पुट्गड्मि 2

येडवा दिवोस्ने - आरम येत्वल

1 अहन दर्तुरि अनि हाबर अवेनगा मंवलिक सम्दोतुन गडि कीतोर.

2 बगवंतल तना गडि किय्वल कामुन सारुङ दियने मह्‍चि, तना कीता सम्दो कामनल येडवा दिवोस्ने आरम येत्तोर.

3 अदेन साटि, बगवंतल अद दिवोसुन आसिर्वाद सीसि, तंवा नेकिता दिवोस इन्जेर नेमि कीतोर.

बारितेके, अद दिवोसुन नेटि कलि गडि कीता सम्दो कामनल आरम येत्तोर.

येदेन वाडितगा मायनल

4 इदे दर्तुरि अनि हाबर गडे माता तीर आंद.

बस्केते दर्तुरि अनि हाबर येहोवा बगवंतल गडि कीतोरो,

5 अस्के दर्तुरित पोरो बदे पोदेलय आयि, जाडिय आयि पिर्मकि.

बारितेके येहोवा^* बगवंतल दर्तुरित पोरो पिर अरुस्मकि अनि केति किय्ले मायनल गिर सेले मत्तोर.

6 तेर बति दर्तुरित रोपोडल जलङ पूटे मासि^* बोमि सम्दोत नह्‍तङ.

7 अस्के येहोवा बगवंतल बोमिता तोडिते माय्नना पुत्ला निव्डि कीसि, वोनङ मोसोर बोङ्डनगा जीवता हूकुर उह्‍क्तोर.

ते वोर मायनल जीवा वाले^* आतोर.

8 येहोवा बगवंतल पोड्द पेसिवल बाज्नेके येदेन^* इंवल जागतगा उंदि वाडितुन निव्डि कीसि, वोर माय्नन अगा इर्तोर.

9 अनि येहोवा बगवंतल सूडन साटि सोबतङ, तिंदन साटि चोकोट्नङ वालेक हरियेक मरतुन पिरुसीतोर.

बस्केट जीवते मंले, जीवा सिय्वलिक पंडिङ वाले मरा अनि चोकोट-वायुट्ना गियन सिय्वलिक पंडिङ वाले मरा अद वाडित नड्डुम मत्तङ.

10 अद वाडितगा येर सियन साटि, उंदि डगुर लव्डि पोङ्सेर मत्ता.

अद लव्डि येदेंतुन वीड्ता पेजे, नालुङ चुडुक लव्डिङ आसि, पाके माता.

11 मोदोल पाके माता लविडा पोरोल पीसोन.

अद पूरो हविला देस्नगा पोङंता.

अगा सोने पुटंता.

12 अद देस्ना सोने बेय पिवर आंद.

अगा चोकोट्ना गाडि सिय्वल सेवेर अनि बारितङ चोकोट्नङ कंकर्क गिर पुटंतङ.

13 रेंडवा पाके माता लविडा पोरोल गिहोन.

अद पूरो कूसु देसुन सिर्मुट पोङंता.

14 मूडवा पाके माता लविडा पोरोल हिद्देकेल.

अद अस्सुर देस्ना पोड्द पेसिवल बाज्नेके पोङ्सेर मंता.

नाल्गवा पाके माता लविडा पोरोल युप्रटिस.

15 येदेंता वाडितगा केति कीसेर निग्रन कियन साटि, येहोवा बगवंतल वोर माय्नन इर्तोर.

16 अनि, “इद वाडितङ हरियेक मरतङ पंडिङ पह्‍जे मत्ता अचोर तिंदा वचो,

17 बति चोकोट-वायुट्ना गियन सिय्वल मरतङ पंडिङ तिंवा.

निमे अवेन तिता नेटि जरुर नीवा मरन आयर^*” इन्जेर बगवंतल माय्नन हुकुम सीतोर.

मोदोडा वेय्लो

18 “मायनल वोरोरे मंवल चोकोट आयो.

वोन सोप्ति मन्जि, मदत किय्वडुन निव्डि कीका” इन्जेर येहोवा बगवंतल इत्तोर.

19 येहोवा बगवंतल हरियेक जिव्रसुन, पिटे-पुरडुन बोमिता तोडितल निव्डि कीसि, वोर मायनल बव-बव पोरोल्क इरंतोरो सूड्का इन्जि, अवेन वोन्गा तत्तोर.

ते वोर अव सम्दिन बव्ते पोरोल्क दोस्तोरो, अवे पोरोल्क रेहे मातङ.

20 वोर डोर-जंवरतुन, केडता जिव्रसुन, पिटे-पुरड सम्दोतुन पोरोल्क दोस्तोर.

बति आदमुन सोप्ति मन्जि, मदत किय्ले बोरे सेले मत्तेर.

21 अद वकत्ने येहोवा बगवंतल आदमुन जोप वायुसि, बेय नरुम्ता पेजे वोनङ बर्न्गडि बोकनल उंदि बोका तेंड्सि, अद जागतुन सविते मुह्‍तोर.

22 अहन मुह्‍चि, येहोवा बगवंतल आदमनल तेंड्ता बोकतल वेय्लोन निव्डि कीसि, तान आदम्नगा पिय्सि वातोर.

23 तान सूड्ता बरोबर आनंद्ने आदम, “अबा!

तेन ना बोकन दात्नङ बोकङ मंतङ अनि ना मेंदोडुन दात्ना मेंदोल मंता. इद नह्‍गटल निव्डे माता काड्कि, तेन ‘वेय्लो’^* इन्जेर पोरोल दोस्का” इत्तोर.

24 अदेन साटि मायनल तंवुर अवल-बाबोनल वेगोरा आसि, तंवा बाय्कोन सङा जोड आसि, पिसंतोर.

वूर इविर उंदिय मेंदोल आसि, मंदंतेर.

25 अद गट्कते आदम अनि वोना बाय्को इविर्ते कुडेकेय मत्तेर.

बति वूरकुन लजा इंवल टावा सेले मत्ता.