पूरो दर्तुरि येर निन्चि मंवल
7
1 अस्के नोवहुन सङा, “इद पिडितुर्गटल निमे नियत्ने ताक्तोनि आंदि इन्जेर वोप्सेर मंतोन.
अदेन साटि निमे अनि नीवा कुटुंबतुर रूकत रोपो नेङट.
2 पवित्रा जिव्रस्नगटल* हर उंदि जातितल येडुङ गोह्डलिक येडुङ टोट्टेकुन तरा.
अपवित्रा जिव्रस्नगटल* गिर हर जातितल उंदि गोह्डल उंदि टोट्टेतुन तरा.
इव सम्दि जिव्रसुन नी सङा रूकत रोपो वोम.
3 वडिदे परिवलिक पिटे-पुरकनल गिर हर उंदि जातितल येडुङ गोह्डलिक येडुङ टोट्टेकुन तरा.
बारितेके बोमित पोरो सम्दो जातिना जिव्रस पिसि मंदन साटि, इव सम्दिन नी सङा वोयना.
4 उंडे येडुङ रोज्क्ने दर्तुरित पोरो मुसुर वायुसंतोन.
अद मुसुर चालिस दिहङ (40) चालिस रात्क (40) अरंता.
इदेन हिंदल नना गडि कीता बोमित पोरो, जीवते मंवलिक सम्दो मूरे मानुङ” इन्जेर बगवंतल वेह्तोर.
5 अहन बगवंतल हुकुम सीता तीर नोवहु कीतोर.
6 बस्केते मुसुर सुरु आतयो अस्के, नोवहुन सारुङ नुह्क (600) साल्क्ना वहि मत्ता.
7 अस्के नोवहु तंवा बाय्को, मर्क अनि कोर्यकुन सङा जल गंडमनल तम्वा जीवा बचि किय्ले रूकत रोपो नेङ्तोर.
8-9 सुदुड वालेक, बे-सुदुड वालेक रंडुते तीर्क्नङ जाति जंवर, पिटे-पुरड, पुर्ग-बुसि अनि बोमित पोरो मंवलिक सम्दो जिव्रस्नगटल टोट्टे अनि गोह्डलिक जोडि अर्सि, रंड रंड बगवंतल हुकुम सीता तीर रूकत रोपो नोवहुनगा वातङ.
10 अव वासि, येडुङ रोज्क आता पेजे मुसुडङ दारङ दर्तुरित पोरो रेय्तङ.
नोवहुना रूका येत पोरो पोङ्ने तेल्वल
11 नोवहुना वहि सारुङ नुह्क (600) साल्क मनेके, अदे साल्दा रेंडवा महिनता, सत्रा (17) तारिकुन नेटि बोमितल येतङ जलङ बेय जोर्ते पूटे मातङ अनि हाबडल येतङ कावक कोले मातङ.
12 अद मुसुर चालिस (40) रोज्क नर्का-पियल बोमित पोरो अर्सेर मत्ता.
13 मुसुर सुरु आय्वल दिनमुन नेटिने, नोवहु तंवा बाय्कोन, तंवुर मर्क सेमु, हामु, यापेतुन अनि तंवङ मूंद कोर्यकुन पिय्सि, रूकत रोपो नेङ्तोर.
14-15 वूर सङा बगवंतल गडि कीतोर अव पियङ-काल्क, केडता जंवर, पुर्ग-बुसि अनि पिटे-पुरड इहिन जीवते मंवलिक बचोङ तीर्क्नङ जिव्रस मंतङो, अचोङ तीर्कनल रंड रंड जोडिङ आसि, रूकत रोपो नोवहुनगा वातङ.
16 बगवंतल वेह्तपिनय, अव टोट्टे अनि गोह्डलिक हर जातिता जिव्रस रूकत रोपो नेङ्ता पेजे, वोर अद रूकता कावड केह्तोर.
17 चालिस दियङ (40) मुसुर अर्ता.
ते येता कट बोमित पोरो बडे मासेर सोत्ता.
अस्के रूका येतुन पोरो तेल्ता.
18 इहिन येर बडे माता काड्कि, रूका पोङ पोङ तेल्सेर मत्ता.
19 दर्तुरि पूरो येते निंततुन हिंदल बोमित पोरोडङ बेय डङलिक गुटङ सम्दो गिर मुडुङ्तङ.
20 अव डङलिक गुटन पोरो येर उंडे अदिक पंद्रा कूटङ बडे माता.
21-22 इदेन हिंदल दर्तुरित पोरो जीवते मत्ता हर जिव्रस पिटे-पुरड, पियङ-काल्क, केडता जिव्रस, पुर्ग-बुसि अनि सम्दिर नरिमन्कलिर गिर सातेर.
दर्तुरित पोरोडङ जीवता हूकुर वालेक सम्दो सातङ.
23 अहन दर्तुरित पोरोडा सम्दो जिव्रस मूरे माता.
सिरिप रूकत रोपो मंवल जिव्रस अनि नोवहुना कुटुंबतुर बचे मातेर.
24 अद येर दर्तुरित पोरो नूटा पनस (150) दिवोस्क निन्चि मत्ता.