बाबेल नगुडा बुरुज
11
1 मोदोल सम्दिर माय्नलिर परिपन्चम्नगा उंदिय बासा अनि उंदिय बोलि वड्क्सेर मंदिर.
2 वूर सिडयिङ बाज सोन्जेर मनेके, सीनरु देस्नगा उंदि सपय जागा दिस्ता.
ते अगा पिस्वल सुरु कीतेर.
3 अनि, “वरट मरट इट्केङ तयर कीसि, अवेन बोड्सि गट कीकट” इन्जेर इत्तेर.
इद तीर्दे, बंडन बद्लि इट्केङ अनि चिम्टित बद्लि डांबर वाडकम कीतेर.
बाबेल नगुर अनि बुरुज दोह्वल
4 अस्के वूर, “मरट पूरो दर्तुरितुन पोरो पग्रे माय्वक मंले, अनि पोरोल कमय कियन साटि, उंदि नगुर अनि अद नगुडुन बरोबर हाबडुन लागनल उंदि डङल बुरुज, मा साटि दोह्कट” इन्जेर तम्वा तमा वड्क्तेर.
5 अहन वड्क्सि, वूर पर्जा दोह्चेर मनेके, अद नगुडुन अनि डङल बुरुज सूड्ले, बगवंतल रेय्सि वातोर.
6 बगवंतल तंवा तना, “वीर पर्जा सम्दिर उंदिय बासा वड्क्सेर मंतेर.
वीर सम्दिर मीरे मासि, इद काम मोदोल कीतेर.
इङे वूर तम्वा मंदगा बतल निर्नय येतनिर अद किया परंतेर.
7 अदेन साटि वरट मरट बूड सोन्जि, वूरा बासतुन कलगुला कीसि वाट्कट.
अस्के वूर वोरोर वड्क्ता वोरोर अर्तम किया परुर” इन्जेर इत्तोर.
8 अद तीर्दे, बगवंतल वूर पर्जतुन दर्तुरि पूरो पग्रे मानल कीतोर.
ते वूर अद नगुडुन दोह्वल बंद कीतेर.
9 परिपन्चम्नगा सम्दिर माय्नलिर वड्क्वल उंदि बासतुन बगवंतल कलगुला कीसि वाड्ता जागा इदे आंद.
अदेन साटि अद जागतुन ‘बाबेलु’* इन्जेर पोरोल वाता.
अद जागतले बगवंतल वूर पर्जतुन दर्तुरि पूरो पग्रि कीतोर.
सेमुना कुटुंबता चरित्रा
10-11 इद सेमुना कुटुंबता चरित्रा आंद.
जल गंडम वासि, रंड साल्क आता पेजे सेमु, अर्पक्सदुन मिय्तोर.
अस्के सेमुन नूर (100) साल्क्ना वहि मत्ता.
अर्पक्सदुन मिय्ता पेजे, सेमु उंडे गिर सियुङ नुह्क (500) साल्क पिस्तोर.
इव सालकुन रोपो उंडे गिर मरि-मियडुन मिय्तोर.
12 अर्पक्सद तीसा सियुङ (35) साल्क्ना वहि मनेके, सेलहुन मिय्तोर.
13 सेलहुन मिय्ता पेजे, अर्पक्सद उंडे गिर नालुङ नुह्क मूंद (403) साल्क पिस्तोर.
इव सालकुन रोपो उंडे गिर मरि-मियडुन मिय्तोर.
14 सेलहु तीसा (30) साल्क्ना वहि मनेके, येबेरतुन मिय्तोर.
15 येबेरतुन मिय्ता पेजे, सेलहु नालुङ नुह्क मूंद (403) साल्क पिस्तोर.
इव सालकुन रोपो उंडे गिर मरि-मियडुन मिय्तोर.
16 येबेर तीसा नालुङ (34) साल्क्ना वहि मनेके, पेलेगुन मिय्तोर.
17 पेलेगुन मिय्ता पेजे, येबेर नालुङ नुह्क तीसा (430) साल्क पिस्तोर.
इव सालकुन रोपो उंडे गिर मरि-मियडुन मिय्तोर.
18 पेलेगु तीसा (30) साल्क्ना वहि मनेके, रयुन मिय्तोर.
19 रयुन मिय्ता पेजे, पेलेगु उंडे रंड नुह्क नोव (209) साल्क पिस्तोर.
इव सालकुन रोपो उंडे गिर मरि-मियडुन मिय्तोर.
20 रयुन तीसा रंड (32) साल्क्ना वहि मनेके, सेरुगुन मिय्तोर.
21 सेरुगुन मिय्ता पेजे, रयु उंडे रंड नुह्क येडुङ (207) साल्क पिस्तोर.
इव सालकुन रोपो उंडे गिर मरि-मियडुन मिय्तोर.
22 सेरुगु तीसा (30) साल्क्ना वहि मनेके, नाहोरतुन मिय्तोर.
23 नाहोरतुन मिय्ता पेजे, सेरुगु उंडे रंड नुह्क (200) साल्क पिस्तोर.
इव सालकुन रोपो उंडे गिर मरि-मियडुन मिय्तोर.
24 नाहोर वीसा नोव (29) साल्क्ना वहि मनेके, तेरहुन मिय्तोर.
25 तेरहुन मिय्ता पेजे, नाहोर उंदि नूर वोनिस (119) साल्क पिस्तोर.
इव सालकुन रोपो उंडे गिर मरि-मियडुन मिय्तोर.
26 तेरहु सत्तर (70) साल्क पिस्ता पेजे अब्राम, नाहोर, हारन इंवलिर मुविर मरकुन मिय्तोर.
तेरहुना कुटुंबता चरित्रा
27 इद तेरहुना कुटुंबता चरित्रा आंद.
अब्राम, नाहोर अनि हारन इंवलिर मुविर मरकुन तेरहु मिय्तोर.
हारन लोतुन मिय्तोर.
28 तंवोर बाबो तेरहु पिसि मनेकेन, हारन तंवा जल्मा आता अद कल्दियुल्क्ना (बाबिलोनिया) देस्ना, उर इंवल नगुडे मार्तोर.
29 अब्राम, नाहोर इविर्ते मर्मिङ आतेर.
अब्रामुना बाय्कोना पोरोल सारयि.
नाहोर्ता बाय्कोना पोरोल मिल्कल.
मिल्कल अनि ताना सेलड इस्कनोर बाबो हारन आंदुर.
30 सारयि मरि-मियड आय्मकि, गोड्डुय मत्ता.