सारयिना दासि-वोतड हागर
16
1 अस्के वेरि, अब्रामुना बाय्को सारयिन मरि-मियड आय्मकि.
बति उंदि ईजिप्ट देस्ना काम किय्वल दासि-वोतड तान्गा मत्ता.
ताना पोरोल हागर.
2 सारयि अब्रामुन सङा, “सूड्ति कि, नना मरि-मियड आय्वक्ने येहोवा बगवंतल इहिन कीतोर.
निमे ना दासि-वोतड सङा सोन.
मोका अद मरि-मियड आयर्ते, वूरकुन ना मरि-मियडा लेकते येतंतोन” इन्जेर इत्ता.
ते वोर अब्राम सारयिना गोस्टित वोप्तोर.
3 ते सारयि, ईजिप्ट देस्ना हागर तनकुन सवतिन दात मंले, तंवोर माड्सो अब्रामुन सीता.
अब्राम कनान देस्नगा वासि, दहा (10) साल्क आता पेजे, इद जर्ग्ता गट्ना आंद.
4 अब्राम हागरुन तोडो मींड्ता काड्कि, अद दिवोस्क मत्ता.
इद गोस्टि करि कीसि, हागर तंवा माल्के सारयिंतेर ननय डगुना इन्जेर सोन्च किय्वल सुरु कीता.
5 अस्के सारयि अब्रामुन तोडो, “इद दुक्सा नी हिंदल ना पोरो वाता.
ननय तान नीकुन सीतोन.
अद इंके दिवोस्क मंवल करि कीसि, नाकुन चुडुर-पांदे सूड्सेर मंता.
मा रोपो बोर बातोर इंवल येहोवा बगवंतले तस्वा कियिर” इन्जेर इत्ता.
6 इद केन्चि अब्राम, “इचुला!
नी दासि नीवा केय्देन मंता.
तान नी मंदे वाता तीर कीम” इन्जेर सारयिन वेह्तोर.
अस्के सारयि हागरुन बेय दुक्सा सीता. ते अद आक्रित परर आसि सोत्ता.
हागर्तोर पेडल इस्मयेल
7 अनि हागर उस्के बोमिता सूरु येरियते सोंवल सर्दगा मंवल उंदि चेल्मेत करुम मत्ता.
अस्के येहोवा बगवंतनोर वोरोर दूतल तान करुम वातोर.
8 वोर दूतल, “हागर सारयिना दासिवोतडि, निमे बगटल वाति?
अनि बगा सोन्जेर मंति?” इन्जेर तान पूसि कीतोर. ते हागर, “ना माल्के सारयिन्गटल परर आसि सोन्जेर मंतोन” इन्जेर जवब सीता.
9 अस्के अद केन्चि बगवंतनोर दूतल, “निमे नी माल्केनगा पेजे मल्सि सोन्जि, अद वेह्ता तीर केन्जा.
10 नीवा संतांतुन वेले बडि कींतोन.
अद संतान कहा पर्वि अचोर जनोबा आंता.
11 इंके निमे दिवोस्क्ने मंति.
मोड्डन जल्मा सींति.
वोना पोरोल इस्मयेल* इन्जेर दोसा.
बारितेके निमे दुक्सते आड्ततुन येहोवा बगवंतल केन्ज्तोर.
12 नी मरि इस्मयेल केडता जंवरतुन मोडि तयर आंतोर.
वोन अनि दुस्रुर सम्दिरकुन जग्डङ आसेरेन मंदंतङ.
तंवुर लाक्तुर इत्तेके गिर वोन अर्सि वायो” इन्जेर तान वेह्तोर.
13 ते हागर तंवा सङा वड्क्तोर वोन, “नाकुन सूड्वल बगवंतनि” इन्जेर पोरोल दोस्ता.
बारितेके, “इद जागतगा नाकुन सूड्वन नना करलेन सूड्तोन” इन्जेर इत्ता.
14 अदेन साटिने अद कुहितुन, “बेयेर-लहयि-रोयि*” इन्जेर केयंतेर.
इद कुहि कादेसुन अनि बेरेदु इंवलिक चहरकुन नड्डुम मंता.