पुट्गड्मि 28

याकोब मर्मिङ आय्ले पेडिन मह्‍क्वल

1 अस्के इसक याकोबुन केयुसि, “निमे इद कनान देस्नङ पेकिनल बदेने तुङ्वा.

2 निमे तेच्चि, पदना-आरम^* इंवल येरियते मंवल, नी अवनोर बाबो बेतुयेल्ता रोन सोन.

अगा सोन्जि नी अवनोर तादल लाबंतङ मियकनल उंदितुन तुङा” इन्जेर वोन हुकुम सीतोर.

3 अनि, “सर्वसक्ति वाले बगवंतल, नीकुन आसिर्वाद सीसि, वेले मरि-मियड सियना.

नीवा संतान पग्रे मासि, वेले कांदान्क आयना.

4-5 अब्राहमुन इद देसुन सींतोन इन्जेर आसिर्वाद सीता तीरे, वोर बगवंतल नीकुन अनि नीवा संतांतुन गिर सियिर” इन्जेर आसिर्वाद सीसि, वोन रोह्‍तोर.

ते वोर पदना-आरम इंवल येरियतोर लाबंतगा सोंले पेसितोर.

वेर लाबन, बेतुयेल्तोर मरि अनि रिब्कनोर तादल आंदुर.

येसवु इस्मयेल्ता मियडुन तुङ्वल

6-7 अस्के येसवुन तंवोर तमुन बारेते, “निमे कनान देस्ना बदे पेडिन तुङ्वा” इन्जेर, बाबो आगे सीसि, पदना-आरम इंवल येरियते मर्मिङ आय्ले, वोन रोह्‍तोर.

ते याकोब बेये-बाबल वेह्‍ता तीर, अगा सोत्तोर इंवल गोस्टि करे माता.

8 इदे आय्वा, तंवुर पेकुर कनान देस्नङ पेकिन तुङ्वल⁺ बाबोन पसंद सेले इंवल गिर येसवुन अर्तम आता.

9 अदेन साटि येसवु तन्गा मंवलिक मोदोडङ वेय्लोके आय्वा, उंडे उंदितुन तुङ्ले, अब्राहम्नोर मरि इस्मयेलतगा सोत्तोर.

अनि वोर इस्मयेल्ता मियड नेबायोतुन सेलड आय्वल महलतुन गिर तुङ्तोर.

कलते याकोबुन बगवंतल दिस्वल

10 याकोब बेर्सेबतल पेसिसि, हारन नगुडे सोन्जेर मत्तोर.

11 वोर अहन सोन्जेर मनेके, पोड्द सोत्ता.

ते अद रात्ना येलते अगने आग्सि, तलत बूड उंदि बंडा इर्सि नरुम्तोर.

बगवंतनुर दूतलिर याकोबुन कलते दिस्वल

12 अस्के याकोबुन उंदि कला दिस्ता.

अद कलतगा तंतेल्क^* बोमितल्ते हाबर वेरि लाग्सि मत्तङ.

अव तंतेल्कनल बगवंतनेर दूतलिर वर्सेर अनि रेय्सेर मत्तेर.

13 उंडे येहोवा बगवंतल तंतेलकुन बग्ला निल्सि, “नना नी तादो अब्राहम्नोर अनि बाबो इसक्नोर येहोवा बगवंतना आंदुन.

निमे मींड्सि मंवल इद बोमितुन नीकुन अनि नीवा संतांदुन सींतोन.

14 बोमितगा मंवल उस्के कडकुन लेका परुर अहन नीवा संतान बडे मानिर.

निमे सिडयिङ-पोरयिङ अनि तेल्न्गड-कालन सम्दि नालुङ कोनकुन पग्रे मासि, इद बोमित पोरोडुर पर्जा नी हिंदल अनि नीवा संतांदुन हिंदल आसिर्वाद येतनिर.

15 इचुला!

नना नीकुन सात मन्जि, निमे सोंवल हर जागतगा नीकुन बचि कीसेर, इद देसेम्नगा नीकुन मल्सि, तरंतोन.

नना नीकुन सुटि कियोन. नीकुन सीता वाग्दन पूरि कींतोन” इन्जेर इत्तोर.

16 अस्के याकोब जोपनल चेवे मासि, “येहोवा बगवंतल करलेन इद जागतगा मंतोर.

नाकुन इद करे माचेले इन्जि,

17 इद जागा वेले वेरिनल मंता.

इद बगवंतना मंदिरे बति, दुस्रो बदे आयो.

स्वर्ग्नगा सोंवल सरि इदे आंद” इन्जेर इत्तोर.

18 सक्रे बय-बय आनेकेन याकोब तेच्चि, बगवंतल पावे मातता निसनित साटि, तना तलत बूड इर्सि मत्ता अद बंडतुन सड्कल निपुसि, तान पोरो निय सोक्तोर.

19 तोले अद जागतुन ‘लूज’ इन्जेर केय्ंदिर.

बति अद जागत वोर, ‘बेतेलु’^* इन्जेर पूना पोरोल दोस्तोर.

20-21 अस्के याकोब, “नना मल्सि ना बाबोना रोन चोकोटे वानल बगवंतल नाकुन सात मन्जि, ना यात्रतगा नाकुन बचि कीसि, तिंदन साटि चंदि, पोंडन साटि पन्चा-पाङुड सीतेके, येहोवा बगवंतल नावोर बगवंतल इन्जेर माने मंतोन.

22 अनि नना निपुस्ता इद बंडता जागा बगवंतन पार्तना-विंति किय्वल जागा आंता.

बगवंतल नाकुन सिय्वल हर चीजनल दहा (10) ईसनल उंदि ईसा बगवंतन तप्वक सींतोन” इन्जेर काल कर्तोर.