लोतुनुर वेर्तलिर
19
1 अद नेटि नुल्पे आनेके, इविर बगवंतनुर दूतलिर सोदोमा इंवल नगुडे वातेर.
अस्के लोतु अद नगुडा नाल्विर उद्वल जागतगा* उच्चि मत्तोर.
वोर वूरकुन सूड्सि, तेच्चि सोन्जि, काल्क कर्तोर.
2 अनि, “माल्कलिर्निट!
नना मी सेव्कना आंदुन.
दया कीसि ना रोन वरट.
काल्क नोर्सि, रातुन मंट.
अनि सक्रेन तेच्चि, मी सरि मिरट सोंदा वचो” इन्जेर लोतु इत्तोर. बति वूर, “सेले-सेले नेटा रातुन इगे बह्रिने आरम येतंतोम” इन्जेर इत्तेर.
3 बति लोतु वूरकुन जुल्मा कीता काड्कि, वोना रोन सोत्तेर.
वोर वूर साटि सारिङ सुरुसि, पोहुन्चर कीतोर.
ते वूर तित्तेर.
4 अनि वूर नरुम्ले आनेकेने अद सोदोमा नगुडङ नालुङ मूलनल चुडुक कांडिर्गटल ते, डगुक माय्नलिर वेरि, सम्दिर मीरे मासि, अद रोतुन सिर्मुट गेर-पातेर.
5 अनि वूर लोतुन केय्सि, “नेंड निह्गा निद्रा किय्ले, वातुर माय्नलिर बगा मंतेर?
ममोट वूर सङा मींडय लागर. वूरकुन बह्रि पिय्सि वरा” इन्जेर इत्तेर.
6 ते लोतु कावड तेरिसि, वूर्गा बह्रि वासि, तंवा कावड बहिडल केह्तोर.
7 अनि, “ना तादल-तमुक्निट! वटिये, इद करब काम किय्मट” इन्जेर जुल्मा कीतोर.
8 अनि “केन्जट!
नावङ रंड कोरो पेकिङ मंतङ.
मिरट वोप्तेके, अवेकुन मिह्गा पिय्सि वांतोन.
मीकुन दिल्ते वातप अवेन कीम्ट. बति ना रोन वातुर वेर्तलिरकुन बतय किय्मट” इन्जेर इत्तोर.
9 तेर बति वूर, “दुस्रो देसनल वासि, माकुन तस्वा किय्ले नीकुन बोर अदिकार सीतोर?
बग्ला जर्गा! सेलेते वूर माय्नलिरकुन तेर, नीकुने वेले तक्लिब कींतोम” इन्जेर इत्तेर. अनि लोतुन पोरो मुच्लि अर्सि, कावडुन वोहन साटि करुम वातेर.
10 अस्के रोपो मंवलिर इविर माय्नलिर लोतुन रोपो ऊम्सि, कावड केह्तेर.
11 बह्रि मंवलिर चुडुक कांडिर्गटल ते, डगुक माय्नलिर वेरि, सम्दिरा नदुर बंद कीतेर.
ते वूरकुन रोता डेरोटा पुट्वा सोन्जि, मह्क्सि मह्क्सि हटे मातेर.
लोतु सोदोमतल सोंवल
12 अस्के वूर वेर्तलिर लोतुन सङा, “इद नगुडे नीवुर उंडे बोरे मंतेर कि? मर्क, मियक, सडिर, उंडे बोरे गिर आयि मत्तेके, वूरकुन इगेटल बह्रि पिय्सि सोन.
13 बारितेके ममोट इद नगुडुन नासेडम कींतोम.
इद नगुडे मंवलिरा पाप जास्ति आता काड्कि, तेन नासेडम किय्ले येहोवा बगवंतल माकुन रोह्तोर” इन्जेर वेह्तेर.
14 अदेन साटि लोतु बह्रि सोन्जि, तंवङ मियकुन तुङ्वलिर सडिर तोडो, “येहोवा बगवंतल इद नगुडुन नासेडम किय्वल मंतोर.
तेदट!
इद नगुडुन सुटि कीसि, वेय्ने दाकट” इन्जेर इत्तोर. बति वूर सडिर, वटि मजक कींतोर इन्जि सोन्च कीतेर.
15 बेय सक्रेन बगवंतनेर दूतलिर लोतुन लह्कि कीसि, “इद नगुर नासेडम आय्वल मंता.
तेन बरोबर निमे नासेडम आय्वक मंले, नी बाय्कोन अनि नीवङ रंड मियकुन इगेटल पिय्सि सोन!” इन्जेर इत्तेर.
16 बति लोतु सोंले लह्कि वर्मकि.
ते बगवंतनेर दूतलिर लोतुन, वोना वेय्लोन अनि वोनङ रंड मियक्नङ केय्क पिय्सि, अद नगुडल बह्रि तत्तेर.
अहन येहोवा बगवंतल लोतुन पोरो दया तोह्तोर.
