पूना दुनिया मोदोल आय्वल
9
1 बगवंतल नोवहुन अनि वोनुर मरकुन आसिर्वाद सीसि, “मिरट वेले मरि-मियड आसि, दर्तुरि पूरो निन्चि पग्रे माम्ट.
2 दर्तुरित पोरोडा सम्दो जिव्रस, वडिते परिवल हर पिटे-पुरड, दर्तुरित पोरो ताक्वल हर पुर्ग-बुसि, येतगा मंवल सम्दो जिव्रस मीकुन बेय वेरियनुङ.
अव सम्दिन पोरो मिरट अदिकारिर आसि मंदंतिट.
3 तिंदन साटि मीकुन सम्दो दानङ, बाजि-पालङ अनि काया-पंडिङ सीतपे हर जिव्रस गिर मीकुन सींतोन.
अव सम्दि मीवङे.
मिरट बद गिर तिंदा वचो.
4 बति नेतुर मंवल सवितुन मिरट तिन्मट.
बारितेके नेतुडगा अद जंवर्ता जीवा मंदंता.
5 उंदि जंवर बोने जकर्ते, ताना जीवतुन नना तल्कंतोन.
अह्ने बोरे मायनल उंडे वोरोन जकनुर्ते, वोना जीवतुन नना तल्कंतोन.
6 वोरोर मायनल उंडे वोरोन जक्तेके, वोर गिर उंडे वोरोना केय्दे साया लागर.
बारितेके, बगवंतल तंवा रूपुन मोडि माय्नन निव्डि कीतोर.
7 मिरट वेले मरि-मियड आसि, मीवा संतान दर्तुरि पूरो निन्चि पग्रे माम्ट” इन्जेर नोवहुन अनि वोनुर मरकुन बगवंतल वेह्तोर.
8-11 अनि, “मी सङा, मी पेजेटल वाय्वल मी कांदांतुन सङा अनि दर्तुरित पोरो मंवल हर जिव्रसुन सङा, रूकतल बह्रि वातङ अव सम्दि, पिटे-पुरड, पियङ-काल्क, केडता जिव्रस अनि पुर्ग-बुसितुन सङा नना नियम इर्सेर मंतोन.
इंके दर्तुरित पोरोडा सम्दो जिव्रसुन येते सते नास कीतोन.
बति इङेडल उंडे बस्केन इहिन जर्गा सियोन.
दर्तुरितुन उंडे बस्केन येते नासेडम कियोन.
इदे नावा नियम आंद” इन्जेर बगवंतल नोवहुन अनि वोनुर मरकुन सङा उंडे उंदि जोका वेह्तोर.
12-13 बगवंतल उंडे गिर, “इद इर्ता नियमुन निपुसन साटि, नाकुन मीकुन अनि सम्दि जिव्रसुन नड्डुम पिडिनङ-पिडिङ पुट्वलिक कांदान्क्नुर हेतु किय्ले, हाबर्तङ टेपनगा येडुङ रंक्ना कमल-पटि इरंतोन.
इद कमल-पटि नाकुन अनि दुनियतुन नड्डुम मंवल नियम्ना निसनिता गवा आसि, मंदंता.
बगवंतल कमल-पटिता साक्सेय इर्वल
14 नना बोमित पोरो पिर अरुस्नेके, हाबडगा कमल-पटि मीकुन दिसर.
15 नाकुन, नीकुन अनि कलितुन नड्डुम मंवल नियमुन हेतु कींतोन अनि इङेडल बस्केन येते सम्दि जिव्रसुन सते नास कियोन इंवल गवतुन साटि कमल-पटि साक्सेय मंदंता.
16 इद सूड्सि नाकुन अनि कलितुन नड्डुम मंता इद बस्केट मंवल नियमुन हेतु कींतोन” इन्जेर इत्तोर.
17 अनि बगवंतल नोवहुन सङा, “बोमित पोरो जीवते मंवल सम्दोतुन सते नास किय्वक मंदन साटि, नना इर्ता नियम्ना गवा कमल-पटि आंद” इन्जेर वेह्तोर.
नोवहुनुर मर्क
18 रूकतल बह्रि वातुर वूर नोवहुनुर मर्क: सेमु, हामु अनि यापेतु.
हामु कनांतोर बाबो आतोर.
19 वीर मुविरे नोवहुनुर मर्क आंदिर.
वीरा कांदने दर्तुरि पूरो पग्रे माता.
20 नोवहु केतिदारल आतोर.
वाडि कीसि आङुरकुन उर्स्तोर वोर मोदोडोर वेरे आंदुर.
21 उंदि जोका नोवहु आङुर्क्ना कल रेह्चि उटोर.
अद निसते, तंवङ कप्डिङ कुडुसि, तंवा डेरतगा कुडेकेय मींड्सि मत्तोर.
22 कनांतोर बाबो हामु तंवोर बाबो नोवहुन कुडेके मंवल सूड्सि, बह्रि मंवलिर तादलिरकुन अद गोस्टि वेह्तोर.
23 अस्के सेमु अनि यापेतु उंदि दुपटि तम्वङ सेटन पोरो वाट्सि, पेजे पेजे डेरत रोपो सोन्जि, तम्वोर बाबोन मुच्तेर.
तम्वोर बाबो कुडेके मंवल सूड्वा इन्जि, वूर पेजे मल्सि सूड्मकि.
24 नोवहुना निसा रेय्ता पेजे तंवोर चुडुर मरि हामु तनकुन कीता अदेन करि कीतोर.
25 अनि “कनान तंवुर तादलिरकुन सेव्कलिरोर सेव्कल आसि मंदनुर” इन्जेर नोवहु हामुनोर मरि कनांतुन सापेना सीतोर.
26-27 उंडे, “सेमुनोर बगवंतन डगुर-पान सीकट!
कनान सेमुनोर सेव्कल आसि मंदनुर.
यापेत्ना कांदांतुर बडे मासि* सेमुना कांदांतुर सङा मीरे मासि मंदनिर. कनांता कांदांतुर यापेत्ना कांदांतुरकुन सेव्कलिर आसि मंदनिर” इन्जेर नोवहु इत्तोर.