मोदोडा कुटुंबा
4
1 अद आता पेजे, आदम तंवा बाय्को हव्वन तोडो मीरे मातोर.
ते अद पीटेते मन्जि, कयिंतुन जल्मा सीसि, “येहोवना* दयते* नन वोरोर मरिन जल्मा सिया पर्तोन” इत्ता.
2 कयिंतुन पेजेय वोनोर तमुर हेबेलतुन जल्मा सीता.
वूर बेर्स्ता पेजे, हेबेलु गोरेङ गाय्कि आतोर अनि कयिन केतिदारल आतोर.
3 अहन पिसेर मनेके, कयिन तना पंडुसीता पंटतल इचुसि पिय्सि, येहोवन अर्पना सिय्ले, वातोर.
4 हेबेलु गिर तना मेह्वल गोरेना मंदतल पेह्लुरि पुड्तङ बेय ताज्यलिक पिलन येहोवनगा तचि कोय्तोर.
येहोवल हेबेलतुन अनि वोर सीता कोडुतङ बागल्क्ना अर्पनतुन वोप्तोर.
5 बति कयिन अनि वोर सीता अर्पनतुन येहोवल वोप्मकि.
ते कयिंतुन बेय सोङ वाता.
ते वोना मोकोम पूरो नारज आता.
6 अस्के येहोवल, “नीकुन सोङ बारि वाता? निमे बारि नारज मंति?” इन्जेर कयिंतुन पूसि कीतोर.
7 अनि, “निमे चोकोट-पांदे अर्पना सींदिते, नना नीवा अर्पनतुन वोप्सि, मनोन कि बतल?
* निमे सते-पांदे ताक्वा सोन्जि, नीकुन बस्के पिय्का इन्जेर चिहोत दात नी करुम पाप वोल्सि मंता* नी पोरो पाप अदिकार ताकुसना इंता. बति निमे तप्वक पापुन पोरो अदिकार ताकुसना” इन्जेर येहोवल कयिंतुन वेह्तोर.
8 अद आता पेजे, कयिन तंवोर तमुर हेबेलतुन, “वाव्टे दाकट दा!”
इन्जेर इत्तोर. अहन वाव्टे सोत्ता पेजे कयिन, तमुन पोरो मुच्लि अर्सि जक्तोर.
9 अस्के येहोवल, “नीवोर तमुर हेबेलु बगा मंतोर?”
इन्जेर कयिंतुन पूसि कीतोर.
ते वोर कयिन, “नाकुन वोड्कि सेले. नावोर तमुन नना केप्वना आंदुन कि बतल?” इन्जेर इत्तोर.
10 अद केन्चि येहोवल, “निमे बारि इहिन कीति? निमे पासि तुह्ता नीवोर तमुना नेतुर बोमितल ‘नना नीकुन सिक्सा वाटना’ इन्जेर नाकुन विनंति कीसेर मंता.
11 नीवोर तमुन नी केय्दे जक्ति.
नी केय्दल तूर्ता नेतुडुन बोमि ऊत्ता.
अद बोमित पोरो मंवक्ने नीकुन सापेना लाग्ता.
12 निमे येव्सा कीकिते, अद बोमि नीकुन बर्कत सियो.
निमे रोन-रचा सेल्वक आगम बोमित पोरो वेलिसेर मंदंति” इन्जेर बगवंतल इत्तोर.
13-14 अद केन्चि कयिन, “नाकुन सीता सिक्सा नना सोसि किया परोन अचोर डगुर मंता.
नेंडु इद जागतल नाकुन पेसुसि पुडंति.
नीवा चर्नते वाय्वक रोन-रचा सेल्वक आगम बोमित पोरो वेलिसेर मंदंतोन.
अद सूड्सि बोरे नाकुन वोड्कि कीसि, जकनुर” इन्जेर येहोवन सङा वेह्तोर.
15 ते, “अहन आयो!
नीकुन जकनुर वोन येडुङ जोकङ सिय्वल सिक्सतल तेर डगुर सिक्सा वायर” इन्जेर येहोवल कयिंतुन सङा इत्तोर. बोरे जक्वक्ने कयिंतुन पोरो निसनिता मोर येहोवल वाट्तोर.
16 अस्के कयिन येहोवना चर्नतल पेसिसि, येदेन वाडितुन पोड्द पेसिवल बाजुन मंवल नोदु* देस्ने पिसेर मत्तोर.
कयिंता संतान
17 कयिन तंवा बाय्कोन सङा मीरे मातोर.
ते अद पीटेते मन्जि, हानोकुन जल्मा सीता.
अस्के वोर कयिन उंदि नगुर दोह्तोर.
अद नगुडुन तंवोर मरि हानोक्ना पोरोल इर्तोर.
18 हानोक ईरदुन मिय्तोर.
ईरद महोययेलतुन मिय्तोर.
महोययेल मतुसयेलतुन मिय्तोर.
मतुसयेल लेमेकुन मिय्तोर.
19 लेमेक रंड वेय्लोकुन तुङ्तोर.
अवेनल उंदिता पोरोल आदल उंडे उंदिता पोरोल सीलल.
20 आदल याबलतुन जल्मा सीता.
वेर डोर-जंवर मेह्वलिरकुन अनि डेरनगा मंवलिरकुन मोदोडोर बाबो आतोर.
21 याबल्तोर तमुर यूबल.
वेर पेप्रे वडुस्वलिर्क अनि कीक्रि नेकुस्वलिरकुन मोदोडोर बाबो आतोर.
22 सीलल तुबल्कयिंतुन जल्मा सीता.
वेर पितुड अनि कच्चिते आय्तर्क तयर कींदुर.
तुबल्कयिंता सेलडा पोरोल नयमल.
23 लेमेकु तंवङ वेय्लोकुन सङा,
“आदल अनि सीलल ना गोस्टि केन्जट!
नावा गोस्टित पोरो दिहन इरट.
नाकुन गायल कीता काड्कि, वोरोर डियोन जक्तोन.
24 कयिंतुन येहोवल सीता सिक्सतल तेर,
कयिंतुन जक्वन येडुङ जोकङ अदिक सिक्सा बडे मायर.
बति नाकुन जक्वन सिक्सा सत्तर येडुङ (77) जोकङ डगुर बडे मायर”
इन्जेर अवेकुन वेह्तोर.
आदामुन अनि अवन उंडे वोरोर मरि पुट्वल