पुट्गड्मि 6

माय्नलिरा करेबल गुन

1 बोमित पोरो माय्नलिरा जनोबा बडे माय्वल सुरु आता.

अस्के वूरा पीटे मियक जल्मा आतङ.

2 बेय सोबतङ डियन सूड्सि,

सोबतङ डियङ

दूतलिर दात मंवलिर कहितुर,^* बोन बद पसंद वाता अदेन तुङ्तेर.

3 अस्के बगवंतल, “नना सीता जीवता हूकुर^* माय्नलिर्गा आक्रि वेरि निल्सि मनो.

^* बारितेके वूर मेंदोडा आसते निन्चि मंतेर.

वूरा पिस्वल वहि नूटा वीसा (120) साल्क आयर” इन्जेर इत्तोर.

4 अद वकत्ने बगवंतनेर दूतलिर डियन तुङ्तेर.

अस्के अव नेपिलुल्क इंवलिरकुन जल्मा सीतङ अनि अद आता पेजे वूर कहि साल्क बोमित पोरो पिसेर मत्तेर.

वीर तोलेता जमनते पोरोल कमय कीतुर सक्ति वालिर आंदिर.

5-6 माय्नलिरा करब-पान बोमित पोरो अदिक आता.

बस्केट गिरे वूरा पाप्ने निन्चि मंवल विचर करि कीसि, तना बोमित पोरो नरिमन्कन गडि कीता काड्कि, बगवंतन कला कला आसि, बेय दुक्सा लाग्ता.

7 अद वकत्ने बगवंतल, “नना गडि कीतुर माय्नलिरकुन, वूर बरोबर डोर-जंवरतुन, पुर्ग-बुसि, पिटे-पुरड सम्दोतुन दर्तुरित पोरोडल मूरि कीसि वाटंतोन.

बारितेके इद कलि गडि कीता काड्कि, नाकुन कला कला लाग्ता” इन्जेर इत्तोर.

8 बति बगवंतन आनंद सीतोर वोर नोवहु इंवल मायनल मत्तोर.

नोवहु अनि जल गंडम

9 इद नोवहुना कांदांता वेसुडि आंद.

अद वकत्ने नोवहु वोरोरे सम्दिर्गटल नियत्ने मन्जि, बगवंतना चर्ना पिय्सि ताक्तोर आंदुर.

10 सेमु, हामु, यापेत इंवलिर मुविर नोवहुनुर मर्क आंदिर.

11 बगवंतना नदुडे दर्तुरि सम्दो करब-पांदे अनि बे-रीतिते निन्चि दिस्ता.

12 इद सूड्सि, बगवंतल करले सम्दो करब आता इन्जि, दर्तुरित पोरो मंवलिर सम्दिर पाप्ने निन्चि, सते सरितुन बह्‍के मासि, ताक्सेर मत्तेर.

13 बगवंतल नोवहुन सङा, “सम्दिर माय्नलिरा मूरे माय्वल वकत करुम वाता.

बारितेके वूरङ बे-रीतितङ काम्क दर्तुरित पोरो निंतङ.

अदेन साटि नना सम्दिरकुन मूरि कींतोन” इन्जेर वेह्‍तोर.

नोवहु रूका तयर कियुस्वल

14 उंडे बगवंतल, “नोवहु नी साटि सय्परस इंवल गट कटेते उंदि रूका निव्डि कीम.

तान रोपो कम्रङ कीम.

रोपो-बह्‍रि डांबर्ते कीटि कीम.

15 अद रूका मूंद नुह्‍क (300) कूटङ लाम, पनस (50) कूटङ बेडुंदि अनि तीसा (30) कूटङ डङल मंदना.

16 अद रूकत पोरो उंदि मुच्वल तयर कीसि, तान अनि गोडन नड्डुम कूटमेच्चा संद मनल सूडना.

रूकता कावड उंदि बाजुन इरना.

बूड उंदि, नड्डुम उंदि अनि पोरो उंदि मनल इहिन मूंद अंतर्क तयर कियना” इन्जेर वेह्‍तोर.

17 उंडे गिर बगवंतल, “इचुला!

नना जीवा वाले सम्दो जाति जंवरतुन हाबडुन बूड मंवक दर्तुरित पोरो मुसुर वायुसंतोन. दर्तुरित पोरो पिस्वलिक सम्दो सानुङ.

18 बति नीकुन उंदि नियम सींतोन.

निमे, नीवा बाय्को अनि नीवुर मुविर मर्क अनि मूंद कोर्यकुन पिय्सि, रूकतगा नेङना.

19 नी सङा कलित रोपो जिव्रसुन बचि कियन साटि, हर जाति जंवर्तल, पिटे-पुरडल उंदि टोट्टे अनि उंदि गोह्‍डडुन मी सङा रूकतगा वोयना.

20 निमे अवेन पिसुसि इरन साटि, बदेना अद जाति तीर पिटे-पुरड, डोर-जंवर, पुर्ग-बुसि सम्दिय रंड रंड जोडिङ निह्‍गा वांतङ.

21 तिंदन साटि सम्दो तीर्क्ना कानेता इंतजम कीसि, नी सङा वोयना.

अद नी कुटुंबतुन अनि जाति जंवरतुन चंदि आयर” इन्जेर वेह्‍तोर.

22 बगवंतल हुकुम सीता तीर नोवहु सम्दो तयर कीतोर.