येता कट कमि आय्वल
8
1 बति बगवंतल रूकतगा मंवल नोवहुना कुटुंबत अनि जाति जंवरतुन मरुङ्मकि.
बोमित पोरो निल्ता येतुन कमि किय्ले, बगवंतल वडि वायुसीतोर.
2 इदेन मोदोल बगवंतल बोमितल पूटे मातङ येतङ जलङ अनि हाबडङ येतङ कावक बंद कीतोर.
3 मुसुर बंद आसि, अद येर दर्तुरित पोरो कमि आय्ले, नूटा पनस (150) दिवोस्क लाग्तङ.
4 येडवा महिनता सत्रा तारिकुन नेटि, रूका अररतु इंवलिक डङलिक गुटन पोरो आक्ता.
5 अद येर आटे मासेर वानेके, पदवा महिनता मोदोल तारिकुन गुटनङ कोड्डिङ दिस्तङ.
6 उंडे चालिस (40) रोज्क आता पेजे, नोवहु तना निव्डि कीता अद रूकता किडिकि तेरितोर.
7 अनि उंदि काकडुन बह्रि सुटि कीतोर.
अद काकड बोमित पोरोडा येर आटे मानल वेरि हके-हिके परिसेर मत्ता.
8 अस्के बोमि दिसनल येता कट कमि आता कि सेले इंवल करि किय्ले, नोवहु पारेवतुन बह्रि सुटि कीतोर.
9 बति पूरो बोमित पोरो येर आटे माय्ले मत्ता काड्कि, अद पारेवतुन उद्ले गिर जागा सेले मत्ता.
ते अद पारेवा तिरिसि नोवहुनगा वाता.
ते वोर तंवा केय चह्चि, तान रोपो येत्तोर.
10 येडुङ (7) रोज्क आग्सि, उंडे उंदि जोका नोवहु अद पारेवतुन बह्रि सुटि कीतोर.
11 अंटित नुल्पेता येलते अद पारेवा ओलिवा इंवल मरता कोड्स्ता उंदि आकितुन तोड्दे कच्चि वाता.
ते अद सूड्सि, नोवहुन बोमित पोरो येता कट कमि आता इन्जेर करे माता.
12 उंडे येडुङ रोज्क आग्सि, अद पारेवतुन नोवहु उंडे उंदि जोका बह्रि सुटि कीतोर.
बति अद पारेवा मर्ला मल्सि, वोन्गा वाय्मकि.
13 अस्के नोवहु रूकतगा मुच्चि मंवल चत तेरिसि, बह्रि सूड्तोर.
वोन सरुता बोमि दिस्ता.
अद दिवोस सालदुन रोपोडा मोदोडा महिनता मोदोडा दिया आंद.
अस्के नोवहुन सारुङ नुह्क उंदि (601) साल निंता.
14 रेंडवा महिना वीसा येडुङ (27) तारिकुन नेटि बोमि किट्क्ने वत्ता.
15 अस्के बगवंतल नोवहुन सङा,
16 “निमे, नी बाय्को, नी मर्क अनि कोर्यक रूकतल बह्रि वरट.
17 मी बरोबर पिटे-पुरड, डोर-जंवर, केडता जिव्रस, पुर्ग-बुसि, सम्दि जिव्रसुन रूकतल बह्रि तरट.
अव वेले पय्दोस आसि, दर्तुरित पोरो पग्रे मानुङ” इन्जेर वेह्तोर.
18 अदेन साटि नोवहु तंवा कुटुंबतुन पिय्सि बह्रि वातोर.
नोवहुना कुटुंबतुर अनि रूकत रोपोडा जिव्रस बह्रि वाय्वल
19 हरियेक जातितङ पिटे-पुरड, डोर-जंवर, केडता जिव्रस, पुर्ग-बुसि सम्दो रूकतल जाति तीर जोडिङ जोडिङ बह्रि वातङ.
20 अस्के नोवहु बगवंतन बलि सिय्ले बंडङ रचि कीसि, उंदि बोव्ला दोह्तोर.
अद बोव्लतगा हरियेक जातितल कहि पवित्रा जंवरकुन अनि कहि पवित्रा पिटे-पुरकुन अर्पना सीतोर.
बगवंतन नोवहुना कुटुंबतुर अर्पना सिय्वल
21 बगवंतल अद अर्पनता चोकोट्ना गाडि येच्चि, वेले कुसि आतोर.
अनि, “इङेडल बस्केने नरिमन्कना कामुन हिंदल बोमितुन सापेना सियोन.
बारितेके वूरा विचर चुडुर पांदले पाप्ने निन्चि मंता.
तेर बति इंके मूरि कीतप, सम्दो जिव्रसुन बस्केन मूरि कियोन.
22 दर्तुरि बचेजेल मंदर अचेजेल विजा उर्स्वल कालम, पंटा कोय्वल कालम, एद्दि गालुम अनि पीनि-गालुम, रात अनि दिहा सम्दो बातङ अहन मंदनुङ” इन्जेर तंवा मंदे इत्तोर.