पुट्गड्मि 15

अब्रामुन सङा येहोवा बगवंतना वाग्दन

1 इव सम्दो जर्ग्ता पेजे, वोर येहोवल, अब्रामुन दर्संते पावे मासि, “अब्राम, निमे वेरिमा!

नीकुन नना काबाडंतोन. नीकुन डगुर इनम पुटंता” इन्जेर वेह्‍तोर.

2 बति अब्राम, “ये सक्ति वाले येहोवा!

निम नाकुन बतल सीतेके गिर बतल पाय्दा? नाकुन संताने सेले. इदेन हिंदल दमस्कु नगुडोर येलियजरे ना रोतुन ईसदारल आंतोर.

3 इचुला!

निमे नाकुन मरि-मियड सिय्मकि. अदेन साटि इंके, ना सेव्कलिर्गटल वोरोर ना जाय्जतुन पोरो ईसदारल आंतोर कि?” इन्जेर बगवंतन पूसि कीतोर.

4 ते बगवंतल अब्रामुन सङा, “वोर नीवोर ईसदारल आयोर.

निम मियंति वोर मरिये, नीवोर ईसदारल आंतोर” इन्जेर वेह्‍तोर.

5 येहोवल अब्रामुन डेरत बह्‍रि तचि, “हाबडेके सूड्सि, नी सङा आयर्ते अव सुकुकुन कहा.

अह्‍ने नीवा संतान गिर कहा पर्वि अचोर आसि दायर” इन्जेर इत्तोर.

6 ते अब्राम येहोवा बगवंतन पोरो बरोसा इर्तोर.

अद बरोसतुन हिंदले वोन नियत्नोर इन्जेर बगवंतल वोप्तोर.

7 अनि येहोवल अब्रामुन सङा, “इद देसुन नीकुन सियन साटिने, कल्दियुल्क्ना (बाबिलोनिया) देस्ना, उर इंवल नगुडल बह्‍रि तत्तोन” इन्जेर इत्तोर.

8 बति अब्राम, “येहोवा बगवंता! इद देस नावा सोंतम आंता इन्जेर नाकुन बहन करे मायर?” इन्जेर पूसि कीतोर.

9 ते बगवंतल, “मूंद साल्क्ना पड्डा, मूंद साल्क्ना हेरे, मूंद साल्क्ना गोरे बोकुड, उंदि पुरड अनि उंदि पारेवतुन नह्‍गा पिय्सि वरा” इन्जेर वेह्‍तोर.

10 अस्के अब्राम अव सम्दिन पिय्सि वातोर.

अवेनगटल उंदि उंदि जंवरतुन रंड टुक्डेङ कीसि, उंदि टुक्डेतुन मुने उंडे उंदि टुक्डे इर्तोर.

बति पुरडुन अनि पारेवतुन मात्रम रंड टुक्डेङ किय्मकि.

11 अवेन तिंदन साटि रायलिक रेय्तङ.

बति अव रायलिकुन अब्राम तेह्‍चि पूड्तोर.

12 अद नेटि पोड्द सोनेके, अब्रामुन चोकोट जोप पिय्ता.

अस्के अगा बेय कह्‍चर सिकटि आता.

13 अस्के येहोवा बगवंतल अब्रामुन सङा, “मोदोल नीवा संतांदुर दुस्रो देस्ने दांतेर.

अद देस्नुर वीर मुसपरि वालिरकुन नालुङ नुह्‍क (400) साल्क दुक्सा सीसेर दासि-पांदे इरंतेर.

14 अहन दासि संतांदुर इगे दन-दव्लत्ने मल्सि वांतेर.

15 निमे बेय वेडिल आनल वेरि पिसंति.

निमे सांतिते परन सुटि कींति.

16 नालुङ पिडिङ आता पेजे, नीवा संतांदुर इद देस्ने मल्सि वांतेर.

बारितेके अमोरि जातितुरा पाप पंडंता.

अस्के वूरकुन सिक्सा सींतोन” इन्जेर वेह्‍तोर.

17 पोड्द सोन्जि, सिकटि आता पेजे, जंवर्क्नङ टुक्डेन नड्डुमनल रमा रमा गोक्कने पोया पेसिवल वेर्नि अनि जगर्ने वेड्चि सिय्वल डिव्टि वीड्सेर सोंवल^* वोन दिस्ता.

18-21 अद नेटि येहोवा बगवंतल अब्रामुन सङा नियम इर्सि, “ईजिप्ट देस्ना लविडल्ते, युप्रटिस लव्डि वेरि, केनियुल्क, केनिजियुल्क, कद्मानियुल्क, हित्तियुल्क, पेरिजियुल्क, रेपायिमियुल्क, अमोरियुल्क, कनानियुल्क, गिर्गसियुल्क, येबुसीयुल्क इंवलिक जातिङ मंवल देसुन नी संतांदुन सींतोन” इन्जेर वाग्दन सीतोर.