पुट्गड्मि 14

लोतुन अनि वोना दन-दव्लतुन वोय्वल

1 अद गट्कते, सीनरु^* देस्नोर राजल अम्रापेल, येल्लासर येरियतोर राजल अर्योक, येलम्नोर राजल कदोर्लयोमेर, गोयिम्नोर राजल तीदल इंवलिर नाल्विर राजलिर राज ताकुसेर मत्तेर.

2 वीर राजलिर मीरे मासि, सोदोमतोर राजल बेरतोन, गोमोरतोर राजल बिर्सतोन, अद्मातोर राजल सिनाबुतोन, सेबोयिम्नोर राजल सेमेबेरुतोन, बेलतोर (सोयर्तोर) राजन सङा लडय कीतेर.

3 वीर सिय्विर राजलिर तम्वङ दलमकुन पिय्सि सिद्दिम^* इंवल लोदितगा मीरे मातेर.

4 वीर राजलिर पोरो बारा (12) साल्क वेरि, कदोर्लयोमेर राजल अदिकार ताकुस्तोर.

बति तेरा (13) साल्दा गट्कते, वूर सम्दिर मर्ला बड्तेर.

5 अहन आसि उंदि साल आता पेजे, कदोर्लयोमेर राजल तंवा बाजुन मंवलिर राजलिर सङा मीरे मासि, अस्तरोत कर्नयिम्नगा मंवलिर रेपायिम इंवल जातितुरकुन, हाम येरियते मंवलिर जुजीम जातितुरकुन, सावे किर्यतयिम येरियतगा मंवलिर येमिम जातितुर सङा लडेय कीसि मेय्तेर.

6 वीरे आय्वा होरि जातितुरकुन गिर सेयिरु^* केडते मेय्सि, काल्वडा बाज्ना येल-परन इंवल उस्के बोमि वेरि पूड्तेर.

7 अगटल पेजे मल्सि, येन-मिस्पतु जागते वासि, अमलेक जातितुरकुन मेय्तेर.

अह्‍ने हससोन-तामरुते मंवलिर अमोरि जातितेरकुन गिर मेय्तेर.

8 अस्के सोदोमतोर, गोमोरतोर, अद्मातोर, सेबोयिम्नोर, बेलतोर (सोयर्तोर) राजलिर बय्मन-दारकुन सङा लडेय किय्ले, सिद्दिम लोदितगा मीरे मातेर.

9 अहन येलम्नोर राजल कदोर्लयोमेर, गोयिम्नोर राजल तीदल, सीनरुतोर राजल अम्रापेलु, येल्लासर येरियतोर राजल अर्योक, इंवलिर वीर नाल्विर राजलिर सङा, वूर सिय्विर राजलिर लडेय कीतेर.

10 अद सिद्दिम लोदितगा मंवलिक डोडोङ सम्दो डांबर्ते निन्चि मत्तङ.

सोदोमतोर अनि गोमोरतोर राजलिर परर आसि सोन्जि, अव डोडोनगा अर्तेर.

मेय्तुर राजलिर गुटनेके परर आतेर.

11 अस्के वूर नाल्विर राजलिर सोदोमा अनि गोमोरतगा मंवल सम्दो दन-दव्लतुन अनि वूरा चंदितुन पिय्सि सोत्तेर.

12 इदे आय्वा, अब्रामुनोर तमुनोर पेडल लोतु सोदोमा नगुडुन करुम पिसेर मत्तोर.

वोर लोतुन अनि वोन्गा मंवल सम्दोतुन पिय्सि सोत्तेर.

13 अस्के वूर्गटल वोरोर तपुसि हेब्रि जातितोर अब्रामुनगा सोन्जि, जर्ग्ता सम्दो वेह्‍तोर.

अमोरि जातितोर माम्रे इंवनङ मरकुन करुम अब्राम पिसेर मत्तोर.

माम्रे (हेब्रोन) अनि वोनुर चुटम येस्कोल, आनेरु इंवलिर अब्राम्नुर सोप्तलिर आंदिर.

वूर वोरोन्क वोरोर मदत कियना इन्जेर अब्रामुन सङा नियम दोसि मत्तेर.

अब्राम लोतुन बचि किय्वल

14 तमुनोर पेडल लोतुन पिय्सि वोतेर इन्जेर अब्रामुन करे माता.

अहन करे माता बरोबर, लडेय किय्वल सिक्सान येत्तुर मूंद नुह्‍क अट्रा (318) जनकुन तंवा सङा पिय्सि, वूर राजलिरकुन पियन साटि पेसितोर.

अनि दानु इंवल नगुर वेरि वूरा पीचा पिय्तोर.

15 अनि अगने तंवा सङा मंवलिरकुन गुब्डङ गुब्डङ पाकि कीसि, अद नेटि नर्का वूर सङा लडेय कीसि, मेय्तेर.

बति वूर्गटल तपुसि वित्वलिर कहितुरकुन दमस्कु नगुडुन तलवडा बाज मंवल होबा इंवल चहर वेरि पूड्तेर.

16 अस्के अब्राम, वोर लोतुन अनि वोना दन-दव्लतुन अनि वोन सङा मंवलिर वेय्लो-माय्नलिरकुन वूर्गटल सुटि कीसि तत्तोर.

मेल्किसेदेक अब्रामुन आसिर्वाद सिय्वल

17 कदोर्लयोमेर इंवल राजल अनि वोन सङा मंवलिर राजलिरकुन अब्राम मेय्सि वानेके, सोदोमतोर राजल वोन बेटे मायन साटि, सावे^* इंवल लोदि वेरि सोत्तोर.

18 वेरे आय्वा सालेम^* नगुडोर राजल मेल्किसेदेकु सारिङ अनि आङुर्क्ना रसा पिय्सि, अब्रामुन बेटे माय्ले वातोर.

वेर मेल्किसेदेकु सक्ति वाले बगवंतनोर कटोडल आंदुर.

19 अस्के मेल्किसेदेक अब्रामुन, “हाबडुन अनि दर्तुरितुन गडि कीतोर वोर महा सक्ति वाले बगवंतल नीकुन आसिर्वाद सियिर.

20 नी दुस्मन-दारकुन हारि किय्ले, नीकुन मदत कीतोर वोर महा सक्ति वाले बगवंतन डगुर-पान वायि” इन्जेर अब्रामुन आसिर्वाद सीतोर.

अस्के अब्राम तना मेय्सि तत्ततगटल, दहा (10) ईसनल उंदि ईसा मेल्किसेदेकुन सीतोर.

21 अस्के सोदोमतोर राजल, “इद सम्दि दन-दव्लतुन निमेय इरा.

बति बय्मन दार्क्ना केय्दल सुटि कियुसि तत्ति वूर ना पर्जतुन नाकुन सीम” इन्जेर अब्रामुन सङा इत्तोर.

22-23 ते अब्राम सोदोमतोर राजन, “‘वोन ननय दनेवंतल कीतोन’ इन्जेर निमे इंद्कि.

अदेन साटि निह्‍गटल, नना उंदि चुडुसि नूले आयि, चेपुल्क्ना वारिय आयि, बतय गिर येतोन इन्जेर हाबर अनि दर्तुरितुन गडि कीतोर महा सक्ति वाले बगवंतना पोरोडे वाग्दन कीसि, मत्तोन.

24 बति सिरिप ना नोव-जवन लोकुर तिता अदेन वोपंतोन.

अनि ना सङा वातुर आनेर, येस्कोल अनि माम्रे इंवलिरकुन वूरङ ईसङ वूरकुन येता सीम” इन्जेर जवब सीतोर.