पुट्गड्मि 12

बगवंतल अब्रामुन केय्वल

1 येहोवा बगवंतल,^* “निमे नीवा देसनल, नीवा चुटम-बंदनल, नीवुर बेये-बाबना रोतल पेसिसि, नना नीकुन तोह्‍वल देसेम्ने सोन.

2 नना नीवा संतांदुन बडि कीसि, वूरकुन उंदि डगुर जाति कींतोन.

नीकुन आसिर्वाद सीसि, नीवा पोरोल बडि कींतोन.

निमेय आसिर्वाद सिय्वनि आकि.

3 नीकुन आसिर्वाद सिय्वलिरकुन आसिर्वाद सींतोन.

नीकुन सापेना सिय्वलिरकुन सापेना सींतोन.

नी हिंदल दुनियतङ सम्दो कांदान्क आसिर्वाद येतनुङ” इन्जेर अब्रामुन सङा वेह्‍तोर.

अब्राम कनान देस्ने सोंवल

4-5 अदेन साटि अब्राम येहोवल वेह्‍ता तीर पेसितोर.

वोन सङा तंवोर तमुनोर मरि लोतु गिर सोत्तोर.

अब्राम हारन इंवल चहर्तल पेसिनेके, वोन सत्तर सियुङ (75) साल्क्ना वहि मत्ता.

अब्राम तंवा बाय्को सारयिन, लोतुन, हारंतगा मंवलिर तंवुर दासिरकुन अनि अगा कमय कीता दन-दव्लतुन पिय्सि, कनान देस्नगा येव्तोर.

6 अस्के अब्राम अद देसनल वीड्सि सोनेके, सेकेम इंवल चहर्तेके पेसिसि, मोरे^* इंवल जागता डगुर सींदुरा मरतगा येव्तोर.

अद वकत्ने कनानियुल्क्नङ जातिनुर अगा पिसेर मत्तेर.

7 अस्के येहोवल अद जागतगा अब्रामुन पावे मासि, “नना इद देसुन नीवा संतांदुन सींतोन” इन्जेर वेह्‍तोर.

तनकुन पावे मातोर येहोवन साटि, बलिदान सिय्वल उंदि बोव्ला अब्राम दोह्‍तोर.

8 अद आता पेजे, अगटल अब्राम बेतेल चहर्ता सिडयिङ बाज्ना गुटतगा सोन्जि, डेरा वाट्तोर.

इद जागतुन पोरयिङ बाजुन बेतेल चहर मत्ता अनि सिडयिङ बाजुन हायि चहर मत्ता.

ते अगा वोर अब्राम उंदि बलिदान सिय्वल बोव्ला दोह्‍चि, येहोवा बगवंतना पोरोडे पार्तना-विंति कीतोर.

9 उंडे अगटल पेसिसि, अब्राम कनान देस्ना नेगेबु इंवल उस्के बोमितेके यात्रा कीसेर सोत्तोर.

ईजिप्ट देस्ने अब्राम सोंवल

10 अस्के अद कनान देस्नगा करु अर्ता.

अद करु उंडे अदिक बडे माता काड्कि, अब्राम ईजिप्ट देस्ने पिस्ले सोत्तोर.

11 अब्राम ईजिप्टुन करुम येव्नेके, वोर सारयिन तर्सो, “इचुला, केन्जा! निमे बेय सोबते मंति इन्जेर नाकुन टावये.

12 वूर ईजिप्ट्नुर नीकुन सूड्सि, निमे ना बाय्कोनि आंदि इन्जेर करि कीसि, नी पोरो जीवा वाटंतेर. अनि नाकुन जक्सि, नीकुन जीवते इरंतेर.

13-14 अदेन साटि नी हिंदल नाकुन जक्वक मंले, ‘नना वेना सेलडा आंदुन’ इन्जेर दया कीसि वूरकुन वेहा” इन्जेर सारयिन वेह्‍तोर.

अहन अब्राम अनि सारयि ईजिप्ट देस्नेगा येव्ता पेजे, अद सारयिन बता सोबते मंता इन्जेर ईजिप्ट्नेर सूड्तेर.

परो राजन मुने सारयिन वोय्वल

15 अनि वूर्गटल कहितुर अदिकारिर सारयिन बारेते परो राजन^* सोन्जि वेह्‍तेर.

अहन वेह्‍चि, तान राजना महलतगा वोतेर.

16 ते परो राजल सारयिन हिंदल अब्रामुन केयुसि, मान-मर्यदा कीतोर.

वोन साटि काम किय्ले, वेय्लो-माड्सा दासिरकुन सीतोर.

अह्‍ने पिसन साटि गोरेङ, हेरेङ, मूरङ, गादिङ अनि हूटक्नङ मंदङ गिर सीतोर.

17 बति अब्रामुना बाय्को सारयिन परो राजल तंवा महलतगा वोततुन हिंदल, येहोवा बगवंतल परो राजना रोतुरकुन बेय करब्नङ बेमरिने मींडुसीतोर.

18 अदेन साटि परो राजल अब्रामुन केयुसि, “निमे नाकुन बारि इहिन दोका सीति अनि इद सारयि नीवा वेय्लो इन्जेर नाकुन बारि वेह्‍मकि?

19 निमे तान, ‘नावा सेलड’ इन्जेर बारि वेह्‍ति?

नना तान तुंका इन्जेर करुम कीतोन. इचुला, नीवा वेय्लो! इंके इगेटल मिरट सोडियट!” इन्जेर इत्तोर.

20 अद आता पेजे परो राजल अब्रामुन ईजिप्टनल पूडि सीम्ट इन्जेर तंवुर सेव्कलिरकुन हुकुम सीतोर.

ते वूर वोना बाय्कोन अनि सम्दो दन-दव्लतुन अब्रामुन सङा सारि कीतेर.