पाप मोदोल आय्वल
3
1 अद गट्कते येहोवा बगवंतल निव्डि कीता सम्दो जिव्रसनल तरस कपेटल मत्ता.
अद तरस, “इद वाडिता बदे उंदि मरतङ पंडिङ तिन्मट इन्जेर बगवंतल मीकुन वेह्तोरिय?” इन्जेर वेय्लोन पूसि कीता.
2 ते अद वेय्लो, “इद वाडितङ बद गिर मरतङ पंडिङ तिंदा वचो.
3 बति ‘मिरट साय्वक मंदना इत्तेके, वाडित नड्डुम्ना मरतङ पंडिन मात्रम तिंवा अनि इट्वा गिर’ इन्जेर बगवंतल माकुन वेह्तोर” इन्जि तरसुन सङा वेह्ता.
तरस वेय्लोन सङा वड्क्वल
4 अद केन्चि तरस, “एहे!
अद लबड आंद. मिरट असल साय्विट.
5-6 बारितेके, मिरट तिता नेटि मी कड्क कोले मांतङ अनि मिरट वोन दात आसि, चोकोट-वायुट्ना गियन वांता इंवल बगवंतन टावय” इन्जेर वेय्लोन सङा वेह्ता.
अस्के वेय्लोन अद मरतङ पंडिङ तिंदन साटि चोकोट्नङ, कडकुन सोबतङ, गियन सीनल दिस्तङ.
ते अद वेय्लो इचुङ्सि पंडिङ कोय्सि, तिन्जि तंवोर माड्सोन इचुङ सीता, वोर गिर तितोर.
7 येंटने वूरङ कड्क कोले मासि, तमा कुडेके मंतेर इंवल करि कीसि, लजे मातेर.
आकिङ* कोय्सि अवेन कोट्सि मेंदोड पोरो गूंडि कीतेर.
8 अद नेटि पोद्रेक्ना सितुर येलते, वाडितगा येहोवा बगवंतल तिरिसेर मनेके, आदम अनि वोना बाय्को बगवंतना आवज केन्चि, वाडितङ मरकुन नड्डुम मक्तेर.
9 बति येहोवा बगवंतल आदमुन, “बगा मंति?” इन्जेर पूसि कीतोर.
10 ते, “नीवा आवज केन्चि, ‘नना कुडेके मंतोन’ इंवल करि कीसि नीकुन वेरिसि मक्तोन” इन्जेर आदम वेह्तोर.
11 अद केन्चि बगवंतल, “निमे कुडेके मंति इन्जेर नीकुन बोर वेह्तोर? तिन्मा इन्जेर नीकुन हुकुम सीता मरतङ पंडिङ तिति कि बतल?” इन्जेर आदमुन पूसि कीतोर.
12 ते आदम, “ना सङा सोप्ति मंले, निमे सीति इद वेय्लोय अद मरतङ पंडिङ इचुङ्सि नाकुन सीतते, नना तितोन” इन्जेर वेह्तोर.
13 अस्के येहोवा बगवंतल, “इहिन बारि कीति?”
इन्जेर वेय्लोन पूसि कीतोर. ते अद वेय्लो, “अद कपेटल तरस नाकुन पसि कीतते, नना तितोन” इन्जेर वेह्ता.
14 अदेन साटि येहोवा बगवंतल तरसुन सङा, “निमे इहिन कीता काड्कि दर्तुरितङ सम्दो जिव्रस्नगटल नीकुन सापेना सींतोन.
अद बतल इत्तेके, बचेजेल पिस्कि अचेजेल नीवा पेटिते पर्केडे माकि अनि तोडि तिन्जेर पिस्कि.*
15 नीकुन अनि वेय्लोन नड्डुम, नीवा संतांदुन अनि वेय्लोना संतांदुन* नड्डुम दुस्मन दोसंतोन.
निमे वेय्लोना संतांदोना डाकतुन कस्कंति.
बति वोर नीवा तलतुन चेच्रि कींतोर” इन्जेर वेह्तोर.
16 अनि बगवंतल, “नीवा बालिंता नोपित बेय वेले अदिक कींतोन.
नोपिते मरि-मियडुन जल्मा सींति.
नीकुन वेले तक्लिब आयर.
माड्सोन पोरो नीवा मन वित्तर.
माड्सो नीकुन वागि कीनुर” इन्जेर वेय्लोन सङा वेह्तोर.
17 अनि आदमुन सङा, “निमे नी बाय्कोना गोस्टि केन्चि, तिन्मा इन्जेर हुकुम सीता अद मरतङ पंडिङ तिति.
अदेन साटि नी हिंदल बोमितुन सापेना सीतोन.
बचेजेल पिस्कि अचेजेल तक्लिब्नेन अद बोमिता पंटा तिंद्कि.
18 बोमि सम्दो तीर्क्नङ चह्क्नङ पोदेलन, नी साटि पिरुसंता.
वाव्टा पंटा तिन्जेर पिस्कि.
19 निमे तोडितल निव्डे माति.
सासि तोडितगा मीरे मानल वेरि नी मेंदोडे कस्टम कीसिन चंदि तिंद्कि.
निमे तोडिति आंदि.
साता पेजे मल्सि तोडि आसि दांति” इन्जेर बगवंतल वेह्तोर.
20 आदम तंवा बाय्कोन ‘हव्वल’* इन्जेर पोरोल दोस्तोर.
बारितेके अद जीवते मंवलिर सम्दिरा अवल आंद.
21 येहोवा बगवंतल आदमुन अनि वोना बाय्कोन तोल्दङ कप्डिङ तयर कीसि, वूरकुन पोंडुसीतोर.
22 अस्के येहोवा बगवंतल, “इचुला!
चोकोट-वायुट करि किय्ले, आदम मा मोडि गियन वाले मायनल आतोर. अदेन साटि, वोर उंदि मोका तंवा केय चह्चि, जीवा सिय्वल मरतङ पंडिन तिन्जि बस्केट जीवते मंदनुर” इन्जि,
23 येहोवा बगवंतल आदम बद बोमितल निव्डे मातोरो, अद बोमितगा केति किय्ले, येदेन वाडितल वोन पेसुसीतोर.
24 वोन पेसुसीता पेजे, येदेन वाडिता जीवा सिय्वल मरतगा सोंवक्ने केप्सेर मंले, पोड्द पेसिवल बाजुन केरुबुल्कुन* अनि हिके-हके तिरिसेर मंवल तड्मिता तल्वरतुन गिर बगवंतल इर्तोर.