अब्राहमुन मुविर वेर्तलिर दिस्वल
18
1 अब्राहमुन येहोवा बगवंतल उंडे उंदि जोका पावे मातोर.
अब्राहम, माम्रे इंवना जागतगा मंवलिक डगुक मरकुन करुम पिसेर मनेके, उंदि दिया बार दुपरि वोर तंवा डेरता सर्दगा उच्चि मत्तोर.
2 अहन वोर तला तह्चि मुने सूड्नेके, मुव्विर माय्नलिर वोन निल्सि दिस्तेर.
वोर वूरकुन सूड्ता बरोबर, बेटे मायन साटि, डेरतल विच्चेर सोन्जि, डंडोस दोस्तोर.
3 अनि, “ना माल्कलिर्निट!
नना मी सेव्कना आंदुन. नावा मान-पान येत्वक्ने सोन्मट.
4 नना काल्क नोर्ले येर तरुसंतोन.
काल्क नोर्सि, इद मरता दड्मितगा मिरट आरम येतट.
5 मी सेव्कना इन्जेर नह्गा वाता काड्कि, मिरट तिंले काने तरंतोन.
तिता पेजे, मिरट सोंदा वचो” इन्जेर इत्तोर.
ते वूर “निम वेह्तपे कीम” इन्जेर वेह्तेर.
6 अस्के अब्राहम डेरतगा मंवल सारन्गा वेय्ने सोन्जि, “निमे मूंद अड्डेङ चोकोट्ना पिंडि पिस्क्सि, वेय्ने सारिङ सुरा” इन्जेर वेह्तोर.
7 अनि अब्राहम मूरना मंदतगा विच्चेर सोन्जि, उंदि ताज्यल पड्डतुन तचि, सेव्कनगा सीतोर.
ते वोर तान कोय्सि वेय्ने अट्तोर.
8 अस्के अब्राहम पाल, दहि, तना अटुसीता काने पिय्सि सोन्जि, वूर माय्नलिर मुने इर्तोर.
वूर तिनेके, वूर करुम अद मरत बूड वोर निल्सि मत्तोर.
9 वूर, “नी बाय्को सारल बगा मंता?”
इन्जेर पूसि कीतेर. ते, “इगेने, डेरतगा मंता” इन्जेर अब्राहम वेह्तोर.
वेर्तलिर तिनेके सारल डेरत रोपो मंवल
10 अस्के वूर्गटल वोरोर, “वाय्वल साल इदे गट्कते तप्वक निह्गा मल्सि वांतोन.
अस्के वेरि नी बाय्को सारल मोड्डन जल्मा सीसि मंदंता” इन्जेर वेह्तोर.
सारल अब्राहमुन पेजे डेरता सर्दगा निल्सि, इव सम्दो गोस्टिङ केन्चेर मत्ता.
11 अब्राहम अनि सारल इविर्ते बेय मातरि-मात्रल आतेर.
उंडे ताना मरि-मियड आय्वल वकत गिर वीड्सि सोत्ता.
12 अदेन साटि सारल तंवा तना मुसा मुसा कव्सेर, “ननते ताकद सेले अद मातरिना आंदुन.
ना माड्सो मात्रल आता पेजे गिर नाकुन उंडे ईतल आनंद्ना कार्या जर्गरिय?” इन्जेर इत्ता.
13 अस्के येहोवल अब्राहमुन सङा, “सारल बारि कव्ता?
‘नना मातरिना आतोन. नाकुन करलेन मोड्डल पुट्टनिर कि?’ इन्जेर बारि इत्ता?” इन्जेर पूसि कीतोर.
14 अनि, “येहोवा बगवंतल आय्वल नना किया परोन अद बतय मंता कि?
नना वाय्वल साल इद गट्कते निह्गा मल्सि वांतोन. सारल मोड्डन जल्मा सीसि मंदंता” इन्जेर वेह्तोर.
15 ते सारल वेरिसि, “नना कव्मकि” इन्जेर इत्ता.
ते येहोवा बगवंतल, “अहन लबड वेह्मा, निमे कव्ति” इन्जेर इत्तोर.
अब्राहम बगवंतन सवल्क पूसि किय्वल
16 अस्के वूर माय्नलिर अगटल तेच्चि, सोदोमा नगुडेके सूड्तेर अनि दांतोम इन्जेर पेसितेर.
वूरकुन सारि कीसेर, अब्राहम गिर जरसि लक सोत्तोर.
17 अस्के येहोवा बगवंतल तंवा तना, “नना किय्वल कार्वेय अब्राहमुन वेह्वक मकुसोन.
18 अब्राहम सक्ति वाले बेय डगुर जातितुन मोदोडोर बाबो आंतोर.
