पुट्गड्मि 17

अब्रामुन सङा बगवंतना नियम

1 अब्रामुना वहि नोवद नोव (99) साल्क मनेके, येहोवा बगवंतल वोन पावे मासि, “नना सर्वसक्ति वाले बगवंतना आंदुन.

ना चर्नते पाप्ना कसुर सेल्वक ताका.

अहन कसुर सेल्वक ताककिते,

2 नीकुन अनि नाकुन नड्डुम, उंदि नियम इरंतोन.

अनि नी जनोबता संके बेय वेले बडि कींतोन” इन्जेर अब्रामुन सङा वेह्‍तोर.

3 अस्के अब्राम सतेलम बूड अर्सि, काल कर्तोर.

ते बगवंतल वोन सङा इहिन वेह्‍तोर:

4 “इचुला, केन्जा!

नावा नियम नी सङा इर्तोन. निमे वेले जातिन बाबोनि आंति.

5 इङेडल नीवा पोरोल अब्राम^* आयो.

बारितेके नीकुन वेले जातिनोर बाबल कींतोन.

अदेन साटि नी पोरोल अब्राहम.^*

6 नना नीवा संतांदा वेलि बर्पुर पंडि सीनल कीसि, वूरकुन वेले जातिङ कींतोन.

वूर्गटल कहितुर राजलिर गिर आंतेर.

7 पिडिनङ-पिडिङ नाकुन, नीकुन अनि नीवा संतांदुन नड्डुम नियम इर्सेर मंतोन.

बस्केट नीकुन अनि नी संतांदुन गिर नना बगवंतल आसि मंदंतोन.

8 अचोरे आय्वा, निमे इंके पर्देसिन दात मंवल, इद पूरो कनान देस बस्केट, नी कांदांतुरा सोंतम आंता.

मी सम्दिरकुन बगवंतल आसि, मंदंतोन” इन्जेर इत्तोर.

9 बगवंतल अब्राहमुन तोडो, “पिडिनङ-पिडिङ निमे अनि नीवा कांदांतुर इद नियमुन वोप्सि, तान पिय्सि ताका लागर.

10 नाकुन अनि नीकुन, नी पेजेय नीवा संतांदुन नड्डुम मंवल, मिरट पिय्सि ताक्वल नावा नियम इदे आंद: मिह्‍गटल हर वोरोर माड्सा तोल कत्रि कियुसा^* लागर.

11 तोल कत्रि कियुस्वल कार्या कीतेके, अद नाकुन अनि नीकुन नड्डुम मंवल नियम्ना निसनित दात मंदंता.

12-13 नी रोत रोपो पुट्तुर हर पिडितुर मोड्डलिरकुन आट (8) रोज्क्ना वहिते तोल कत्रि कियुसा लागर.

नीवा रोतगा पुट्तुरकुन अनि नीवुर दासि माय्नलिर्कुन^* गिर, इद कार्या निमे तप्वक किया लागर.

अस्के मीवा मेंदोडगा नावा बस्केट मंवल नियम्ना निसनित दात इद मंदंता.

14 बोर्ते तोल कत्रि कियुसोरो, वोर नावा नियमुन तप्सि ताक्ता लेकते वांतोर.

आतोन नावा पर्जतल वोरोर इन्जि वोपोन” इन्जेर वेह्‍तोर.

वाग्दंतोर पेडल इसक

15 बगवंतल अब्राहमुन तोडो, “नीवा बाय्कोन सारयि इन्जेर केय्मा.

बारितेके इङेडल ताना पोरोल सारल.^*

16 नना तान आसिर्वाद सीसि, तान्गटल नीकुन वोरोर पेडन जल्मा सियुसंतोन.

हो!

करलेन तान आसिर्वाद सींतोन.

तान्गटल पूनङ पूनङ जातिङ पुटनुङ. वूर्गटल कहितुर राजलिर गिर आंतेर” इन्जेर वेह्‍तोर.

17 अस्के अब्राहम बगवंतन काल कर्सि, लग-बग नूर (100) वर्सनोर मात्रन मरि-मियड आनिर कि? नोवद (90) वर्सना मातरि सारल जल्मा सियर कि? इन्जेर तंवा तना सोन्च कीसि कव्तोर.

18 अनि अब्राहम बगवंतन तर्सो, “ना पेडल इस्मयेल ना ईसदारल आनुर इन्जि, आसा कीसेर मंतोन” इन्जेर वेह्‍तोर.

19 बति बगवंतल, “अहन आयो!

नी बाय्को सारल नी साटि वोरोर मोड्डन जल्मा सींता.

वोर मोड्डन निम इसक^* इन्जेर पोरोल इरना.

वोन सङा नावा नियम इरंतोन. अद नियम वोन अनि वोना कांदांतुन साटि बस्केट गिर मंदंता.

20 निमे इस्मयेलतुन बारेते कीता पार्तना नना केन्ज्तोन.

वोन नना आसिर्वाद सीसि, वोना संतांदुन बडि कींतोन.

वोर बारा (12) कांदनुर डगुक राजलिरकुन मियंतोर.

अव बारा कांदान्क्नुर मीरे मासि डगुर जाति आंतेर.

21 बति वाय्वल साल इदे गट्कते सारल जल्मा सिय्वल इसकुन सङा नावा नियमुन सुरु कींतोन” इन्जेर वेह्‍तोर.

22 अब्राहमुन सङा वड्क्वल आता पेजे, बगवंतल सोत्तोर.

23 अस्के अब्राहम, बगवंतल तंवा सङा वेह्‍ता तीर, अदे दिवोस्ने तंवोर मरि इस्मयेल्ता संसारता तोल कोय्तोर.

तंवा रोतगा मंवलिर सम्दिर माड्सतुन⁺ गिर (इत्तेके सेव्कलिर, दासिर अनि वूरेर मरकुन) अह्‍ने कीतोर.

24-25 अब्राहम तोल कत्रि कियुस्नेके, वोना वहि नोवद नोव (99) साल्क मत्ता.

वोनोर मरि इस्मयेलतुन तेरा (13) साल्क्ना वहि मत्ता.

26 अब्राहम अनि तंवोर मरि इस्मयेल इविर्ते उंदिय दिया तोल कत्रि कियुस्तेर.

27 तंवा रोन मंवलिर सम्दिर माड्सा, तंवा रोन जल्मा आतेर दासिर गिर, वोर कोतने येच्चि तत्तुर वूर सम्दिर गिर, अब्राहमुन सङा तोल कत्रि कियुस्तेर.