, “नना नी बाबो अब्राहम्नोर बगवंतना आंदुन.
नना नी सङा मंतोन.
अदेन साटि निमे वेरिमा.
ना सेव्कल अब्राहमुन हिंदल नीकुन अनि नीवा संतांदुन आसिर्वाद सीसि बडि कींतोन” इन्जेर इत्तोर.
25 अस्के इसक अगा बंडने बोव्ला तयर कीसि, येहोवा बगवंतना पोरोडे पार्तना-विंति कीतोर.
अनि इसक अद बेर्सेबतगन तम्वङ डेरङ वाटुसि, तंवुर सेव्कलिरा केय्दे उंडे उंदि कुहि काचुस्तोर.
26 उंदि दिया गेरार्तल अबिमेलेक राजल, राजन सूचना किय्वल अदिकारि अहुजतु अनि लडेय किय्वलिरोर डगुर अदिकारि पीकोलु इसक्नगा वातेर.
27 ते इसक वूरकुन सूड्सि, “ना पोरो पगा पिय्सि, मिह्गटल नाकुन टेंड्सि पूड्तिट अनि इंके नह्गा बारि वातिट?” इन्जेर पूसि कीतोर.
28 ते वूर, “येहोवा बगवंतल नीकुन सात मंवल सूड्तोम.
अदेन साटि माकुन अनि नीकुन नड्डुम उंदि नियम मंदना.
29 ममोट नीकुन बतय तक्लिब सिय्वक्ने कुसितेन सारि कीतोम.
अदेन साटि निमे गिर माकुन तक्लिब सियोन इन्जेर वाग्दन कीम.
नी पोरो येहोवा बगवंतना आसिर्वाद मंता इंवल तात्कर दिसेर मंता” इन्जेर इत्तेर.
30 अस्के इसक वूरकुन जेवुन सीतोर.
ते वूर सम्दिर तित्तेर.
31 तेलरि सक्रेन वूर तेच्चि, वोरोन्क वोरोर वाग्दन कीतेर.
अस्के इसक वूरकुन सारि कीतोर.
ते वूर कुसि-रजिते सोत्तेर.
32 अदे दिवोसुन नेटि इसक्नेर सेव्कलिर वासि, “ममोट काच्ता कुहितगा येर अर्ता” इन्जेर वेह्तेर.
33 अदेन साटि तान ‘सेबा’* इन्जेर पोरोल इर्तोर.
ते इंकेट गिर अद नाटुन बेर्सेबा* इन्जेर केयंतेर.
येसवुनङ बाय्कोक