वोन हिंदल इद दुनियतगा सम्दि जातिनुर आसिर्वाद्क येतनिर.
19 बहन इत्तेके, वोन नना नेमि कीतोन.
वोर तंवा मरि-मियडुन अनि तङ्मरि-तङ्मियक सम्दिरकुन, नावा सते सरि-मारग्ने चोकोटे ताकुसंतोर.
इद तीर्दे अब्राहमुन सीता वाग्दन पूरि कींतोन” इन्जेर वेह्तोर.
20 अनि येहोवल अब्राहमुन सङा, “सोदोमा अनि गोमोरा नगुक्नेरा पाप जास्ति आता.
अद पाप्ना नांद नना केन्ज्तोन.
21 अद केन्ज्ततुन पिय्सि, वूर करल अचोर वेले पाप कीतेर कि सेले इंवल रेय्सि सोन्जि, करि कींतोन” इन्जेर वेह्तोर.
22 मुविर्गटल इविर सोदोमतेके सोत्तेर.
बति येहोवल अब्राहमुन सङने मत्तोर.
23 अस्के अब्राहम येहोवा बगवंतन करुम सोन्जि, “निमे करेबलिर बरोबर, नियत्नुरकुन गिर करलेन नासेडम कींति कि?
24 उंदि मोका अद नगुडगा पनस (50) जन्क नियत्नुर मंतेर बतलो? अगा मंवलिर पनस (50) जन्क नियत्नुर हिंदल तेर, अद नगुडुन बचि किय्वि कि?
25 करेबलिरकुन जकन साटि पनस (50) जन्क नियत्नुरकुन नासेडम कीकिते, वूर बरोबर वीरकुन गिर सिक्सा अरंता.
बति नियत्नुरकुन निमे तप्वक बचि कींति.
बारितेके जग्दुनियतुर सम्दिरकुन नाय्दा तस्वा किय्वनि आंदि” इन्जेर इत्तोर.
26 अस्के येहोवा बगवंतल, “सोदोमा नगुडगा पनस (50) जन्क नियत्नुर दिसनिर्ते, वूर साटि अद नगुडुन बचि कींतोन” इन्जेर जवब सीतोर.
27 अस्के अब्राहम, “इचुला, नना दुब्बता अनि नीरतुन दात्नोना आंदुन.
तेर बति, नना उंडे उंदि जोका हिमत कीसि, नीकुन सवल पूसि कीसेर मंतोन.
28 उंदि मोका वूर पनस (50) जन्क नियत्नुरा लेकतल सिय्विर (5) जन्क कमि आतेके, अद नगुडुन बचि किय्वि कि?”
इन्जेर मर्ला पूसि कीतोर. ते, “अगा चालिस सिय्विर (45) जन्क नियत्नुर मोका नाकुन दिसनिर्ते, अद नगुडुन नासेडम कियोन” इन्जेर बगवंतल इत्तोर.
29 अब्राहम वोन सङा, “उंदि मोका सिरिप चालिस (40) जन्क नियत्नुर अगा दिसनिर्ते?”
इन्जेर पूसि कीतोर. ते, “अगा चालिस (40) जन्क नियत्नुर दिस्तेके गिर, वूर हिंदल अद नगुडुन नासेडम कियोन” इन्जेर बगवंतल इत्तोर.
30 अस्के अब्राहम इद केन्चि, “पर्बु, ना पोरो सोङुन वाय्मा.
उंडे उंदि जोका पूसि कींतोन.
उंदि मोका तीसा (30) जन्क नियत्नुर अगा दिसनिर्ते?”
इन्जेर पूसि कीतोर. ते “तीसा (30) जन्क दिस्तेक गिर नासेडम कियोन” इन्जेर बगवंतल वेह्तोर.
31 अब्राहम, “इचुला, ना पर्बु नी सङा उंडे उंदि जोका वड्कका इंतोन.
वीसा (20) जन्क नियत्नुर अगा दिसनिर्ते?”
इन्जेर पूसि कीतोर. ते बगवंतल, “वीसा जन्क नियत्नुर दिस्तेके गिर, वूर हिंदल अद नगुडुन नासेडम कियोन” इन्जेर वेह्तोर.
32 अब्राहम, “पर्बुन सोङ वाय्वेके, आक्रित उंदि जोका वड्कंतोन.
सिरिप दहा (10) जन्क नियत्नुर अगा दिसनिर्ते?”
इन्जेर पूसि कीतोर. ते बगवंतल, “दहा जन्क नियत्नुर दिस्तेके गिर अद नगुडुन नासेडम कियोन” इन्जेर इत्तोर.
33 अनि येहोवा बगवंतल अब्राहमुन तोडो वड्क्ता पेजे सोत्तोर.
अस्के अब्राहम तंवा डेरतगा मल्सि वातोर.