17 बह्रि तत्ता पेजे, वूर्गटल वोरोर दूतल, “मीवा जीवा दकुसन साटि सोडियट! पेजे मल्सि सूड्मट! इद लोदितगा नड्डुम बगने आग्मट! मिरट नासेडम आय्वक्ने, अद गुटतेके परर आसि सोंट!” इन्जेर वेह्तोर.
18 बति लोतु वोन सङा, “अहन आयो, माल्का!
19 नी सेव्कल आय्वल ना पोरो नीकुन किवुल वाता.
नावा जीवा बचि कियन लासि, ना पोरो वेले दया तोह्ति.
बति गुटतेके सोन्जेर मनेकेन अद गंडम वासि, सांतोनो बतलो.
20 इचुला!
नना विच्चि येवनल, अद चुडुर नार करुम मंता.
अद नाटे सोंदा सीम. अगा सोत्तेके, ना जीवा दकंता” इन्जेर कोर्तोर.
21 ते बगवंतनोर दूतल, “आयि मन्जे, इद गोस्टित गिर वोपंतोन.
निमे कोर्तपे, अद चुडुसि नाटुन नासेडम कियोन.
22 बति अद नाटे वेय्ने विच्चेर सोन.
निमे अगा येवनल वेरि, नना बतय किया परोन” इन्जेर वेह्तोर.
अदेन साटिने अद चुडुसि नाटुन सोयरु* इंवल पोरोल वाता.
सोदोमा अनि गोमोरा नगुक नासेडम आय्वल
23 ते लोतु सोयरु इंवल नाटे येव्नेकेते पोड्द पेसिता.
24 अस्के येहोवा बगवंतल, सोदोमा अनि गोमोरा इंवलिक नगुकुन पोरो, हाबडल पोत्वल गंदोक अनि तड्मि गोकङ पिरदुन मोडि अरुस्तोर.
हाबडल पिरदुन मोडि गंदोक अनि तड्मि अरुस्वल
25 अव नगुकुन अनि पूरो लोदितुन नासेडम कीतोर.
अवेनगा मंवलिर सम्दिर माय्नलिर अनि जाडि-पोदेलङ गिर नासेडम आतङ.
26 बति लोतुना बाय्को वोन सङा वासेर मनेके, पेजे मल्सि सूड्ता काड्कि,+ अद सासि, सोवोडा पुत्ला आता.
27 बेय सक्रेन अब्राहम बगवंतन सङा वड्क्ता* जागतगा सोत्तोर.
28 अनि सोदोमा, गोमोरा अनि अद लोदिता येरिया सम्दो गिर दिहंते सूड्तोर.
ते अद पूरो येरियतल डगुर कोल्मितल पोया पेसितपिनय कुमा कुमा पोया पेसिसेर मत्ता.
29 बति बगवंतल अब्राहम कोर्ततुन हेतु कीसि, अद लोदितङ नगुकुन नासेडम कीनेके, लोतुन बचि कीतोर.
लोतु अनि वोनङ मियक
30 अद आता पेजे, लोतु सोयरु इंवल नाटे मंले वेरिसि, तंवङ रंड मियकुन सङा गुटत पोरो सोत्तोर.
अगा उंदि बुयरितगा वूर पिसेर मत्तेर.
31 अहन पिसेर मनेके, उंदि दिया तक्का, सेलडुन सङा, “सम्दिन दात मर्मिङ आसि, मरि-मियड आय्ले, इगे बोरे माय्नलिर सेलुर.
अनि मा बाबल्ते वेडिल आसेर मंतोर.
32 वोन आङुर्क्ना कल उह्चि, केलि सेल्वक आता पेजे, वोन सङा मींड्कट.
इहिन मरट बाबन सङा मरि-मियड आसि, मावा कांदांतुन राकि कीकट” इन्जेर वेह्ता.
33 अद नेटि रातुन अव सेलड रंड आसि, बाबोन आङुर्क्ना कल उह्तङ.
डगुर मियड रोपो सोन्जि, बाबोन सङा मींड्ता.
अद बस्के मींड्तयो, बस्के तेच्चि सोत्तयो, वोन बतय दाद सेले.
34 दुस्रो नेटि सक्रे, तक्का सेलडुन सङा, “केन्जा!
नना निनेता रातुन बाबन सङा मींड्तोन.
नेटा रातुन गिर वोन आङुर्क्ना कल उह्कट.
निमे रोपो सोन्जि, वोन सङा मींडा. इहिन मरट बाबन सङा मरि-मियड आसि, मावा कांदांतुन राकि कीकट” इन्जेर वेह्ता.
35 अद नेटि रातुन गिर रंडुते मीरे मासि बाबोन आङुर्क्ना कल उह्तङ.
अनि चुडुर मियड रोपो सोन्जि, वोन सङा मींड्ता.
अद बस्के मींड्तयो, बस्के तेच्चि सोत्तयो, वोन दाद सेले.
36 अहन लोतुनङ रंडुते मियक तम्वोर बाबोन हिंदल दिवोस्क रेहे मातङ.