अब्राम कनान देस्ने मल्सि वाय्वल
13
1 ते ईजिप्टनल अब्राम तंवा दन-दव्लतुन अनि बाय्कोन पिय्सि, नेगेबु इंवल बोडि गुटनगा सोत्तोर.
वूर सङा लोतु गिर मत्तोर.
2 अद वकत्ने, डोर-जंवर अनि सोने-चांदि वेले मत्ता काड्कि, अब्राम दनेवंतल आसि मत्तोर.
3 अद नेगेबनल अब्राम अचपरि वेलिसेर बेतेल चहर्तेके पेसितोर.
आक्रित बेतेल चहरतुन अनि हायि चहरतुन नड्डुम तना मोदोल मत्ता जागतगा येव्तोर.
4 अब्राम तना मोदोल दोह्ता बोव्लतगा येहोवन पार्तना कीतोर.
अब्राम अनि लोतु पाके माय्वल
5 अद गट्कते अब्रामुन सङा मंवल लोतुन, वोना कुटुंबा अनि वेलेटिर दासिर* मत्तेर.
वेन वेले हेरेनङ, गोरेनङ अनि मूरनङ मंदङ गिर मत्तङ.
6-7 अद वकत्ने कनानियुल्क अनि पेरिजियुल्क इंवलिर गिर अद देस्नगा पिसेर मत्तेर.
अब्रामुन अनि लोतुन पियङ-काल्क्नङ वेले मंदङ मत्ता काड्कि, अवेन मेह्ले जागा येव्मकि.
ते अब्राम्नुर अनि लोतुनुर गाय्किर जग्डङ किय्वल मोदोल कीतेर.
8 अदेन साटि अब्राम लोतुन सङा, “मरट लाग्तुर आता काड्कि, नीकुन अनि नाकुन, नी गाय्किर अनि ना गाय्किर नड्डुम जग्डङ आय्वा.
9 इद सम्दो देस नी मुने मंता.
इंके मरट पाके-माकट.
नीकुन पसंद वाता बाजुन आच्चि, सोन.
निमे डेमा बाजुन दाकिते, नना तिना बाजुन दांतोन.
निमे तिना बाजुन दाकिते, नना डेमा बाजुन दांतोन” इन्जेर इत्तोर.
10 ते लोतु तला तह्चि, सोयरु वेरि मंवल योर्दन लविडा आजु-बाजुता सपय बोमितुन सूड्तोर.
लोतु तंवा साटि बोमितुन आच्वल
(येहोवल सोदोमा गोमोरतुन नासेडम किय्वक मुने इद सम्दो इहिन मत्ता.)
11 लोतु सिडयिङ बाज्नेके मंवल योर्दन लविडा सपय बोमितुन सूड्सि आच्तोर अनि अगा सोंले पेसितोर.
इहिन वूर इविर पाके मातेर.
12 अब्राम कनान देस्नगने मत्तोर.
बति लोतु अद सपय बोमितगा मंवलिक नगुक्नगटल सोदोमा इंवल नगुडुन करुम तंवङ डेरङ वाट्सि, पिस्वल सुरु कीतोर.
13 (बति सोदोमा नगुडेर पर्जा, येहोवन उल्टा आसि, वेले पाप्क कीसेर मत्तेर.)
14 अहन लोतु पाके माता पेजे, येहोवल अब्रामुन सङा, “नी तला तह्चि, निम मंवल जागतल तलवडा, काल्वडा, सिडयिङ अनि पोरयिङ, इव नालुङ कोन्क्नेके सूडा.
15 बारितेके, निम सूड्वल इद बोमितुन बस्केट गिर मंदन साटि, नीकुन अनि नीवा कांदांतुन सींतोन.
16 इदे आय्वा, नीवा कांदांतुन उस्केतङ कडकुन दात बडि कींतोन.
बोरे आयि उस्केतङ कडकुन लेका किया परनुर्ते, नीवा कांदांतुन गिर लेका किया परंतोर.
17 इद बोमितुन पूरो तिरिसि सूडा.
बारितेके इद बोमि नीकुन सींतोन” इन्जेर इत्तोर.
18 अस्के अब्राम तंवङ डेरङ वोसि, हेब्रोन चहरतुन करुम माम्रे इंवनङ डगुक* मरकुन नड्डुम डेरङ वाट्सि, पिसेर मत्तोर.
अगा येहोवन साटि उंदि बोव्ला दोह्तोर.